Skip to content Skip to left sidebar Skip to footer

SERVIZOS

O CONCELLO INVESTIU MÁIS DE 16.000€ NAS OBRAS DE AMPLIACIÓN DA BEIRARRÚA DE EDUARDO PONDAL

O Concello de Cedeira rematou unhas obras de ampliación da beirarrúa de Eduardo Pondal, un vial da zona urbana que conecta a Avenida Area coa rúa María Auxiliadora, no que o ancho do espazo peonil era escaso e presentaba un acusado deterioro. A actuación, que segundo informou o alcalde, Pablo Diego Moreda Gil, conlevou un investimento de 16.042€ (IVE incluído), permitiu anchear ata 1.50 metros a beirarrúa para cumprir os requisitos de accesibilidade, ao tempo que se unificou a súa imaxe coa das outras beirarrúas zona aplicando un pavimento que imita a pedra natural.

As obras incluíron o levantamento da anterior beirarrúa e a colocación da nova, coa instalación do correspondente sistema de recollida de augas pluviais. Na rúa, que ten algo máis de 50 metros de percorrido, pintáronse ademais dous pasos de peóns.

Desde o Concello sinalan que as obras forman parte do continuo proceso de mellora e posta ao día das infraestruturas municipais, neste caso coa adecuación dunha rúa que ten bastante tránsito e que acada, desta forma, unhas condicións de accesibilidade que cumplen coa normativa actual nesta materia. Moreda Gil destacou que é unha rúa próxima ao Centro de Saúde e que, por esa razón, era especialmente importante dotala do espacio necesario para as persoas que van con doentes ou que teñen problemas de mobilidade.

O CONCELLO LICITA, CUN ORZAMENTO DE MÁIS DE 84.000€, A RENOVACIÓN DO ALUMEADO PÚBLICO DA AVENIDA AREA

O goberno local de Cedeira publicou na Plataforma de Contratación do Sector Público a licitación do proxecto de “Renovación do alumeado público na avenida Area e na avenida Castelao”, unha actuación que conta cun orzamento de 84.666,12€ e que incluirá a subministración e instalación de 35 novos farois con tecnoloxía LED. “Trátase dunha rúa con bastante circulación, de vehículos e de persoas, na que unha mellor iluminación vai redundar en máis seguridade vial e cidadá, favorecendo o comercio e a actividade en xeral”, comentou o alcalde, Pablo Diego Moreda Gil.

O proxecto que sae a licitación, e para o que as empresas interesadas poden presentar oferta ata o día 22 de novembro, abrangue a subministración e instalación de 35 luminarias LED, dúas delas na Avenida Castelao e o resto na Avenida Area. O contrato inclue a colocación dos novos farois sobre columnas de oito metros de alto, as canalizacións subterráneas, a posta a terra e as arquetas de paso, así como a retirada das luminarias actuais.

No proxecto, que se vai acometer con financiamento da Deputación da Coruña no marco da segunda fase do POS+Adicional 2022, destaca o cambio que van representar as novas bombillas LED en canto á eliminación da contaminación lumínica, garantindo un fluxo de luz acaído para as necesidades de cada zona, beirarrúa ou calzada, xunto co aforro económico. As luces tipo LED precisan menos da metade da potencia eléctrica que as bombillas tradicionais, de vapor de sodio, para producir a mesma iluminación. Neste sentido, o alcalde reiterou o compromiso do Concello coa mellora da eficiencia enerxética e apuntou que a suba do prezo da electricidade non está a impactar nas contas municipais “precisamente polo importante proceso de renovación da rede de iluminación pública que se levou adiante nos últimos anos”.

Xa no ano 2020 o Concello procedera a renovar o resto da iluminación da Avenida Castelao, cun investimento de máis de 47.000€ para o cambio de 97 puntos de luz. Agora, este novo proxecto permitirá rematar a modernización desta vía, coa substitución das dúas únicas farolas antigas que quedaban neste vial, precisamente na rotonda da que parte a avenida da Area, na que se instalarán os restantes LEDs desta actuación. Nos últimos anos, o Concello de Cedeira renovou máis de 2.000 puntos de luz do casco urbano coa nova tecnoloxía.

O CONCELLO VAI ANCHEAR E DOTAR DUNHA SENDA PEONIL O CAMIÑO DE CORDOBELAS NO ENTRONQUE COA AC-566

O Concello de Cedeira vén de publicar o concurso para a contratación da obra de habilitación dunha senda peonil e a ampliación da calzada no camiño de Cordobelas. A actuación conta cun orzamento de 80.995€ (IVE incluído) e vai mellorar sensiblemente a seguridade vial nesta pista, que entronca coa carretera autonómica AC-566. O alcalde, Pablo Diego Moreda Gil, encadrou a actuación no traballo continuado do goberno local non so por conservar senón tamén mellorar as condicións dos camiños de titularidade municipal na zona rural.

O camiño de Cordobelas ten actualmente anchos de 2,90 e 3,50 metros que fan difíciles e perigosos os crucea de dous vehículos en diferentes sentidos, así como o tránsito de peóns. O proxecto que se vai contratar servirá para aproveitar ao máximo as beiras da calzada chegando a ampliar a plataforma ata os cinco metros. Catro metros serán para os coches e un metro para a habilitación dunha senda peonil, en pavimento de formigón armado en cor, que tamén facilitará o abeiramento dos vehículos nos cruces.

As obras afectarán ao vial nuns 280 metros de lonxitude. No primeiro tramo desde a estrada autonómica ata un cruce está previsto habilitar a senda peonil a ambos lados do camiño, que logo continuará só por unha das marxes.

A licitación está publicada na Plataforma de Contratación do Sector Público e as empresas interesadas teñen ata o día 22 de novembro para presentar as súas ofertas. O prazo de execución é de tres meses.