Skip to content Skip to left sidebar Skip to footer

NOVAS

O XEOPARQUE MUNDIAL UNESCO CABO ORTEGAL OFERTA DÚAS PRAZAS DE PERSOAL PROPIO

O Xeoparque Unesco Cabo Ortegal ven de iniciar o proceso de selección de dous postos de traballo ofertados pola asociación para a xestión do Xeoparque do Cabo Ortegal. Segundo as bases publicadas, os perfís a cubrir son os de xerencia e o de xeólogo/a, sendo necesario presentar a solicitude xunta coa documentación esixida a través da Sede Electrónica do concello de Cedeira.

Pódense consultar as bases reguladoras dos procedementos de selección, así como todas as publicacións que dela deriven, na sección de novas de www.xeoparquecaboortegal.gal.

As persoas interesadas en participar nestes procesos selectivos só poderán presentar as súas instancias vía telemática, a través da Sede Electrónica do Concello de Cedeira.

No caso do posto de Xerencia, requírese unha persoa altamente cualificada, con experiencia en xestión, capacidade de planificación e organización, capacidade analítica e conceptual, gran sentido da responsabilidade e que estea afeita a traballar en equipo. Para o posto de Xeólogo/a, tal e como recollen as bases reguladoras, ademais esíxese unha persoa altamente cualificada con experiencia na divulgación científica. En ambos casos, é imprescindible o coñecemento dos idiomas galego e inglés, así como ter dispoñibilidade para viaxar.

O sistema de selección para ambos postos constará de catro fases: concurso de méritos, exame con preguntas de resposta curta sobre o temario establecido nas bases, entrevista persoal e, se fora o caso, acreditación de idiomas (galego a inglés).

Estas convocatorias responden á necesidade da creación dunha oficina técnica con persoal propio, conforme os estatutos da Asociación e o compromiso adquirido e ratificado en sendas reunións da Xunta Directiva.

Xeoparque Mundial da UNESCO Cabo Ortegal

A peculiaridade desta área reside en que aquí están na superficie rochas que habitualmente se atopan no manto da Terra, a máis de 70 quilómetros de profundidade. A ciencia xeolóxica ten no Ortegal un grande campo para investigar e ampliar o seu coñecemento sobre os cambios e momentos que viviu a Terra durante millóns de anos.
Agora, co Xeoparque Cabo Ortegal o que se pretende é ampliar ese saber levándoo fóra dos círculos especializados. Trátase de facer que todo isto sexa coñecido e valorado en primeiro lugar polos arredor de 28.000 habitantes dos sete concellos, pero tamén que se converta nun referente divulgativo e turístico para persoas do resto do mundo, sexan especialistas ou non. O patrimonio xeolóxico, o patrimonio natural e paisaxístico, o patrimonio cultural material e inmaterial -construcións, tradicións, gastronomía, etc.- están intimamente ligados dentro do Xeoparque, xa que malia tomarse a xeoloxía como punto de partida, o obxectivo que se persegue é o de alcanzar un desenvolvemento sustentable no territorio onde todos eses aspectos estean relacionados e coordinados baixo o paraugas desta figura da UNESCO

O proxecto comezou oficialmente a súa andaina para converterse en Xeoparque Mundial da UNESCO EN 2020, cando foi formalmente constituída a Asociación para a xestión do Xeoparque do Cabo Ortegal, dotándose así da personalidade xurídica propia esixida pola UNESCO para a presentación do proxecto de candidatura. Preséntase en primeira instancia este ano con resultado desfavorable.

Xa en 2021 e cos deberes aprendidos, presentase de novo e en este caso, con resultado positivo. Foi a finais do verán de 2022 cando recibimos a visita da comitiva de avaliación de dous auditores da UNESCO: Chris Woodley-Stewart – Geoparque North Pennines (Reino Unido), e César Goso – Geoparque Grutas del Palacio (Uruguay). Despois de moito traballo e un informe positivo de estes avaliadores, o 24 de 2023 anunciase oficial e publicamente a que Cabo Ortegal xa é Xeoparque Mundial da UNESCO, converténdose así no segundo de Galicia e o único territorio da Península Ibérica que obtén o distintivo esta anualidade.

CEDEIRA E VALDOVIÑO REXEITAN A SIMPLISTA EXPLICACIÓN DA XUNTA Á CONTAMINACIÓN DOS BANCOS MARISQUEIROS

Os alcaldes de Cedeira, Pablo Diego Moreda Gil, e Valdoviño, Alberto González Fernández, declaráronse “sorprendidos” polo comunicado difundido onte pola Delegación Territorial da Xunta de Galicia no que se sitúa a orixe dos altos niveis de contaminación detectados nos bancos de produción marisqueira en dous focos da rede de saneamento municipal de Cedeira. Moreda Gil explicou que son dúas fugas puntuais, que por suposto van ser reparadas, pero que non explican en absoluto o resultado das análises. “É bastante máis importante o feito de que a zona de Portos non teña feito as obras de saneamento, que levamos demandando tanto tempo”, sinalou o rexedor local.

