ADXUDICADO POR PRETO DE 40.000€ O NOVO ASCENSOR ELÉCTRICO PARA O AUDITORIO MUNICIPAL DE CEDEIRA

A Xunta de Goberno Local de Cedeira aprobou a contratación do novo ascensor para o Auditorio Municipal por un orzamento de 39.905,80€ (IVE incluído). É un investimento que o Concello vai financiar a través do Fondo de Compensacion Ambiental e que repercutirá, ademais de ter un equipamento máis moderno e fiable, nunha maior eficiencia enerxética e na redución da contaminación.

Así, con este contrato substituirase o actual ascensor hidráulico por outro eléctrico e con capacidade para oito persoas. Evitaranse as frecuentes avarías e fallos que ten o elevador, dado que o novo modelo permite o mantemento preditivo, e reducirase o consumo enerxético. Será tamén máis rápido, polo que axilizará a accesibilidade dun edificio con seis andares e que ten unha grande afluencia diaria.

Gran parte dos problemas que rexistra o equipamento actual son resultado das inundacións que se producen no soto do inmoble cando vai moita choiva. O proxecto anula o acceso ao elevador desde este andar, aproveitando o oco para instalar alí a nova maquinaria.