Skip to content Skip to left sidebar Skip to footer

SERVIZOS

O PLENO DE CEDEIRA APROBA DESTINAR CASE O 82% DO POS+ADICIONAL A TRES PROXECTOS DE INVESTIMENTO

O pleno do Concello de Cedeira aprobou na súa última sesión ordinaria o destino dos 408.599,84€ que lle corresponden ao municipio no marco do programa do POS+Adicional 2/2023 da Deputación da Coruña. A administración local vai investir 334.899€, case o 82% dos fondos, en tres proxectos e adicar a cantidade restante, 73.700€, a financiar gasto corrente.

Os proxectos de investimento que van levarse a cabo con cargo ao programa provincial son “Renovación do pavimento nas rúas Ortigueira, Río Condomiñas, Río Lamos e Río Tixón”, valorado en 130.000€; “Reforma e conservación do edificio escolar do Lugar de Corredoira”, cun orzamento de 144.901,04€, e “Reforma e adecuación do sistema de saneamento en San Román”, cun custo de 59.997,95€. Os tres están xa redactados.

O primeiro deles dotará ás citadas catro rúas do casco urbano de novos pavimentos e dunha nova rede de recollida de augas pluviais, ao tempo que se aproveitan as obras para mellorar a accesibilidade nos catro viais. En canto ao terceiro proxecto, o do saneamento en San Román, vai dirixido a corrixir os fallos técnicos do actual equipamento para que alcance as prestacións necesarias e cumpra a normativa vixente.

O edificio que se vai reformar é a antiga escola de Santalla, en Cervo, un inmoble construído no ano 1962 e que despois foi ampliado. En 2020 o pleno do goberno local rematou coa cesión gratuíta que a institución municipal facía destas instalacións, desde o ano 2013 e a custo cero, a favor da Organización Juvenil Española (OJE). En xeral o antigo escolar non está en moi mal estado, pero é precisa a intervención para resolver humidades na cuberta e nalgunha das fachadas. O obxectivo é poñer o inmoble ao servicio da veciñanza e o tecido asociativo, dándolle diferentes usos.

O CONCELLO DE CEDEIRA DISTRIBÚE ESTES DÍAS UN NOVO NÚMERO DO BOLETÍN INFORMATIVO AS7PARROQUIAS

O Concello de Cedeira ten xa colgado na súa web e está a distribuír polas entidades veciñais e sociais do municipio un novo número do boletín informativo As7Parroquias, ferramenta de transparencia que traslada á cidadanía o traballo do goberno local. Nesta edición, que fai a número 24, faise balance das festas e eventos lúdicos e deportivos de este verán e repásanse, como é habitual, as obras en curso ou recentemente executadas. A consecución do título de Xeoparque Cabo Ortegal ocupa tamén un espazo destacado, subliñando o vieiro de oportunidades que representa entrar neste importante club da Unesco de lugares xeoloxicamente únicos.

A publicación fai un percorrido polos eventos deste verán, desde as verbenas e demais actos das Festas da Patroa ata a Festa do Percebe e os encontros culturais e deportivos máis destacados, citas que tiveron en común sempre unha alta participación e o bo ambiente. Dase conta tamén no boletín da nova distribución de responsabilidades e a composición das comisións dentro do goberno local, despois do acordo que acadaron o PSOE e o BNG no mes de xullo.

A visita ás obras que a Deputación está a acometer na zona do Rego de Tide para mellorar o trazado da estrada provincial que vai a San Andrés, así como a aprobación do Plan Contra Incendios Forestais de Cedeira están tamén neste novo número de As7Parroquias. O mesmo que o recoñecemento ao Xeoparque Cabo Ortegal e a recente reunión que mantieron o alcalde, Pablo Diego Moreda Gil, e o concelleiro de Patrimonio, José Antonio Rodríguez, coa directora xeral de Patrimonio Cultural da Xunta de Galicia, María del Carmen Martínez Insua, para tratar os próximos pasos a dar na escavación arqueolóxica do Sarridal.

No capítulo de obras, As7Parroquias repasa proxectos xa executados ou a piques de rematar, como son a ampliación do saneamento das Pontigas, a senda peonil do camiño de Cordobelas, o arranxo das pistas de pádel ou a renovación da pista multideporte e o marcador do Polideportivo, así como outras que están en proceso de contratación como o cambio das caldeiras da piscina municipal e do ascensor do Auditorio, a ampliación do ximnasio e a colocación de novo céspede artificial no campo do Beco, entre outras. Infórmase tamén da solicitude de fondos, a través de diferentes programas supramunicipais, para acometer outras actuacións, como por exemplo a dixitalización da piscina municipal para que entre nunha rede de instalacións “intelixentes” ou a creación dunha nova zona verde e de lecer na rúa Silva.

A contraportada desde número está adicada ao Cedeira Basket Club, unha entidade que está a traballar polo rexurdimento deste deporte na localidade despois de anos nos que a súa presencia decaera. O éxito do campionato 3×3 que organizou este verán é unha proba do éxito que está a ter a entidade no seu empeño.


VER PDF Boletín as 7 parroquias nº24

O CONCELLO DE CEDEIRA ACOMETE A REPARACIÓN DA CUBERTA DO ANTIGO ESCOLAR DE SISALDE

O Concello de Cedeira contratou as obras de substitución da cuberta do antigo escolar de Sisalde Maior, na parroauia de Esteiro, un inmoble que ten usos veciñais e que sofre unha importante deterioración da madeira do tellado. En total, o goberno local fai un investimento de 43.900€ (IVE incluído) a través de varios contratos para a achega dos materiais necesarios e a realización dos traballos.

Así, por unha parte o Concello de Cedeira destina algo máis de 8.300€ ao suministro dos materiais necesarios para a reparación da cuberta. Por outra, invístense 11.600€ nos traballos de impermeabilización de toda a estrutura. Súmanse outros dous contratos para a man de obra, por unha parte a democión do teito actual, cun orzamento de 10.430€, e por outra a súa substitución, cun presuposto de algo máis de 13.500€.

O antigo escolar de Sisalde, como o de Saa, é un exemplo da arquitectura indiana en Cedeira e testemuño do esforzo que a emigración cedeiresa fixo por mellora a vida e a educación da poboación da súa terra. Ambas os dous foron promovidos pola sociedade de instrución e beneficencia “Progreso de Esteiro”, fundada na Habana. O de Sisalde Maior foi levantado en 1931 e precisa a consolidación e reparación da cuberta e os caleiros debido aos danos que provocou a humidade.