CULTURA

CÁNDIDO PAZÓ LEVA A PEZA “APAGA O CANDIL” ESTE VENRES AO AUDITORIO MUNICIPAL DE CEDEIRA

O Auditorio Municipal de Cedeira acollerá este venres, ás 21.00h, a representación da peza teatral “Apaga o candil”, escrita e dirixida por Cándido Pazó, na que se fai homenaxe a Carlos “O Xestal”, humorista, músico e figura clave da tradición popular galega. A función, de entrada gratuíta, chega a Cedeira da man da programación 4x3Outono da Deputación da Coruña.

A peza é unha coprodución de Contraproducións e o Festival Internacional Outono de Teatro (FIOT) e está interpretada por Avelino González e Toni Salgado. O punto de inspiración estrutural e argumental da obra son os clásicos contos da visita da morte, un tipo de historias tradicionais que teñen un esquema semellante: un personaxe topa coa morte que lle ven anunciar o seu final inminente, de maneira que o aludido trata de enganala e librarse do seu lúgubre designio, sen éxito. Na tradición galega, este tipo de contos tenden a estar revestidos por unha pátina de humor e retranca que relativizan o seu carácter dramático.

A obra é un recoñecemento a Carlos “O Xestal” (A Coruña, 1933-1993), o coñecido humorista galego que popularizou “Apaga o candil”, superventas de cintas de casete en las décadas de los 60 y los 70, guionista en programas de televisión e fundamentalmente un portentoso contador e cantador de historias tipicamente galegas con retranca e con certo carácter reivindicativo. Entre outras cousas, foi tamén un grande estudioso da música tradicional galega, impulsor de diferentes formacións.

A CAMPAÑA DE ESCAVACIÓN NO SARRIDAL DESCOBRE OS RESTOS DUNHA FORXA DA ÉPOCA GALAICO ROMANA

O equipo de Axa Arqueoloxía vén de rematar unha nova campaña de escavación no Castro Sarridal, con financiación da Dirección Xeral de Patrimonio, que deixou interesantes achados. En concreto o descubrimento de varios elementos dunha forxa castrexa da época galaico romana: parte dos muros, a fragua, unha base de pedra que faría as veces de macho e as pías nas que estaría a auga para enfriar as pezas. Emilio Ramil, o director dos traballos arqueolóxicos, confirmou que en moitos xacementos galegos apareceron restos que confirmaron este tipo de actividade industrial, pero que esta é a primeira ocasión en que se poden presentar estas estruturas.

A zona da forxa está situada entre a muralla perimetral do castro e o cantil, fóra do recinto residencial. Na escavación apareceron restos de opus signinum, un pavimento romano, así como pezas de tella que indican a existencia dunha cuberta a dúas augas nesta área de traballo. Este pavimento está sobre outra capa de empedrado propiamente castrexo na que aparecen vestixios de foxas que xa eran empregadas para recoller a auga, así como escorias que confirman que tamén antes esta parte do asentamento era utilizaba para forxar ferramentas de ferro antes da chegada dos romanos. Entre os achados están tamén pedras anfibolitas que son altamente refractarias e que se empregarían para expor ao lume.

Esta nova campaña de escavacións confirmou unha vez máis a importancia do xacemento do Castro Sarridal. Desde o ano 2017, no que comezaron os traballos, sucedéronse as campañas financiadas polo Concello de Cedeira e a Dirección Xeral de Patrimonio. Confirmouse a través dos sucesivos achados que este foi un lugar habitado desde o século III ou IV a.C. ata o IV ou V d.C. Nel apareceu a quinta pedra formosa descuberta en Galicia –o que sería un balneario castrexo-, unha moneda romana e as devanditos elementos dunha ferrería prehidráulia, entre outros elementos.

O CONCELLO DE CEDEIRA CONTARÁ CON APADER PARA O ACENDIDO DAS LUCES DE NADAL O VINDEIRO DÍA 5

O Concello de Cedeira celebrará o vindeiro martes día 5 o acto de acendido das luces de Nadal. Ás 18.15 horas aproximadamente iluminarase a árbore situada na praza do Peixe, un dos elementos máis destacados dunha decoración que, un ano máis, tenta chegar a máis rincones das parroquias e que vai contribuír a dinamizar a campaña de vendas do comercio e a hostalería local. Segundo explicou o concelleiro Noel López, no acto darase o protagonismo a un grupo de persoas usuarias de Apader, que intervirán amosando unha vez máis o seu forte vencello con Cedeira. Tamén haberá música, a cargo da profesora de violín Florencia Pagnucco e varias das súas alumnas.

De novo este ano haberá un teito de luz nas rúas principais do casco vello e na alameda e colocaranse elementos destacados nas prazas do Peixe e Marieta, a devandita árbore e un reno no que a xente poderá subirse, así como noutros espazos do municipio. Cómpre destacar que a decoración da zona vella completarase este ano con elementos realizados co materiais de refugallo no proxecto “Tecendo redes” da Concellería de Igualdade.

O goberno local adiantou algúns aspectos da programación de Nadal deste ano, entre os que está a recuperación do campamento “Concilia”, un programa que ofrecerá actividades a nenos e nenas durante as mañás do período vacacional para facilitar a conciliación de vida laboral e familiar. O Polideportivo Municipal acollerá de novo unha amplísima variedade de actividades e xogos –con inchables, realidade virtual e un longo etcétera- para garantir alternativas de ocio baixo abrigo en horario de tarde. A esta oferta sumaranse tamén dúas festas acuáticas na piscina municipal.

Tamén informa o goberno municipal que se vai organizar de novo unha Festa de Fin de Ano na Praza Roxa e outra para Reis, dado o éxito que tivo a do pasado ano –cando se trasladara para esa data a que non puido celebrarse o 31 polo temporal-.

Cómpre resaltar tamén que coa chegada das luces de Nadal comeza a campaña de vendas navideñas do comercio cedeirés, que unha vez máis vai desenvolver co apoio do Concello o sorteo de máis de 3.000€ en premios. Os establecementos comezarán a repartir a vindeira semana entre os seus clientes as rifas coas que poderán entrar no sorteo. A práctica totalidade dos negocios de Cedeira adoitan participar nesta campaña, durante a que tamén decoran os seus locais con luces, alfombras vermellas e outros elementos.