MEDIO AMBIENTE

O CONCELLO DE CEDEIRA INSISTE NA NECESIDADE DE MELLORAR OS RESULTADOS DA RECOLLIDA SELECTIVA

O Concello de Cedeira está a levar a cabo unha campaña de sensibilización entre a veciñanza para apostar pola separación de lixo en orixe coa fin de mellorar os resultados que se están a dar e de tratar de rebaixar costes á administración local.

Esta iniciativa consiste na distribución en comercios, entidades e vivendas dunha publicidade na que se recorda que hai que separar ben para reciclar mellor e que a colaboración de todos é un xesto solidario a prol da comunidade e do medio ambiente.

Esta medida tamén coincidiu coa celebración a pasada fin de semana dunha nova campaña de limpeza do río Condomiñas, a terceira que se realiza en dous meses. A pesar das dúas anteriores, o labor voluntario de veciños e socios da Asociación Amigos dos Ríos volveu a sacar á luz tubos de escape, tambores de lavadoras e moitos máis obxectos enferruxados que ata agora se atopaban no leito do Condomiñas. Desde a concellería de Medio Ambiente anuncian que haberá máis iniciativas como as xa realizadas.

O CONCELLO DE CEDEIRA DENUNCIA ANTE O SEPRONA UN NOVO VERTIDO NO RÍO CONDOMIÑAS

O Concello de Cedeira vén de denunciar ante o Seprona (Servizo de Protección da Natureza) un novo vertido incontrolado no río Condomiñas. Os feitos remóntanse ao pasado luns cando, sobre as sete da tarde e a escasos metros da desembocadora do Condomiñas, apareceu “unha gran mancha de escuma de cor parduzca, na que destacaban unhas bolas de tamaño considerable”, segundo se fai constar no escrito correspondente.

No mesmo tamén se barallan dúas posibilidades á hora de buscarlle unha explicación ao feito, ou ben trátase dunha descarga dunha fosa aéptica, “dubidoso polo excesivo do seu tamaño para proceder dun domilicio concreto”, ou a súa procedencia podería estar na EDAR.

Co fin de clarexar os feitos, os responsables municipais piden ao Seprona que investigue a orixe da mancha e depure responsabilidades, ao tiempo que recordan que non é a primeira vez que ocorren feitos como os agora denunciados e se deixa aberta a posibilidade de que sexan os propios interesados os que pasen a desmentir a súa posible implicación nos feitos co fin de evitar suspicacias.