Lamentou Moreda Gil que dunha reunión que se desenvolveu nun ton cordial e con vontade construtiva saque a Xunta a única conclusión de “botar balóns fóra”. O alcalde de Cedeira asegurou que no encontro que mantiveron representantes dos concellos e das propias mariscadoras coa delegada territorial, Martina Aneiros; coa directora do Intecmar, Covadonga Salgado; co presidente de Portos, José Antonio Álvarez, e co director de Augas de Galicia, Roi Fernández, falouse de colaborar para ver de acabar cuns picos de contaminación que, tal e como se puxo de manifesto, non parecen ter un único foco. A falta de saneamento nos peiraos e as escorrentías procedentes de granxas estiveron entre as causas que se trataron na reunión, “máis relevantes que os dous puntos da rede de saneamento municipal, pese a que a Xunta preferiu pasalos por alto e apuntar únicamente a Cedeira”.

Pediu Moreda Gil máis seriedade para abordar este problema, que ten provocado o cambio de clasificación microbiolóxica dos bancos marisqueiros de Cedeira e Vilarrube. Agora son zonas C, o que supón un prexuizo moi importante para o sector marisqueiro, recordou o alcalde, que aludiu tamén á clasificación de “excelente” que acadaron as augas do litoral cedeirés nos últimos anos, como consecuencia directa do enorme esforzo realizado polo Concello na mellora do sistema de saneamento e na implantación da rede separativa.

Pola súa banda, o alcalde de Valdoviño, Alberto González, demanda da Xunta un estudo en profundidade da conca dos ríos Ferrerías e As Mestas, de modo que se realicen as analíticas pertinentes coas que descartar posibles afectacións no marisqueo derivadas de focos de contaminación nestas áreas. O rexedor lembrou que no ano 2019 actívase a alerta de contaminación por cianobacterias no encoro das Forcadas, que se nutre de Ferrerías, e que dende entón os niveis de contaminación non fan máis que medrar ano tras ano, obrigando á suspensión de actividades no embalse e mesmo o baño.

Ademais, As Mestas desemboca no areal de Vilarrube, zona de traballo das mariscadoras. Co obxecto de descartar unha posible relación entre ambos episodios úrxese ese estudo analítico en profundidade por parte da Administración autonómica, xa que conta con todos os medios e recursos, ademais da competencia, para facelo.

UNHA XORNADA DE DANZA E UN ESCAPE ROOM ABREN O “CEDEIRA FEST” XURDIDO DOS ORZAMENTOS PARTICIPATIVOS

O programa de dinamización “Cedeira Fest” saído da cuarta edición dos Orzamentos Participativos do Concello de Cedeira arranca este domingo, 16 de xuño, con danza. Baixo o título “Cedeiranza” programouse unha xornada con dous obradoiros pola mañá, nos que non se precisan coñecementos previos, e tres espectáculos pola tarde. A inscrición está aberta a través do Whatsapp no número 649 87 66 14.

Os obradoiros de aprendizaxe serán pola mañá na Sala Áncora, ás 11.00 e ás 12.30h. A compañía de danza La Guajira, integrada polos bailaríns Armando Martén e Ana Beatriz Pérez xunto co músico Ismael Berdei, encargarase de impartir o primeiro, que leva por título “Zona de recreo”. O segundo obradoiro correrá a cargo de Elahood, grupo integrado por Sabela Domínguez e Julia Laport, e será unha introdución ás danzas urbanas e particulamente ao estilo chamado “waacking”. A participación nestas actividades non require ter formación previa de danza. O único que se pide é acudir con ropa cómoda e que permita o movemento.

Xa pola tarde, na praza Roxa, sucederanse tres espectáculos de baile, cada un deles de menos de vinte minutos de duración, a partir das 19.00 horas. Elahood actuará en primeiro lugar, co seu espectáculo “Intempestiva”. É unha proposta escénica inspirada na figura de Xela Arias e que xira arredor da desobediencia, da liberdade e da axitación creativa das novas xeracións. A continuación chegará a quenda de La Guajira, que ofrecerá “Minguantes”, unha peza arredor do envellecemento, de como o corpo é unha máquina con data de caducidade. Para rematar, o bailarín Daniel Rodríguez presentará “A raíz de”, un diálogo entre a música, o canto e a danza tradicional galega coa contemporaneidade.

Para o vindeiro 21 de xuño, o último día de clase, está programada a segunda proposta do “Cedeira Fest”. Será un “Escape Room-Noite Meiga” no que equipos de catro ou cinco rapaces e rapazas –os menores de 12 anos terán que ir acompañados dun adulto- xogarán a superar probas e retos relacionados coas tradicións e lendas máis misteriosas de Galicia. Quen queira participar ten que inscribirse no Centro de Ocio Xuvenil, ben presencialmente ou ben a través do mail coxcedeira@gmail.com.

O programa “Cedeira Fest” que aprobou o pleno de Cedeira no marco dos cuartos Orzamentos Participativos abranguerá en total 17 propostas diferentes, culturais, deportivas e de ocio, dirixidas a desestionalizar e dinamizar o tempo de lecer da mocidade da localidade. O programa foi artellado polo alumnado de 3º de ESO do IES Punta Candieira, ao que sucesivamente cada ano se lle confía o proceso de decidir o que se fai cos presupostos de participación.