CEDEIRA TEN TEATRO E CINE ESTA FIN DE SEMANA, DE NOVO DA MAN DOS CICLOS FUSA GUILLÉN E MESTRE MATEO
O municipio de Cedeira reparte de novo a súa axenda cultural desta fin de semana entre o teatro afeccionado e o cine. O Auditorio Municipal acollerá o sábado ás 20.00 horas a segunda función do ciclo Fusa Guillén, que ofrecerá a compañía ferrolá Romaría Teatro, e o domingo, ás 18.00, o pase da película de animación infantil “Valentina”, no marco do ciclo Mestre Mateo.
O grupo Romaría Teatro xurdiu dun programa de teatro veciñal que impulsou o Concello de Ferrol. A actriz Helga Méndez impartiu talleres de dramaturxia en diferentes parroquias rurais e neles naceron varios grupos que estrearon no pasado mes de xullo as súas primeiras montaxes. Unha delas é “Retratos no Camiño”, que este sábado leva a Cedeira a compañía formada por veciños e veciñas da zona de Serantes. A peza percorre personaxes e vidas desta parroquia a través de Serafín Lorenzo, un fotógrafo que foi máis coñecido no lugar como “Cazolitos” e que andaba polos camiños retratando ás xentes e os seus traballos, o tempo de lecer, os espazos de xuntanza…
Xa o domingo, Cedeira ten unha nova cita coa segunda edición do ciclo de cine en galego Mestre Mateo, que leva por Galicia as películas premiadas e nominadas no famoso certame. A localidade cedeiresa é unha das cinco na provincia da Coruña pola que itineran as películas. Desta volta é a quenda de “Valentina”, unha longametraxe de animación dirixida pola ferrolá Chelo Loureiro que gañou en 2022 o premio Goya na súa categoría e que foi finalista no certame do cine galego.
A película está protagonizada por unha nena, Valentina, que soña con ser trapecista pero que pensa que non poderá conseguilo por ter síndrome de Down. A súa avoa anímaa sempre a perseverar, di que se os vermes logran converterse en bolboretas, nada é imposible. Ela non está moi convencida, pensa en como será esa metamorfose da que lle fala a avoa. Xusto cando vai preguntar, Papá e Mámá danlle unha desconcertante noticia. A avoa marchou de viaxe.
Tamén no Auditorio desenvolverase outra cita, este venres día 20, ás 20.00 horas. Terá lugar a presentación do libro “Cogomelos da comarca de Ortegal” por parte do seu autor, José Luis Cuba Crespo.
