Skip to content Skip to left sidebar Skip to footer

SERVICIOS SOCIAIS

O CONCELLO DE CEDEIRA SÚMASE Á CAMPAÑA DA DEPUTACIÓN PROVINCIAL “OITOM MOITO POR CAMBIAR”

O Concello de Cedeira vai celebrar o Día Internacional da Muller, neste ano atípico, cun sinxelo acto no Auditorio Municipal, o vindeiro luns ás 17.30 horas, no que se entregará o Premio Muller da Vila e se fará a lectura do manifesto da administración municipal a prol da igualdade de xénero. Segundo informou o goberno local, o Concello súmase neste 2021 á campaña promovida pola Deputación Provincial da Coruña baixo o lema “OitoM Moito por cambiar”, que xira en torno ás moitas reivindicacións feministas que aínda quedan por conquistar e que aposta polo traballo en rede para impulsar unha sociedade máis xusta e igualitaria.

Como en anos anteriores, o Concello de Cedeira vai aproveitar a data do 8M para difundir, en colaboración coas bibliotecas do CEIP Nicolás do Río e o IES Punta Candieira, unha relación de lecturas recomendadas para entender e defender o feminismo.

Como xa se informou en días pasados, o Premio Muller da Vila, que cada ano concede nesta data a Asociación de Mulleres da Vila é neste 2021 para as traballadoras que se ocupan, tanto desde o Concello como a través das empresas contratatadas para elo, dos Servizos Sociais e da Atención no Fogar. A entidade quere recoñecer o grande esforzo que fixeron para manter os coidados dos maiores e dependentes nas complicadas circunstancias desta pandemia, na que quedou claro que son “esenciais” para moitas familias.

E no marco dos actos do 8M está tamén a programación, para o vindeiro día 13, do espectáculo de danza contemporánea “Plastic”, a cargo da compañía TrasPediante. Ese “plastic” fai alusión ás bonecas Barbies de plástico e ao seu modelo de muller perfecta, na que o contedor é máis importante que o contido. A bailarina Paula Quintas pon en escea esta coreografía, dirixida por Rut Balbis e dirixida a un público adulto. As persoas interesadas en asistir poden reservar xa as entradas, dirixindo un correo electrónico a enrique.vazquez@cedeira.gal ou ben enviando un whatsapp ao número 649876614 eb horario de 09.00 a 14.00horas. Haberá que indicar o nome das persoas que asistirán e facilitar un número de teléfono de contacto.

O CONCELLO CELEBRA QUE O PREMIO “MULLER DA VILA” RECAIA SOBRE AS TRABALLADORAS DOS SERVIZOS SOCIAIS

O Concello de Cedeira celebra que a Asociación de Mulleres da Vila teña decidido entregar o seu premio con motivo do 8M ao colectivo de traballadoras que se ocupan no municipio dos Servizos Sociais, tanto ao persoal municipal que xestiona este departamento como ás mulleres que se ocupan do Servizo de Axuda no Fogar. O alcalde, Pablo Diego Moreda Gil, expresou tamén o seu agradecemento e sumou o recoñecemento do Concello ás persoas que prestan este servizo tan importante e que “fixeron un esforzo enorme para manter a atención durante a pandemia, en circunstancias moi difíciles, sen decaer na atención a maiores e dependentes”.

O premio Muller da Vila de Cedeira, que chega este ano á súa cuarta edición, recaeu no ano 2018 en Lucía Martínez Vilar, entón a patroa maior da Confraría; no 2019 foi para Antonia Rodríguez Díaz, destacada loitadora contra as drogodependencias; e o ano pasado concedeuse a Guadi Galego. O acto de entrega en 2020 tivo que ser suspendido, por mor do confinamento, e este ano a asociación non ten de momento decidido se programará algún evento. O que si determinou é quen vai recibir o seu recoñecemento, desta volta o colectivo responsable dos Servizos Sociais na localidade.

