NOVAS

A Taberna Bon Pé resultou este ano a gañadora do certame “Tapas de Outono” que organizou o Concello de Cedeira para darlle pulo á hostalería e a gastronomía local. O Mesón acadou o segundo premio e Gastrobar O Amanexo recolleu o terceiro, nunha edición do concurso que espertou grande interese. Segundo confirmou a concelleira de Emprego e Promoción Económica, Manuela López, houbo moita xente visitando e degustando os petiscos dos dez locales participantes entre o venres e o domingo pasado, cando se desenvolveu a iniciativa, e algún dos establecementos chegou a vender preto de mil unidades.

A Taberna Bon Pé participaba por primeira vez no certame, despois da súa apertura o verán pasado. É un establecemento rexentado por Yolanda Cuesta e Diego Iglesias, que tamén está ao frente dunha comercializadora de marisco. Gañou o concurso co petisco “Mar e montaña de porco celta, centolla e boletus”. O Mesón quedou en segundo lugar coa tapa “Albóndiga en salsa de carrileira, crema de piquillo e bola á sartén” e O Amanexo foi terceiro coa “Carrilleira de frisona style”.

Como sucedeu en anteriores edicións, o “Tapas de Outono” tivo tamén premio para o público. Así, entre as persoas que votaron -emitíronse un total de 360 papeletas- sorteouse unha cea para dúas persoas no local gañador.

O Concello de Cedeira acenderá a iluminación de Nadal este venres, día 6, ás 18.15h, na Praza do Peixe. Tal como sucedeu o pasado ano, e como un xesto que se prevé xa manter no futuro, o goberno local pon nas mans das persoas usuarias de Apader o acto do acendido para subliñar o forte vencello que existe entre o colectivo e a localidade. O mesmo día comezará a campaña de fomento do comercio local, que co lema “En Nadal, en Cedeira” repartirá 3.300€ en premios. De venres a domingo, ademais, os comerciantes propoñen a xincana “Mensaxe secreta de Nadal”.

O acto que se vai desenvolver na Praza do Peixe, onde estará situada unha árbore de luz, terá tamén unha compoñente musical moi participativa. Diferentes agrupacións e asociacións sucederanse cantando e tocando panxoliñas e outras cancións, de maneira que a cita convertirase nunha mostra da grandísima afección á música que existe na localidade.

A iluminación de Nadal en Cedeira esténdese este ano a algunhas rúas máis e chega de novo a todas as parroquias. A principal novidade estará na rotonda da praza de Galicia, en cuxo centro vai colocarse un teito parcial de luces baixo unha estrela fugaz e a mensaxe Bo Nadal dando a benvida á xente neste punto tan transitado. As rúas principais do casco vello terán un teito de luces e na praza da Marieta haberá un oso deseñado para empregarse como “photocall”.
O parque dos Patos tamén contará cunha iluminación especial.

Un ano máis a campaña de fomento das compras no comercio local conta coa adhesión dun alto número de establecementos. Arredor de 170 tendas e negocios de moi diferentes sectores, desde estética ata seguros, participan na iniciativa. A promoción consiste no reparto de rifas entre as persoas que consuman nos establecementos a partir deste venres, para participar no sorteo de 3.300€ en vales de compra de diferentes importes. O sorteo será na fin de semana do 11 de xaneiro, despois das festas, e como é habitual será un acto moi animado, con música e unha alta afluencia de veciños e veciñas.

Os comerciantes estrean tamén esta fin de semana, aproveitando o festivo do venres e co comezo da campaña, a xincana “Mensaxe secreta de Nadal”. É un xogo aberto a grupos de entre 3 e 5 persoas, de calquera idade, que terán que ir descubrindo as pistas, dispostas en diferentes escaparates de establecementos da vila, para compoñer unha frase. Os equipos que completen o xogo correctamente entrarán no sorteo dun vale de compra por valor de 100€ patrocinado pola empresa Merluza do Norte. Para seguir os detalles da xincana pode seguirse a conta de Instagram
@decedeira.

O Concello de Cedeira rematou recentemente as obras de rehabilitación dos lavadoiros da Penela e do Peneiro, situados nas parroquias de San Xulián de Montoxo e San Cosme de Piñeiro, respectivamente. Investíronse 33.834,64€ nestas intervencións e boa parte deste orzamento sufragouse cunha axuda de 20.000€ do programa para a corrección de impactos paisaxísticos da Xunta de Galicia.

O goberno local de Cedeira segue adiante, con estas obras, co plan de recuperación das fontes e lavadoiros do municipio, elementos singulares da arquitectura popular que estaban abandonados pero que tiñan unha grande importancia na vida dos nosos avós como espazos de convivencia. Así, en anos pasado acometéronse tamén as rehabilitacións das fontes da Barca, das Saíñas, Fernando Lago, do Areal, de Vilar e de Vila do Río.

Tanto o lavadoiro de Penela, situado no lugar de Muruxás, en San Xulián de Montoxo, como afonte e lavadoiro do Peneiro, no Beco, en San Cosme de Piñeiro, presentaban unha gravedeterioración. Os traballos, nos dous casos, consistiron na limpeza da vexetación e os paramentos,pavimentos e os propios lavadoiros, que presentaban fendeduras e outros desperfectos.

O lavadoiro do Peneiro tiña un teito de placas de fibrocemento, que se cubriu agora con tella do país, mentres que o do Peneiro contaba cun tellado de formigón e lousa moi deteriorado que tamén foi reparado e cuberto con tella. A obra abrangueu tamén nas dúas fontes o cambio dos caños e a renovación dos morteiros, así como a colocación dun chapado de pedras irregulares do país no chan e parte dos paramentos verticais do seu interior.