MEDIO AMBIENTE

O Goberno Municipal chama á responsabilidade de cada veciño/a para protexerse da covid-19 e tamén protexer aos demais

Agosto é un mes que a calquera persoa de Cedeira evócalle reunións, comidas en familia e cos amigos e amigas, celebracións, festas… Como todos sabemos, por responsabilidade e compromiso coa saúde da veciñanza, este ano a Corporación Municipal decidiu prescindir das actividades que caracterizan as festas de Cedeira, dentro do paquete de medidas aplicadas para reducir a incidencia da Covid-19 na nosa vila.

Dende o Concello de Cedeira e seguindo as recomendacións e normativa en materia de saúde pública dos organismos competentes, vémonos na obriga de pedirvos a todas e todos nestas datas tan emotivas que escollades ter unha actitude responsable e evitedes as grandes celebracións que poidan poñer en perigo as persoas que máis queredes, as que máis achegadas están a cada un e unha de vós.

Queremos tamén informarvos que a Xunta de Galicia mediante a Resolución de 17 de xuño de 2020 da Secretaría Xeral Técnica da Consellería de Sanidade prohibe expresamente o botellón, e dicir, o consumo de alcol en espazos públicos.

No caso da Xira, pola imposibilidade de controlar as ocupacións e garantir que a actividade se desenvolva coas medidas óptimas de seguridade, este ano queda suspendida e recomendámosvos a todos e todas que non acudades ao tradicional xantar que se celebraría o 17 de agosto.

Non debemos esquecer as medidas de seguridade nun momento onde a saúde persoal e comunitaria debe ser a nosa prioridade e por compromiso coa veciñanza cada un de nós ten a responsabilidade de protexerse para tamén protexer aos demais.

Chegarán novas festas, bailaremos e cantaremos con quen escollamos facelo, mais este ano a prudencia é a mellor compaña que podemos ter.

Cedeira sinaliza os sumidorios co lema “A ría comeza aquí. Axuda a mantela limpa” para evitar verteduras ao mar

O Concello de Cedeira mantén activa a campaña de información sobre a importancia dun uso responsable da rede de sumidoiros na calidade ambiental na ría. Esta iniciativa deu lugar onte á sinalización dalgúns dos sumidoiros situados nas zonas peonís e concorridas con placas informativas co fin de recordar aos transeúntes que nese punto comeza o mar. “A ría comeza aquí. Axuda a mantela limpa” é o lema desta campaña.

O alcalde, Pablo Diego Moreda Gil, sumouse a esta acción coa colocación dunha placa no rexistro situado na praza do Concello. No acto estivo acompañado da técnica de Medio Ambiente, Ana Piñeiro, e dun traballador municipal.

A área urbana de Cedeira conta cunha canalización de augas pluviais que circulan pola rede para acabar directamente na desembocadura do río Condomiñas e mesmo na ría, “de aí a importancia de adoptar condutas que axuden a conservar a noso entorno”, tal e como apuntou o rexedor municipal.

Desde o executivo local considérase fundamental recordar sempre que o lixo que non se deposita correctamente ten moitas probabilidades de chegar ao mar e acabar nas praias, “unha contaminación que provoca un dano na vida dos mares case irreversible”, aseguran.

O Concello recorda que xestos habituais como verter a auga dos fregados ou tirar ao chan cabichas, envoltorios e outros residuos teñen consecuencias negativas no medio ambiente e anima á veciñanza e visitantes a depositar cada residuo no colector axeitado, usar as papeleiras e baleirar a auga sucia no inodoro para un correcto tratamento e eliminación, accións que se agradecen porque “cun pequeno xesto, axudaremos a manter limpa a nosa ría”.

Para máis información podese descargar o tríptico na seguinte ligazón:

Descarga tríptico Campaña por un uso responsable dos sumidoiros

Unha moeda do século I D.C. sae á luz no remate da sexta campaña de escavacións no Castro do Sarridal

O castro do Sarridal de Cedeira volve sorprender aos expertos tanto pola súa singularidade construtiva como polos segredos que aínda esconde. O último é unha moeda romana, realizada en bronce, e moi posiblemente do século I d.C. O proceso de restauración ao que está sendo sometida verificará ou arroxará novos datos sobre a ocupación dun asentamento de orixe castrexo.

En canto á construción, o arqueólogo e director da sexta campaña de escavacións no xacemento xa rematada, Emilio Ramil, apuntou que “non é nada habitual atopar nunha edificación destas características un torreón exterior á muralla sobre o foxo”. Esta singularidade obedece, segundo Ramil, á necesidade de reforzar o sistema defensivo do castro. Os traballos tamén deron como resultado a recuperación integral do torreón -cuxa forma finalmente resultou ser ovalada e non rectangular como se tiña apuntado inicialmente- ademais de traballos no bastión, na muralla e no enlousado exterior da antecámara.

O alcalde de Cedeira, Pablo Diego Moreda Gil, considerou que “seguramente aínda nós están a esperar moitos máis segredos nun xacemento que virá a completar a historia da localidade e no que xa foi atopada a quinta pedra formosa localizada en Galicia”.

Neste sentido, o rexedor municipal adiantou que a actuación que acaba de rematar e que estivo financiada polo Concello terá continuidade en próximas datas cunha nova intervención que, neste caso, será asumida pola Dirección Xeral de Patrimonio da Xunta e cuxo custo é moi similar ao destinado polo Concello, uns 15.000 euros. Con cargo a esta nova intervención levaranse a cabo tarefas de consolidación das estruturas que saíron ao luz con motivo dos traballos executados na que xa foi a sexta campaña de escavación levada a cabo no castro do Sarridal.