Tal como anunciou a asociación a través das súas redes sociais, a pandemia amosou o que é verdadeiramente importante e significou aqueles traballos que non poden facerse a distancia. Desde a entidade apuntan que o labor dos Servizos Sociais e do Servizo de Axuda a Domicilio é sempre fundamental e indispensable, pero “durante este tempo foino aínda máis”.

O PLENO DE CEDEIRA APROBA O ORZAMENTO DE 2021, QUE ASCENDE A MÁIS DE 6,3M€

O pleno da corporación de Cedeira deu onte luz verde, nunha sesión extraordinaria celebrada telematicamente, ao orzamento de 2021, que ascende a 6.315.212,13€ e representa un incremento, respecto ao anterior, dun 0,25%. O presuposto recibiu o voto a favor do PSOE, a abstención do BNG e o voto en contra do PP. O alcalde, Pablo Diego Moreda Gil, destacou destas contas “que reflicten a nosa vontade de estar preto da cidadanía e apoiar ás familias e ás empresas que o precisan nestes tempos complicados”.

O alcalde destacou que os fondos destinados a servizos sociais ascenden este ano a 1.080.000€, de xeito que se incrementa de novo neste exercicio o esforzo do goberno local neste eido. O orzamento reserva tamén unha partida de 70.000€ para cumprir o compromiso de facer unha nova convocatoria de axudas directas para as empresas e autónomos e contribuír a paliar os efectos da crise sanitaria.

O Concello de Cedeira renova neste orzamento o seu compromiso co tecido asociativo da vila. Así, están contempladas as subvencións nominativas á Escola de Música Vila de Cedeira, asociación ecuestre A Crina, asociación Mares, Amigos dos Ríos, Banda de Música, as ANPAs Picapeixe e O Beco, a asociación San Andrés de Teixido, Protección Civil, Cruz Roja, ANPA de Apader, Sobre Rodas e ABAC, entidades ás que desde o goberno se quere recoñecer o seu importante traballo, fundamental na dinamización da vida social e cultural da localidade. Inclúense nas contas tamén, con partidas que suman 42.000€, as convocatorias que fai cada ano o Concello en réxime de concorrencia competitiva para actividades e entidades deportivas e culturais.

Segundo explicou o alcalde, a evolución da pandemia determinará, máis adiante, se o Concello pode organizar as actividades de tipo deportivo e cultural que se suspenderon a raíz do covid.19. Puntualizou, con todo, que aínda que as partidas de gastos non estean concretadas no orzamento, o goberno local tivo en conta estas circunstancias e dispón dos fondos que no seu caso poderían destinarse a poñelas en marcha.

O capítulo de investimentos está dotado neste ano 2021 con 1.159.849,33€, cos que se van levar a cabo, entre outros, os seguintes proxectos:

  • Rehabilitación estrutural e do pavimento do anel vermello da Praza Roxa.
  • Consolidación e reparación da cuberta dos escolares de Saa e Silsalde Maior.
  • Conservación do firme na Avenida de España e o camiño Pitilleira.
  • Reforma integral da Praza de Galicia.
  • Mellora de beirarrúas na Avenida de España, Rúa Ponte Nova e outras.
  • Ampliación do saneamento nas Pontigas.
  • Pista de skate e tirolina no Parque Camiño Real da Madalena.

Neste mesmo capítulo de investimentos, cómpre sinalar que o Concello reserva fondos para unha nova campaña de escavación arqueolóxica no Sarridal, así como para proseguir co plan de recuperación de fontes e lavadoiros e para diferentes actuacións de mellora medioambiental, como a compra e plantación de árbores ou a mellora da eficiencia enerxética.

Están tamén previstos, para este exercicio 2021, a execución dos primeiros orzamentos participativos da historia de Cedeira, cunha partida de 20.000€. O seu destino será decidido, a través dun proceso que xa está en marcha, polos alumnos e alumnas de 4º da ESO do IES de Cedeira.

Moreda Gil amosou a súa satisfacción pola aprobación do novo orzamento, ferramenta básica para proseguir co proxecto social e de progreso do goberno local, e apuntou que coa liquidación do presuposto de 2020 e á vista dos remanentes poderán acometerse outras actuacións que non tiveron cabida neste proxecto contable.