Skip to content Skip to left sidebar Skip to footer

SERVIZOS

OS NOVOS ORZAMENTOS MUNICIPAIS PROTAGONIZAN O NOVO NÚMERO DO BOLETÍN “AS7PARROQUIAS”

O Concello de Cedeira vai distribuír estes días entre a veciñanza un novo número, o 17, do boletín “As7Parroquias”, no que informa das principais novidades e logros do traballo municipal nos últimos dous meses. Desta volta o boletín destaca na súa portada a aprobación dos novos orzamentos municipais, que poñen o acento no eido dos servizos sociais, e tamén o compromiso acadado pola Consellería de Sanidade da Xunta de Galicia para retomar as xestións e poñer en marcha a ampliación do Centro de Saúde de Cedeira.

“As7parroquias” detalla tamén as obras que están en marcha ou que remataron recentemente, e os principais proxectos de investimento que se consignaron nas contas de 2021. Informa tamén da reserva de 70.000 euros para lanzar unha nova convocatoria de axudas municipais a empresas e autónomos, coa finalidade de paliar os efectos da pandemia, así como dos fondos adicados a sufragar actividades do tecido asociativo da vila.

A aprobación por primeira vez na historia de Cedeira duns orzamentos participativos, que se elaboraron por parte do alumnado de 4º da ESO do IES Punta Candieira, e a moción unánime dos grupos municipais para cubrir o patio do Areal do CEIP Nicolás do Río son outros dos temas que aborda o boletín, no que tamén se dá conta da finalización da redacción do proxecto para a recuperación integral do curso medio do río Condomiñas.

A contraportada de “As7Parroauias” está adicada, como é habitual, ao tecido asociativo da localidade. Nesta ocasión ofrece unha reportaxe sobre ABAC, a Asociación de Benestar Animal de Cedeira, e o seu traballo polo control das colonias de gatos.

DESCARGA PDF Boletín “As7Parroquias”

A DEPUTACIÓN INICIOU OS TRÁMITES DAS EXPROPIACIÓNS PARA ELIMINAR A CURVA DO REGO DE TIDE

O Concello de Cedeira informa de que a Deputación da Coruña inicia os trámites para realizar as expropiacións do proxecto “Variante Rego de Tide DP-2205”. Así, tras a súa aprobación no pleno provincial do pasado 26 de febreiro, vén de publicarse no BOP o acordo polo que comezou o período de exposición pública e de presentación de reclamacións, no seu caso, por parte dos afectados. A actuación está enmarcada na mellora dos accesos ao núcleo de Santo André de Teixido, especialmente para facilitar a circulación aos autobuses turísticos que frecuentemente van ao santuario.

Concretamente, o proxecto vai consistir na construción dunha variante que elimine a pronunciada curva que actualmente salva o rego de Tide, no punto quilométrico 1+000 da estrada provincial CP-2205. Construirase un novo trazado ao sur, con curvas amplias que facilitarán o paso aos autobuses e vehículos pesados, a unha velocidade máxima de 80 km/hora. Nas obras vai incluída a canalización do curso de auga ao longo dos 42 metros nos que estará a base do terraplén. O novo trazado percorrerá 230 metros, desde o quilómetro +920 ata o 1+220.

O proxecto está incluído no Plan de Investimentos en Vías Provinciais 2020, Quinta Fase, e conta cun presuposto de 29.323,20 euros para as expropiacións e de 350.305,36 metros para as obras.

O alcalde, Pablo Diego Moreda Gil, recordou que a Deputación da Coruña abriu ao tráfico hai menos dun mes a nova variante das Pontigas, unha actuación na que a administración provincial investiu máis de 588.000 euros e que tamén está enmarcada nesta mellora dos accesos a Santo André de Teixido. Neste caso construiuse unha variante que salva o núcleo das Pontigas e os seus estreitamentos, facilitando tamén a circulación a todos os vehículos, e en especial aos autobuses.

Moreda Gil expresou o agradecemento do Concello de Cedeira ao servizo de Viais e Obras e ao presidente da Deputación da Coruña, Valentín González Formoso, polo compromiso que mantén desde o ano 2015, o da súa chegada á institución, na mellora das infraestruturas viarias provinciais no municipio.

O CONCELLO LICITA A CONSTRUCIÓN DUN SKATE BOWL E UNHA TIROLINA NO PARQUE DO CAMIÑO REAL DA MADALENA

O Concello de Cedeira acaba de publicar, na Plataforma de Contratación do Sector Público, a licitación do proxecto para construír un skate bowl e unha tirolina no parque do Camiño Real da Madalena. Tal como explica o alcalde, Pablo Diego Moreda Gil, é unha intervención que conta cun presuposto de 126.012,82€ (IVE incluído) e coa que o goberno local ten o obxectivo de “sumar novos atractivos na vila para a infancia e a mocidade, en definitiva ás familias, nun espazo próximo á praia, con arborado e con todos os elementos para gozar do aire libre con tranquilidade e seguridade”.

O skate bowl ou bañeira de patinaxe ocupará o lugar no que agora hai unha fonte circular sen uso. Trátase dunha pista para skaters, cunha unha superfie irregular e pendientes e formas redondeadas. Terá unha profundidade máxima menor a un metro e pendientes de entre 80 e 90 centímetros, de maneira que ofreza seguridade aos principiantes e que sexa suficientemente atractiva para aqueles máis experimentados co monopatín. A instalación para patinar será de 176 metros cadrados, aínda que a superficie total, co perímetro habilitado, será de 264 metros cadrados.

A tirolina se situará preto da randeeira hexagonal que hai nun dos parques de xogos da zona. Terá 28 metros de largo, cunha altura de catro metros na salida e tres na chegada, e o percorrido terá solo de caucho. Cómpre recordar que o goberno local ten tamén o proxecto de construír neste parque infantil unha cuberta que protexerá da choiva e o vento case toda a zona de xogos, salvo a devandita randeeira.

O concurso para o skate bowl e a tirolina convócase polo procedemento aberto simplificado e as empresas interesadas teñen de prazo ata o 15 de abril para presentar as súas ofertas. O plazo de execución será de tres meses.

A Plataforma de Contratación do Sector Público publicou tamén estes días a licitación do proxecto de saneamento na rúa Amor Hermoso e está aberto, igualmente, o concurso para as obras de rehabilitación estrutural e do pavimento do anel vermello da Praza Roxa. Son tres das actuacións incluídas no capítulo de investimentos do orzamento de Cedeira para 2021, aprobado polo pleno no pasado mes de febreiro.