Skip to content Skip to left sidebar Skip to footer

PERSOAL E FACENDA

A partir de mañá poden solicitarse as subvencións municipais para clubs e entidades deportivas correspondentes ao 2020

Desde mañá martes 4 de agosto e ata o próximo 24 do mesmos mes, os clubs e entidades deportivas inscritas no rexistro municipal de asociacións do Concello de Cedeira poderán presentar a súa solicitude de subvención tanto para investimentos como para actividades para o ano 2020.

As subvencións para actividades teñen como finalidade apoiar e mellorar a práctica deportiva dos clubs e entidades deportivas, subvencionando os programas de actividades deportivas a desenvolver, referidos a proxectos de iniciación deportiva, fomento da práctica e competición deportiva; podendo consistir en programas, eventos ou competicións deportivas concretas ou na actividade ordinaria anual do club ou entidade deportiva solicitante.

Pola súa banda, as axudas para investimentos teñen como finalidade apoiar e mellorar a práctica deportiva dos clubs e entidades deportivas subvencionando investimentos de natureza inventariable tales como inmobles, mobles ou outros susceptibles de inventario cun custo superior a 100,00 €. O obxecto do investimento deberase manter no inventario da entidade ou asociación beneficiaria durante un mínimo de dous anos, contando dende o momento da súa adquisición.

O procedemento asignado para a concesión das distintas solicitudes tanto para as subvencións de actividades como de investimentos será en réxime de concorrencia competitiva, mediante a aplicación dos criterios de concesión que se desenvolven nas bases e que son: o fomento do coñecemento do deporte base, fomento da participación feminina no deporte, organización de actividades, torneos, eventos, etc., antigüidade do club, número de deportistas que compoñen o club ou entidade deportiva, número de técnicos deportivos titulados e acreditados., menor importe da cota mensual, emprego da lingua galega , e compromiso de colaborar coa Concellería de Servizos Sociais para que ningún menor en risco de exclusión social quede fóra dos clubs ou entidades deportivas por razóns económicas.

Nas seguintes ligazóns poden descargarse as bases das axudas publicadas que inclúen os anexos coas solicitudes e demais documentación requerida:

IR Á LIGAZÓN Bases reguladoras para a concesión de subvencións para actividades a clubs e entidades deportivas de Cedeira para o exercicio 2020

IR Á LIGAZÓN Bases reguladoras para a concesión de subvencións para investimentos a clubs e entidades deportivas de Cedeira para o exercicio 2020

O Concello de Cedeira crea 36 empregos eventuais durante os meses de verán

Un total de 36 traballadores están a firmar estes días os contratos que os vincularán durante o verán ao Concello de Cedeira.

Estas contratacións obedecen a plans como o de Fomento do Emprego, os Fondos de Compensación Ambiental, o Risga e as brigadas de incendios,subvencionados pola Xunta de Galicia e o relativo a limpeza de praias, subvencionado pola Deputación da Coruña, entre outros

Uno destes empregos temporais dará lugar á creación do primeiro punto municipal de información turística no lugar San Andrés de Teixido. O servizo botará a andar a próxima semana e a súa finalidade é “reivindicar” un dos reclamos turísticos máis importantes da comarca e mesmo de Galicia como parte do territorio cedeirense, tal e como apuntou a concelleira de Turismo, Carmela Prieto Cal.

“Queremos crear unha sinerxia entre San Andrés e Cedeira, de maneira que as persoas que visiten este importante lugar de peregrinación despois veñan á vila para coñecela”, asegurou a titular de Turismo. Esta iniciativa verase reforzada coa distribución de folletos informativos entre os visitantes.

Á fronte desta nova acción de goberno estará un dos tres técnicos de turismo que este verán encontraron emprego no Concello de Cedeira, mentres que outro ocuparase das visitas guiadas ao castelo da Concepción e o terceiro virá a reforzar o cadro de persoal da oficina de turismo do Palacete municipal.

Tamén se verán incrementadas as áreas de medio ambiente, coa contratación de seis peóns e un técnico; a relativa á limpeza de praias, tarefa da que se ocuparán outras cinco persoas, e a brigada de incendios. A esta última estarán vinculados un total de catro traballadores.

