Skip to content Skip to left sidebar Skip to footer

NOVAS

CEDEIRA ADAPTA AS FESTAS ÁS CIRCUNSTANCIAS CON ESPECTÁCULOS NA RÚA PARA TODOS OS PÚBLICOS

O Concello de Cedeira propón un ano máis unhas festas patronais adaptadas ás circunstancias, sen aglomeracións, ao aire libre e sen riscos. O alcalde, Pablo Diego Moreda Gil, desexou que veciñanza e visitantes poidan manter viva a tradición de xuntarse en familia e co círculo máis próximo e celebrou o éxito da programación en pequeno formato que está a desenvolver durante este verán o Concello e tamén das propostas de entidades e asociacións que, co apoio da administración municipal, están a contar cunha organización impecable –como os festivais de Buxainas e Discalz@s ou a Regata de Traiñeiras-. “E temos que recordar que o orzamento das festas serviu desta volta para axudar a máis dun cento de empresas e autónomos do municipio a paliar as perdas”, dixo Moreda, quen animou a todos e todas a gozar con seguridade dos próximos días.

Desde este sábado ao luns haberá propostas para todos os públicos, comezando coa función que Teatro O Cubo ofrecerá o día 14, ás 19.00 horas, na Praza Floreal. Sofía Espiñeira, Noel Fandiño e Roberto Casal protagonizan este espectáculo áxil, participativo e cheo de humor que ten triunfado xa en localidades de toda Galicia. Pequenos e maiores divertiranse con esta proposta, cuxa estética recorda aos antigos circos ambulantes.

Tamén o sábado 14, ás 20.30 horas na Praza Roxa, celebrarase o concerto de Adhara&Ritman. A formación da cantante Adhara Caamaño e o compositor Tito Barbeito chega a Cedeira coa súa proposta musical de raíces folk, na que adoitan adaptar cancións populares galegas a ritmos como o reggae.

A Banda de Música Vila de Cedeira encargarase de animar a mañá do domingo, día 15, cun concerto na Praza Roxa a partir das 14.00 horas. Xa pola tarde, ás 20.00 horas na Praza Floreal, haberá unha actuación do grupo de acróbatas Maintomano. O seu espectáculo, titulado “Sen medo”, fai referencia á idea de superar o reto, vencer os temores.

A mesma Praza Floreal acollerá o luns, ás 20.00 horas, o espectáculo “Baldín Badá” da compañía Shakti Olaizola. O público verá contorsións, acrobacias, danza e teatro nunha montaxe que fala dos disparates e toleadas dunha pintora e un músico.

Por outra banda, cómpre recordar que está aberta ata o domingo no Palacete Municipal a exposición de Jane Danko, a artista estadounidense afincada na vila. A mostra pode verse en horario de17.00 a 20.30 horas de luns a venres, así como os sábados de 17.00 a 20.00 horas e os domingos, de 11.30 a 14.00 horas.

“AS7PARROQUIAS” DESTACA NO SEU ÚLTIMO NÚMERO O INVESTIMENTO DE 2,6M€ DO GOBERNO CENTRAL EN CEDEIRA

O Concello de Cedeira está a distribuír estes días entre a veciñanza unha nova edición do boletín informativo “As7Parroquias”, no que recolle as novidades máis destacadas do traballo municipal dos últimos meses. Así, neste número 18 da publicación destaca a noticia do compromiso acadado polo Ministerio de Transición Ecolóxica de financiar con 2,6 millóns de euros a rexeneración da praia da Madalena e o proxecto de recuperación da antiga cetaria das Sonreiras, así como a modificación de créditos aprobada polo pleno, a través da cal o Concello incorpora máis de medio millón de euros ao capítulo de investimentos deste ano, procedentes de remanentes do pasado 2020.

O novo programa de axudas creado polo Concello de Cedeira para paliar o impacto da covid nas empresas e autónomos da vila, dotado con 70.000 euros, é outra das cuestións das que informa o boletín. “As7Parroquias” tamén dá conta da execución dos orzamentos participativos, coa realización do parque de calistenia e o ciclo de auto-cine, así como da presencia de Cedeira na última edición de Fitur.

O rexeitamento aos proxectos de parques eólicos mariños que proxecta Iberdrola no litoral próximo a Cedeira e tamén ao parque eólico terrestre Badulaque é tamén un tema que aborda o boletín, en cuxas páxinas o Concello informa igualmente da recente contratación de todos os suministros enerxéticos municipais de fontes renovables. A nova ordenanza de protección de camiños municipais e o apoio do Concello á flota pesqueira fronte ao regulamento proposto pola Unión Europea son outros dos temas que aborda a publicación.

A Banda de Música Vila de Cedeira protagoniza desta volta a contraportada do boletín, despois dunha recente renovación na directiva. O relevo xeracional garante o futuro desta formación, con grande arraigamento na localidade e cun espíritu bulideiro que a leva a integrar todo tipo de músicas no seu repertorio.

Pódese descargar o boletín na seguinte ligazón:

DESCARGA Boletín nº 18

O CONCELLO COMPRA SEIS CAMAS XERIÁTRICAS MÁIS PARA PRESTAR A PERSOAS USUARIAS DA AXUDA NO FOGAR

O Concello de Cedeira comprou recentemente seis novas camas xeriátricas con brazo elevador destinadas ás persoas usuarias do Servizo de Axuda no Fogar que non contan con recursos para compralas e facilitar a súa mobilidade. Tal como explican desde o goberno local, estes equipos se prestarán de xeito indefinido, mentres os precisen, a persoas usuarias do Servizo de Axuda no Fogar.

Nos últimos anos o Concello foi pouco a pouco mellorando a súa dotación neste eido, de xeito que con esta última contratación conta xa con 30 camas xeriátricas e 12 guindastres que representan pezas moi importantes para facer máis doado o traballo do persoal de Servizos Sociais e tamén das propias familias. É, tal e como destacan desde o goberno local, un equipamento que redunda directamente na mellor calidade de vida dos dos doentes e das persoas que os coidan.

O investimento nestas novas sete camas xeriátricas foi de 9.300€ (IVE incluído) e a empresa Coloro foi a encargada de suministrarlas.