Skip to content Skip to left sidebar Skip to footer

CULTURA

O CENTRO DE OCIO XUVENIL DE CEDEIRA RECIBE UNHA MEDIA DIARIA DE ENTRE 25 E 30 MOZOS E MOZAS

O Centro de Ocio Xuvenil tense consolidado desde a súa reapertura tras a pandemia, o pasado mes de abril, como un punto de referencia en Cedeira para rapaces e rapazas de entre 12 e 18 anos. Unha media de entre 25 e 30 mozos e mozas achéganse nas tardes dos venres, sábados e domingos a este lugar de encontro no que se asentou xa unha dinámica participativa e de convivencia da que van xurdindo interesantes propostas.

Unha educadora social e dinamizadora xuvenil, Nerea P. Carballeira, é a encargada de coordinar as actividades do Centro de Ocio Xuvenil e programalas atendendo ás inquitudes da rapazada. Tal como ela explica, o Centro de Ocio Xuvenil é un espazo de ocio libre, no que hai espazo aberto con sofás e mesas e tamén outra sala polivalente na que poden realizar tarefas en grupos máis reducidos. Os mozos e mozas teñen á súa disposición diferentes xogos de mesa, un billar, un futbolín e mesmo unha pequena “sala de música” equipada cun micro, teclado, un ordenador e un pad para facer gravacións cantando ou tocando algún instrumento.

O Centro abre de venres a domingos, entre as cinco e as oito da tarde, e o ocio discorre a ao seu propio criterio e tamén con actividades abertas a todo o conxunto de usuarios e usuarias e que parten das inquedanzas que eles mesmos expresan. Cada dous ou tres meses, a técnica convoca unha mesa de participación á que os rapaces e rapazas que queren van para facer as súas aportacións e expor cales son os temas que máis lles atraen. O grao de participación é moi bo, según conta Nerea P. Carballeira, que apunta que en xeral lles gustan moito os deportes e tamén senten interese pola igualdade, a música e, o que máis, o medio ambiente.

Atendendo ás suxestións da mocidade, o Centro de Ocio Xuvenil ten organizado campionatos de futbolín, de parchí ou de Jenga, por exemplo, actividades ás que se apuntan mozos e mozas de todas as idades, desde os 12 aos 18 e que son unha excelente oportunidade de interacción. O cine e a fotografía son tamén afeccións que a xuventude cedeiresa quere cultivar, polo que se promoveu unha saída para facer fotografías polo río Condomiñas coa colaboración da asociación ARCE, que aproveitou para explicar o seu traballo de recuperación do cauce fluvial.

Desa dinámica participativa xurdiu un obradoiro de graffiti que tivo unha alta participación e tamén o obradoiro de reciclaxe textil que se celebrou a pasada fin de semana, no que se esgotaron as oito prazas dispoñibles con catro rapaces e catro rapazas. As dúas mulleres emprendedoras de Longa Vida explicaron a contaminación que produce a industria da moda e os efectos que ten a fast fashion sobre o medio ambiente, para a continuación guialos na realización dun portamóbiles reutilizando teas xa usadas.

Nerea P. Carballeira explica que se organiza unha actividade ao mes, máis ou menos, e que para este novembro teñen prevista unha merenda-coloquio con motivo do 25N, para falar da violencia na adolescencia. Contarán coa presencia do equipo de igualdade do IES Punta Candieira. Un pouco máis adiante, o 10 de decembro, desenvolverán un torneo de ping-pong coa mesa que antes estaba no polideportivo municipal e que o Concello lles achegou.

A música é parte importante da vida no Centro de Ocio Xuvenil, como non podía ser doutra maneira en Cedeira. A coordinadora explica que cada día pon un fío musical no local, procurando fuxir dos estilos máis de moda entre a rapazada para que coñezan outros grupos e artistas, outros ritmos. Con esta proposta, bautizada como “Hoxe soa…”, os mozos e mozas van descubrindo e gostando de músicas que non forman parte habitual do circuíto das súas idades.

Para o vindeiro 17 de decembro teñen programada a última mesa de participación do ano, na que haberá ocasión para facer balance das últimas actividades e, sobre todo, para debullar novas ideas que darán vida ao Centro de Ocio Xuvenil nos seguintes meses.

