Skip to content Skip to left sidebar Skip to footer

SERVICIOS SOCIAIS

O CONCELLO DE CEDEIRA DISTRIBÚE ESTES DÍAS UN NOVO NÚMERO DO BOLETÍN INFORMATIVO AS7PARROQUIAS

O Concello de Cedeira ten xa colgado na súa web e está a distribuír polas entidades veciñais e sociais do municipio un novo número do boletín informativo As7Parroquias, ferramenta de transparencia que traslada á cidadanía o traballo do goberno local. Nesta edición, que fai a número 24, faise balance das festas e eventos lúdicos e deportivos de este verán e repásanse, como é habitual, as obras en curso ou recentemente executadas. A consecución do título de Xeoparque Cabo Ortegal ocupa tamén un espazo destacado, subliñando o vieiro de oportunidades que representa entrar neste importante club da Unesco de lugares xeoloxicamente únicos.

A publicación fai un percorrido polos eventos deste verán, desde as verbenas e demais actos das Festas da Patroa ata a Festa do Percebe e os encontros culturais e deportivos máis destacados, citas que tiveron en común sempre unha alta participación e o bo ambiente. Dase conta tamén no boletín da nova distribución de responsabilidades e a composición das comisións dentro do goberno local, despois do acordo que acadaron o PSOE e o BNG no mes de xullo.

A visita ás obras que a Deputación está a acometer na zona do Rego de Tide para mellorar o trazado da estrada provincial que vai a San Andrés, así como a aprobación do Plan Contra Incendios Forestais de Cedeira están tamén neste novo número de As7Parroquias. O mesmo que o recoñecemento ao Xeoparque Cabo Ortegal e a recente reunión que mantieron o alcalde, Pablo Diego Moreda Gil, e o concelleiro de Patrimonio, José Antonio Rodríguez, coa directora xeral de Patrimonio Cultural da Xunta de Galicia, María del Carmen Martínez Insua, para tratar os próximos pasos a dar na escavación arqueolóxica do Sarridal.

No capítulo de obras, As7Parroquias repasa proxectos xa executados ou a piques de rematar, como son a ampliación do saneamento das Pontigas, a senda peonil do camiño de Cordobelas, o arranxo das pistas de pádel ou a renovación da pista multideporte e o marcador do Polideportivo, así como outras que están en proceso de contratación como o cambio das caldeiras da piscina municipal e do ascensor do Auditorio, a ampliación do ximnasio e a colocación de novo céspede artificial no campo do Beco, entre outras. Infórmase tamén da solicitude de fondos, a través de diferentes programas supramunicipais, para acometer outras actuacións, como por exemplo a dixitalización da piscina municipal para que entre nunha rede de instalacións “intelixentes” ou a creación dunha nova zona verde e de lecer na rúa Silva.

A contraportada desde número está adicada ao Cedeira Basket Club, unha entidade que está a traballar polo rexurdimento deste deporte na localidade despois de anos nos que a súa presencia decaera. O éxito do campionato 3×3 que organizou este verán é unha proba do éxito que está a ter a entidade no seu empeño.


VER PDF Boletín as 7 parroquias nº24

O CONCELLO LICITA O CAMBIO DO ASCENSOR HIDRÁULICO DO AUDITORIO POR UN ELÉCTRICO, MÁIS EFICIENTE E FIABLE

O Concello de Cedeira acaba de publicar na Plataforma de Contratación do Sector Público o expediente de licitación para o cambio do ascensor do Auditorio Municipal, unha actuación que ten un presuposto de 46.566€ (IVE incluído). É unha actuación que o goberno local vai financiar co Fondo de Compensación Ambiental, segundo informou o alcalde, Pablo Diego Moreda Gil.

O proxecto consiste en sustituír o actual ascensor hidráulico por un eléctrico, máis eficiente enerxeticamente e máis fiable, que evitará as frecuentes averías e fallos que ten agora o elevador. Trátase dun elemento esencial para garantir a accesibilidade no inmoble, que ten en total seis andares e un uso intensivo polas moitas actividades que alí se desenvolven, entre elas as clases da Escola de Música.

Gran parte dos problemas que rexistra o equipamento actual son resultado das inundacións que se producen no soto do inmoble cando vai moita choiva. O novo proxecto anula o acceso ao elevador desde este andar, aproveitando o oco para instalar alí a nova maquinaria.