A través do Risga encontrarán emprego 3 peóns e 2 limpiadores e será un no caso do programa Aprol Rural da Xunta de Galicia, que se ocupará da limpeza de montes públicos. O cadro de persoal da Policía Local verase así mesmo reforzado coa contratación de dous axentes auxiliares e da man do PEL o Concello disporá de catro traballadores para realizar traballos de albanelería.

Con cargo a plan de Fomento do Emprego xa están a traballar desde hai días os tres socorristas que se fan cargo da seguridade dos bañistas, así como de vixiar o cumprimento das normas impostas pola Covid-19 entre as persoas que acudan ás praias locais.

O pleno aprobou o orzamento municipal para este ano, que supera os 6 millóns de euros

O goberno de Cedeira xestionará este ano un orzamento de 6.299.684,12 euros, o que representa un incremento do 11,88% con respecto ao agora vixente (de 5. 630.601euros).

O asunto resultou aprobado na sesión celebrada o xoves pola corporación municipal e saíu adiante cos votos a favor do executivo local e coa abstención do PP e do BNG, un xesto que agradeceu o alcalde, Pablo Diego Moreda Gil, por entender que “todos estamos a traballar na mesma liña nun proxecto social de recuperación para as nosas familias que, por suposto, tamén é o proxecto de todos os partidos que formamos parte da corporación municipal”.

O rexedor municipal destacou así mesmo o traballo que fixo o equipo de goberno á hora de elaborar un orzamento “pensado para cubrir as necesidades sociais dos veciños/as e destinado a axudar ás persoas máis vulnerables e aos sectores máis prexudicados economicamente polo coronavirus. De feito, “as contratacións para persoal de atención ao servizo de axuda no fogar incrementouse máis de 80.000 euros con respecto ao ano pasado para atender aos máis dependentes”, segundo o executivo local. Un plan para combater a emerxencia social de 50.000 euros e outro de 150.000 para axudar a todas aquelas empresas e autónomos que viron a súa actividade paralizada pola pandemia están xa recollidos no documento aprobado o día 4. A dinamización do comercio e da hostalería de Cedeira tamén é outra das prioridades do goberno local e boa mostra diso é o proxecto de dinamización que o goberno prevé contratar en xullo coa entrada en vixencia dos orzamentos agora aprobados.

O goberno cedeirense manterá así mesmo unha política continuísta con respecto ao investimento en saneamento, con preto de 368.000 euros, e tamén no relativo á optimización do sistema de alumeado público, tanto na zona rural como na vila, cun gasto superior aos 143.000 euros para este ano. Adaptar o antigo pazo de Moscoso para acoller dependencias municipais e destinar máis de 100.000 euros á mellora de pistas municipais e desbroces son outros investimentos previstos polo executivo para este 2020, así como a contratación dun Plan de Igualdade e un proxecto de orzamentos participativos para a mocidade. Para este último, o equipo de goberno traballará conxuntamente co alumnado do IES Punta Candieira.

Haberá novos investimentos para continuar coas excavacións no xacemento do Sarridal -un a cargo do Concello e outro financiada para Xunta de Galicia- e, no relativo ao capítulo das subvencións de libre concorrencia para fomentar a cultura e deporte, no documento contable figuran as mesmas cantidades orzamentadas que ano pasado. En canto as axudas directas serán percibidas pola Escola de Música, Museo Mares de Cedeira, Apader, Agrupación local da Cruz Vermella, Asociación sobre Rodas, Asociación polo Benestar Animal (ABAC), Asociación Ecuestre “A crina”, Protección Civil, ANPAs Picapeixe e O beco, Asociación Amigos dos Ríos e Banda de Música Vila de Cedeira. Entre unhas e outras o Concello de Cedeira repartirá un total de 188.300 euros.

Con respecto ao capítulo de ingresos consignase unha baixada de 106.000 euros na recadación dos impostos directos (un 5,05%) pola a parálise da actividade económica pero, polo contrario, aumenta en 124.876,38 euros as transferencias correntes. Nelas se inclúen as achegas da Deputación da Coruña para gastos sociais extraordinarios derivados do Covid-19 e as destinadas á execución de obras. Estas últimas incrementanse un 75,64% respecto ao 2019.