Skip to content Skip to left sidebar Skip to footer

SERVICIOS SOCIAIS

Cedeira pon en marcha o programa de envellecemento activo, que inclúe clases de zumba, memoria e ximnasia terapeútica

CEDEIRA PON EN MARCHA O PROGRAMA DE ENVELLECEMENTO ACTIVO, QUE INCLÚE CLASES DE ZUMBA, MEMORIA E XIMNASIA TERAPEÚTICA

O Concello de Cedeira, a través da Concellería de Xuventude, Ensino e Igualdade, pon en marcha un ano máis as actividades orientadas ao colectivo da Terceira Idade. De feito, esta mesma semana xa daban comezo as clases de zumba, que se imparten os luns, martes e xoves na sala Áncora, a partir das 11.00 horas.

Cara á segunda quincena do presente mes, a responsable da área Manuela López Rodríguez, informou da posta en funcionamento do obradoiro de memoria e mesmo tamén do de ximnasia terapeútica. Este ano, como xa se fixo o curso pasado, estas últimas actividades impartiranse na vila de Cedeira e tamén nas parroquias. Estes días as técnicas do departamento están a traballar na organización do calendario.

López Rodríguez recordou así mesmo que está abierto o prazo de inscrición para aquelas persoas que este ano desexan asistir por primeira vez ás clases, mentres que para as veteranas non é necesario dito trámite. En calqueira caso, as oficinas de Servizos Sociais serán a referencia tanto para facer as reservas de praza como para recibir información sobre o programa de envellecemento activo.

Cedeira instalará dous novos parques infantís, un no colexio Nicolás del Río e outro na escola infantil

CEDEIRA INSTALARÁ DOUS NOVOS PARQUES INFANTÍS, UN NO COLEXIO NICOLÁS DEL RÍO E OUTRO NA ESCOLA INFANTIL

O Concello de Cedeira creará antes de que acabe o ano dous novos parques infantís. A súa execución dará comezo nuns días no colexio Nicolás del Río e na escola infantil. Hoxe mesmo a alcaldesa en funcións, María Xosé Rodríguez Pérez, acompañada por técnicos municipais e responsables da empresa adxudicataria, visitaba as zonas nas que se colocarán, ademais dun chan específico para este tipo de instalacións, un total de cinco xogos: tres no centro escolar e dous no da escola infantil.

O orzamento de adxudicación ascendeu a 30.050, 87 euros e o prazo de realización dos traballos quedou fixado en oito semanas. A obra será executada pola empresa Oziona Soluciones de Entretenimiento SL.

Rodríguez Pérez explicou que, no caso do Nicolás del Río, o proxecto inclúe ademais a instalación de dúas portas: unha para limitar o espazo de xogo do escolar e outra para evitar que os nenos poidan saír correndo á estrada que existe nas inmediacións do colexio.

O Concello colabora con AFAL Ferrolterra nunha xornada divulgativa sobre o alzheimer

O CONCELLO COLABORA CON AFAL FERROLTERRA NUNHA XORNADA DIVULGATIVA SOBRE O ALZHEIMER

O Concello de Cedeira colabora con AFAL Ferrolterra na celebración dunha xornada divulgativa, enmarcada nos actos do Día Mundial do Alzheimer, que terá lugar mañá martes na praza Roxa, ás 19.00 horas. Será neste entorno urbano no que o equipo de AFAL instalará unhas mesas informativas e paneis para sensibilizar á sociedade e, tamén, responder ás súas dúbidas sobre a enfermidade e o labor que se vén levando a cabo desde a asociación.

Posteriormente, a actividade trasladarase á sala Áncora, na que as técnicas de AFAL impartirán unha charla na que falarán do alzheimer e dos obradoiros para enfermos que leva a cabo a asociación no municipio de Cedeira coa axuda da administración local, tal e como recordou a concelleira de Servizos Sociais, Manuela López. Esta responsable sinalou que “seguimos intentando axudar en todo o que faga falla, non só cara aos enfermos senon tamén aos familiares dos doentes”. Estes talleres están abertos á participación de todas as persoas afectadas. Para iso, tan só deben poñerse en contacto con AFAL (na asociación rúa Río Castro, 43-45 baixo ou no teléfono 981 37 06 92) ou co departamento municipal de Servizos Sociais de Cedeira.

Neste sentido, a presidenta da entidade, Ana María López, quixo agradecer a implicación do Concello, tanto na organización dos obradoiros como da propia xornada de mañá, e invitou a todo o mundo a achegarse ata a praza Roxa e coñecer a asociación.

As xornadas continuarán en Meirás (Valdoviño), Ares e Pontedeume. Son estas, xunto a Cedeira, as vilas nas que AFAL está a desenvolver talleres para persoas afectadas á marxe dos centros de día que xestiona na cidade de Ferrol.