URBANISMO

O CONCELLO ADXUDICA POR 110.000€ A OBRA DE REHABILITACIÓN ESTRUTURAL DO ANEL DA PRAZA ROXA

A Xunta de Goberno do Concello de Cedeira acaba de aprobar o expediente de adxudicación da obra de “Rehabilitación estrutural e do pavimento do anel vermelo da Praza Roxa”, coa que vai mellorar as condicións dun espazo central de convivencia e de lecer para a cidadanía de Cedeira. A empresa BCNOR Gestión y Soluciones Avanzadas gañou o concurso, ao que se presentaron tres ofertas, cun orzamento de 110.022,36€ (IVE incluído).

Tal como informou o alcalde, Pablo Diego Moreda Gil, trátase dunha obra importante no marco do programa de investimentos que o goberno local ten para este ano, dotado con máis de 1,1 millóns de euros e ampliado despois con máis de medio millón de euros procedentes dos remanentes do exercicio anterior. A actuación está incluída no plan de intervencións financiadas ao abeiro do POS+2021 da Deputación da Coruña.

A obra, que ten un prazo de execución de dous meses, vai servir para reparar o pavimento da Praza Roxa, que presenta fendas e deterioración en moitos puntos polo efecto das raíces das árbores. Así, os traballos van consistir en levantar o chan actual para habilitar outro máis resistente e coa adherencia necesaria para o uso intenso que ten a zona. Porén, coa intención de non molestar ou interromper a animada vida social que acolle esta zona durante o verán, o comezo das obras adíase ata finais de setembro.

Tal como consta no prego técnico do proxecto, os traballos incluirán, tras o levantamento do pavimento actual, a poda das raíces e a colocación dunha malla que evite no futuro que estas levanten e deformen a superficie. Enriba desta malla irá unha capa de zahorra e sobre ela un aglomerado asfáltico. A superficie da praza, de 1.500 metros cadrados, levará un acabado de resina epoxy, usado frecuentemente para polideportivos ao aire libre pola súa adherencia e resistencia. No proxecto contémplase tamén a pintura de frases, símbolos ou poemas sobre a superficie para darlle unha estética máis atractiva ao conxunto.

AVANZAN OS TRÁMITES PREVIOS Á REALIZACIÓN DAS OBRAS DE CONSTRUCIÓN DA VARIANTE DE REGO DE TIDE

O salón de plenos do Concello de Cedeira acolle hoxe unha reunión cos propietarios das fincas afectadas pola construción da variante de Rego de Tide, para a mellora do trazado da estrada DP-2205. O alcalde, Pablo Diego Moreda Gil, destacou que están a avanzar os trámites desta intervención, coa que vai mellorar a seguridade vial nunha estrada pola que transitan moitos autobuses turísticos camiño de San André de Teixido.

Así, a Deputación da Coruña convocou aos tres propietarios particulares afectados pola obra, así como ao propio Concello de Cedeira, para o levantamento de actas previas ás expropiacións, despois de que rematara o prazo de exposición pública do proxecto sen recibir ningunha alegación. En total, son 4.949 metros cadrados, de diferentes fincas, as que haberá que mercar para construír a nova variante.

A obra vai permitir eliminar a pronunciada curva que actualmente salva o rego de Tide, no punto quilométrico 1+000 da estrada provincial CP-2205. Construirase un novo trazado ao sur, con curvas amplias que facilitarán o paso aos autobuses e vehículos pesados, a unha velocidade máxima de 80 km/hora. Nas obras vai incluída a canalización do curso de auga ao longo dos 42 metros nos que estará a base do terraplén. O novo trazado percorrerá 230 metros, desde o quilómetro +920 ata o 1+220.

O proxecto está incluído no Plan de Investimentos en Vías Provinciais 2020, Quinta Fase, e conta cun presuposto de 29.323,20 euros para as expropiacións e de 350.305,36 metros para as obras.

OS NOVOS ORZAMENTOS MUNICIPAIS PROTAGONIZAN O NOVO NÚMERO DO BOLETÍN “AS7PARROQUIAS”

O Concello de Cedeira vai distribuír estes días entre a veciñanza un novo número, o 17, do boletín “As7Parroquias”, no que informa das principais novidades e logros do traballo municipal nos últimos dous meses. Desta volta o boletín destaca na súa portada a aprobación dos novos orzamentos municipais, que poñen o acento no eido dos servizos sociais, e tamén o compromiso acadado pola Consellería de Sanidade da Xunta de Galicia para retomar as xestións e poñer en marcha a ampliación do Centro de Saúde de Cedeira.

“As7parroquias” detalla tamén as obras que están en marcha ou que remataron recentemente, e os principais proxectos de investimento que se consignaron nas contas de 2021. Informa tamén da reserva de 70.000 euros para lanzar unha nova convocatoria de axudas municipais a empresas e autónomos, coa finalidade de paliar os efectos da pandemia, así como dos fondos adicados a sufragar actividades do tecido asociativo da vila.

A aprobación por primeira vez na historia de Cedeira duns orzamentos participativos, que se elaboraron por parte do alumnado de 4º da ESO do IES Punta Candieira, e a moción unánime dos grupos municipais para cubrir o patio do Areal do CEIP Nicolás do Río son outros dos temas que aborda o boletín, no que tamén se dá conta da finalización da redacción do proxecto para a recuperación integral do curso medio do río Condomiñas.

A contraportada de “As7Parroauias” está adicada, como é habitual, ao tecido asociativo da localidade. Nesta ocasión ofrece unha reportaxe sobre ABAC, a Asociación de Benestar Animal de Cedeira, e o seu traballo polo control das colonias de gatos.

DESCARGA PDF Boletín “As7Parroquias”