O goberno local está moi satisfeito co funcionamento do Centro de Ocio Xuvenil e co traballo que está a desenvolver Nerea P. Carballeira, en palabras do alcalde, Pablo Diego Moreda Gil, “unha persoa moi responsable e comprometida coa mocidade, que está a impulsar unha dinámica moi boa e abrindo novas alternativas para o tempo de lecer da nosa xuventude”.

O GASTROBAR O AMANEXO GAÑA A TERCEIRA EDICIÓN DO CERTAME DE TAPAS DE OUTONO DO CONCELLO DE CEDEIRA

O gastrobar O Amanexo foi o gañador do III Concurso de Tapas de Outono, convocado polo Concello de Cedeira para contribuír a dinamizar a hostalería da vila nun mes, o de novembro, tradicionalmente frouxo para o sector. Desde o goberno local estímanse unhas 5.000 tapas vendidas nos oito establecementos participantes e destacan o bo ambiente co que se viviu o certame, con pandillas percorrendo os establecementos e gozando coa creatividade, a orixinalidade e a calidade da cociña local.

A concelleira de Turismo, Carmela Prieto, e o técnico de Cultura do Concello, Quique Vázquez, entregaron onte ao cociñeiro do Amanexo, Miguel López López, o diploma que o acredita como o gañador do certame. O seu establecemento, que xa resultada gañador da primeira edición, vendeu do venres ao domingo un total de 1.250 tapas. O seu petisco estaba elaborado con rabo de boi desosado, feito no seu zume, con cantharellus, tubaeformis, parmentier e confitura de cabaza, cristal de grelo e bolecha de castaña.

A segunda tapa máis votada polo público foi a do Mesón O Mesón e a terceira a do Bar O Mástil. Emitíronse 300 votos –cada un deles garante que a persoa probou cinco petiscos- e ademais dos xa nomeados participaron no certame a Taberna Praza do Peixe, o Restaurante Brisa, a Taberna A Xunqueira, a Cervexaría La Central e a Pizzería Sheriff.

Desde o Concello de Cedeira felicitan a todos os establecementos participantes, que amosaron un amplio abano de opcións, ao tempo que animan aos negocios de hostalería que non o fixeron este ano a inscribirse o ano que vén para que a oferta sexa aínda máis rica e variada.

Entre as persoas que emitiron o seu voto, e que exerceron polo tanto de xurado, sorteouse unha cea para dúas persoas no local gañador, O Amanexo.

O CENTRO DE OCIO XUVENIL PROMOVE PARA ESTE SÁBADO UN OBRADOIRO DE RECICLAXE TEXTIL E CONSUMO SOSTIBLE

O Centro de Ocio Xuvenil de Cedeira organiza para este sábado un obradoiro gratuíto de reciclaxe textil e consumo sostible no que rapaces e rapazas aprenderán a darlle unha nova vida útil a tecidos procedentes de roupa usada. As ferrolás Antía Orjales e Helga Filgueira, impulsoras da marca Longa Vida Handmade, serán as encargadas de desenvolver esta actividade este sábado entre as 17.00 e as 19.00 horas. O obradoiro está dirixido a mozos e mozas de entre 12 e 18 anos e é precisa a inscrición previa, no mesmo Centro de Ocio Xuvenil ou ben a través do mail coxcedeira@gmail.com.

A produción textil é a segunda máis contaminante do planeta por detrás da industria petroleira. O sector é responsable, a través dos tintes fundamentalmente, do 20% da contaminación mundial de auga potable. De aí que sexa importante concienciar sobre o impacto que a “fast fashion” ten sobre o planeta e aprender outros modelos de consumo que pasan pola reutilización e a reciclaxe.

A empresa Longa Vida Handmade é precisamente unha iniciativa de recuperación e transformación de prendas de roupa en novos artigos de moda, ben sexa unha totebag, un coleteiro, un estuche, un portamóbil… O obradoiro que as dúas emprendedoras de Longa Vida van desenvolver en Cedeira proporcionará aos rapaces e rapazas participantes todos os materiais necesarios para darlle saída as súas creacións. Desde as máquinas de coser ata os tecidos, marcadores, agullas, tesoiras, fíos, etc.

Por outra parte, a Banda de Música Vila de Cedeira vai festexar este sábado a patroa da música, Santa Icía, cun concerto de solistas. O Auditorio Municipal acollerá o recital, no que tocarán en solitario diferentes instrumentistas da formación baixo a dirección de Eduardo Mallén Gandel. A cita, de entrada libre, será ás 20.00 horas.