Skip to content Skip to left sidebar Skip to footer

NOVAS

I CERTAME DE RELATOS CURTOS EU FUN DE VIVO

Ata o vindeiro 10 de maio está aberto o prazo de presentación de traballos para o “I Certame de Relatos Curtos Eu Fun de Vivo”, convocado polos promotores do proxecto do mesmo nome, que busca promocionar o santuario de Santo André de Teixido e as tradicións ligadas ao mesmo. O tema dos relatos é Santo André e os seus camiños de peregrinación e o premio, para o gañador ou gañadora, será unha visita guiada para catro persoas, un lote de produtos promocionais e de “sanandreses” e un diploma.

O relato pode estar en galego ou castelán e terá entre dúas e dez páxinas, con letra tipo Arial de 11 puntos e un interlineado de 1,5. Ten que ser orixinal e inédito e presentarse baixo pseudónimo, a través do correo electrónico: info@eufundevivo.es.

Máis información: https://www.eufundevivo.com/

OS NOVOS ORZAMENTOS MUNICIPAIS PROTAGONIZAN O NOVO NÚMERO DO BOLETÍN “AS7PARROQUIAS”

O Concello de Cedeira vai distribuír estes días entre a veciñanza un novo número, o 17, do boletín “As7Parroquias”, no que informa das principais novidades e logros do traballo municipal nos últimos dous meses. Desta volta o boletín destaca na súa portada a aprobación dos novos orzamentos municipais, que poñen o acento no eido dos servizos sociais, e tamén o compromiso acadado pola Consellería de Sanidade da Xunta de Galicia para retomar as xestións e poñer en marcha a ampliación do Centro de Saúde de Cedeira.

“As7parroquias” detalla tamén as obras que están en marcha ou que remataron recentemente, e os principais proxectos de investimento que se consignaron nas contas de 2021. Informa tamén da reserva de 70.000 euros para lanzar unha nova convocatoria de axudas municipais a empresas e autónomos, coa finalidade de paliar os efectos da pandemia, así como dos fondos adicados a sufragar actividades do tecido asociativo da vila.

A aprobación por primeira vez na historia de Cedeira duns orzamentos participativos, que se elaboraron por parte do alumnado de 4º da ESO do IES Punta Candieira, e a moción unánime dos grupos municipais para cubrir o patio do Areal do CEIP Nicolás do Río son outros dos temas que aborda o boletín, no que tamén se dá conta da finalización da redacción do proxecto para a recuperación integral do curso medio do río Condomiñas.

A contraportada de “As7Parroauias” está adicada, como é habitual, ao tecido asociativo da localidade. Nesta ocasión ofrece unha reportaxe sobre ABAC, a Asociación de Benestar Animal de Cedeira, e o seu traballo polo control das colonias de gatos.

DESCARGA PDF Boletín “As7Parroquias”

O “PINOCHIO” DE GHAZAFELHOS CHEGA ESTE SÁBADO A CEDEIRA

O Auditorio de Cedeira acollerá este sábado, ás 19.00 horas, a función de teatro infantil “Pinochio”, a cargo da compañía Ghazafelhos, que fai unha versión libre do clásico con títeres, teatro actoral e música en directo. A obra está dirixida a nenos e nenas a partir de cinco anos.

As persoas interesadas teñen que reservar localidades previamente a través do correo electrónico enrique.vazquez@cedeira.gal ou ben por whatsapp no número 649 876 614, en horario de 09.00 a 14.00 horas, indicando o nome das asistentes e un número de teléfono de contacto. O prezo da entrada é de 2,50€.