O Concello vén de abrir o prazo de preinscrición nas escolas deportivas municipais ata o día 6 de setembro.
A confirmación das prazas será ata o 13 de setembro e o comezo das actividades terá lugar o 15 de setembro.
Un total de 168 persoas teñen participado durante este verán no programa de roteiros “Descobre Cedeira” que desenvolve o Concello. O número, a falta de que se desenvolvan esta semana as dúas últimas saídas, está moi por enriba do pouco máis dun cento de persoas inscritas no programa de visitas guiadas o pasado ano e pon de manifesto a recuperación da afluencia de visitantes á vila neste 2021.
A falta de sumar a afluencia as rutas previstas para esta semana, a de Santo André de Teixido é a que máis xente realizou este verán entre as tres propostas polo Concello de Cedeira. Un total de 63 persoas inscribíronse nas sete saídas ao santuario desde a igrexa de Régoa, un roteiro de dificultade media e o de maior duración, de 10.00 a 17.00 horas, no que hai que levar a comida.
A ruta denominada “Vila de Cedeira”, doada e de catro horas –de 10.00 a 14.00 horas-, contou coa participación de 60 persoas, mentres que a “dos Tesouros”, que vai da Oficina de Turismo ata o faro da Robaleira, foi seguida por 45 persoas.
Así, houbo unha media de 11 participantes nos 15 roteiros que se desenvolveron ata o momento, desde primeiros de xullo. A concelleira de Turismo, Carmela Prieto, subliñou o bo funcionamento deste programa que vai dirixido tanto ás persoas de fóra que visitan Cedeira durante o verán como tamén á propia veciñanza, que tamén descobre a través destes percorridos e as explicacións da guía detalles da historia e do patrimonio natural e arquitectónico que lles pasaran desapercibidos.
Últimas saídas
Hoxe, martes, está programada e coa inscrición aberta un roteiro pola vila de Cedeira, e este xoves, día 2 de setembro, desenvolverase a última saída do programa, que terá como destino Santo André de Teixido. As persoas interesadas teñen que apuntarse na Oficina de Turismo, presencialmente ou ben enviando un mail a mar.lopez@cedeira.es ou chamando por teléfono ao 981 482 187. A participación é gratuíta.
O matrimonio formado por Julio Gómez Mena e Piedad Santamaría foron hoxe os gañadores do primeiro e segundo premio, respectivamente, na VII edición do Certame de Pintura Rápida “Vila de Cedeira”, que hoxe reuniu na localidade a 26 pintores e pintoras, profesionais e afeccionados, de dentro e fóra de Galicia. O terceiro premio foi para Manuel Carballeira, de Valdoviño. O alcalde, Pablo Diego Moreda Gil, participou no acto de lectura do fallo do xurado e na entrega dos premios, dotados con 800, 600 e 400€ respectivamente.
Numeroso público agardou ás portas da Sala Áncora polo resultado das deliberacións do xurado, formado polos artistas Adrián Taracido, Jane Danko e Daniel Pérez García. Tras a lectura do fallo, as obras quedaron expostas ao público e moitas delas foron vendidas. Entre os participantes, máis que na anterior edición, houbo moitos de fóra de Galicia, como o caso dos gañadores do primeiro e segundo premio, residentes na localidade vasca de Leioa.
Os artistas estiveron pintando ao longo da xornada, entre as 10.00 e as 17.00 horas, e a súa presenza, cos cabaletes e caixas de pintura, animou a vila durante este último domingo de agosto, nunha fin de semana na que tamén se celebrou o xa tradicional Lugnasad. A zona do marítimo, a praia da Madalena, o paseo da Mariña, a zona do río Condomiñas, praia de Area Longa, o casco vello e o porto foron os lugares marcados polas bases para o desenvolvemento do certame, de maneira que os pintores repartíronse por elas elixindo as vistas ou detalles que plasmar nos seus cadros.
A relación de artistas que gañaron as anteriores edicións do certame é a seguinte: Pío Costa (2015), Raúl Gil (2016), Eduardo Pérez Baamonde (2017), Andrés Gabarres Cagiao (2018), Nestor López Casas (2019) e Isabel Seidal (2020).