Será un ascensor máis eficiente, con menos consumo de enerxía e que polo tanto aforra contaminación á atmósfera. Ademais, polas súas características e polo rigoroso control de calidade que ten o novo modelo eléctrico, o mantemento vai ser máis sinxelo e as inspeccións periódicas servirán para predicir problemas e garantir o seu uso sen interrupcións. Será tamén máis rápido que o actual e con máis capacidade, de ata oito persoas.

As empresas interesadas en presentar ofertas poderán facelo ata o día 6 de setembro. O prazo de execución é de dous meses.

MÁIS DE 450 NENOS E NENAS, NOS CAMPAMENTOS ORGANIZADOS POLO CONCELLO E DIFERENTES ENTIDADES

O Concello de Cedeira continúa outro ano máis promovendo a conciliación familiar e laboral a través de campamentos e actividades para nenos e nenas, que se complementan cos organizados por diferentes agrupacións e clubes da vila. Este verán o número de participantes segue a aumentar, cos campamentos completos a maior parte do tempo.

O Concello promove un Campamento Urbano para menores de entre 5 e 12 anos, que se está a realizar nas instalacións do CEIP Nicolás del Río. Distribúese en quendas quincenais e mensuais, con 80 participantes no mes de xullo (36 na primeira quincena e 44 na segunda), e 45 este mes de agosto (22 na primeira quincena e 23 na segunda).

As propostas que se desenvolven ao longo da mañá, de nove a dúas entre o luns e o venres, son do máis variado. Moitas delas van dirixidas a todos os nenos e nenas e outras están adaptadas aos diferentes grupos de idades. Entroido de verán, olimpíadas, xornada con inchables, kayak, a visita ao museo Mares, xogos tradicionais e un longo etcétera forman parte do divertido día a día neste campamento.

Pero tamén, un ano máis, outras asociacións e clubs da localidade organizan os seus programas estivais, una iniciativa que o goberno local agradece pola súa contribución á conciliación da vida laboral e familiar durante o verán. Os campamentos son moi variados, propoñendo desde actividades deportivas a xogos de diversa índole, promovendo en todo caso o entretemento á vez que os hábitos saudables e a aprendizaxe de valores.

Á variada oferta que artellan as diferentes entidades da vila sumouse este ano por primeira vez o campamento de verán da Street Dance School, unha escola de bailes urbanos que consolidou a súa andadura nos últimos anos e que, de feito, vai comezar a competir neste 2023. Entre 50 e 60 nenos e nenas de 6 a 14 anos pasaron polas quendas quincenais do seu campamento, no que ademais de bailar houbo moitas outras actividades: rutas pola Capelada, por Punta Candieira, unha mañá de pesca, sesións de natación e xogos na piscina…

No eido deportivo, o Club Natación Cedeira está a desenvolver o seu curso de verán, ao que asisten entre 130 e 140 nenos e nenas de entre 4 e 16 anos. Moitos dos participantes xa eran membros do clube, pero arredor de 60 son novas incorporacións. Natación, triatlón, xogos e rutas de sendeirismo son as actividades que están a desenvolver, e coas que pretenden atraer a novos talentos que queiran continuar durante o curso escolar.

Pola súa banda, o Cedeira SD remata esta semana o seu campamento, ao que asistiron máis de 70 rapaces no mes de xullo, e arredor de 40 estas semanas de agosto, de entre 7 e 13 anos. Ademais de fútbol, realizaron diferentes actividades, mesturando xogos populares e tradicionais con outros máis innovadores, como o seguimento da King´s League (evento de fútbol a través da plataforma Twitch).

O Cedeira Basket Club está organizando quedadas de baloncesto para menores de entre 8 e 13 anos durante as mañás no parque do Floreal. Son actividades informais e gratuítas, que planean con pouca antelación e das que avisan polas súas redes sociais.

Por outra parte, a asociación sociocultural Sobre Rodas está a desenvolver desde o 26 de xuño coas súas colonias de verán, nas que os nenos e nenas de entre 2 e 12 anos realizan diferentes manualidades e xogos. Esta entidade, que leva máis de dez anos organizando campamentos, está orientada á integración e conta con monitores especializados. Debido á importante demanda de prazas do pasado verán (houbo lista de espera), este ano decidiron aumentar o número de monitores para poder ampliar o de participantes. Continuarán ata o 8 de setembro, e quedan só dúas prazas dispoñibles para este período.