Skip to content Skip to left sidebar Skip to footer

NOVAS

CEDEIRA TEN TEATRO E CINE ESTA FIN DE SEMANA, DE NOVO DA MAN DOS CICLOS FUSA GUILLÉN E MESTRE MATEO

O municipio de Cedeira reparte de novo a súa axenda cultural desta fin de semana entre o teatro afeccionado e o cine. O Auditorio Municipal acollerá o sábado ás 20.00 horas a segunda función do ciclo Fusa Guillén, que ofrecerá a compañía ferrolá Romaría Teatro, e o domingo, ás 18.00, o pase da película de animación infantil “Valentina”, no marco do ciclo Mestre Mateo.

O grupo Romaría Teatro xurdiu dun programa de teatro veciñal que impulsou o Concello de Ferrol. A actriz Helga Méndez impartiu talleres de dramaturxia en diferentes parroquias rurais e neles naceron varios grupos que estrearon no pasado mes de xullo as súas primeiras montaxes. Unha delas é “Retratos no Camiño”, que este sábado leva a Cedeira a compañía formada por veciños e veciñas da zona de Serantes. A peza percorre personaxes e vidas desta parroquia a través de Serafín Lorenzo, un fotógrafo que foi máis coñecido no lugar como “Cazolitos” e que andaba polos camiños retratando ás xentes e os seus traballos, o tempo de lecer, os espazos de xuntanza…

Xa o domingo, Cedeira ten unha nova cita coa segunda edición do ciclo de cine en galego Mestre Mateo, que leva por Galicia as películas premiadas e nominadas no famoso certame. A localidade cedeiresa é unha das cinco na provincia da Coruña pola que itineran as películas. Desta volta é a quenda de “Valentina”, unha longametraxe de animación dirixida pola ferrolá Chelo Loureiro que gañou en 2022 o premio Goya na súa categoría e que foi finalista no certame do cine galego.

A película está protagonizada por unha nena, Valentina, que soña con ser trapecista pero que pensa que non poderá conseguilo por ter síndrome de Down. A súa avoa anímaa sempre a perseverar, di que se os vermes logran converterse en bolboretas, nada é imposible. Ela non está moi convencida, pensa en como será esa metamorfose da que lle fala a avoa. Xusto cando vai preguntar, Papá e Mámá danlle unha desconcertante noticia. A avoa marchou de viaxe.

Tamén no Auditorio desenvolverase outra cita, este venres día 20, ás 20.00 horas. Terá lugar a presentación do libro “Cogomelos da comarca de Ortegal” por parte do seu autor, José Luis Cuba Crespo.

O CONCELLO INVISTE CASE 20.000€ NOS APARATOS PARA MELLORAR O EQUIPAMENTO DO XIMNASIO MUNICIPAL

O Concello de Cedeira vén de contratar a subministración de máquinas de musculación para o ximnasio municipal e a súa instalación por valor de 19.998,88€ (IVE incluído). Mercaranse diferentes aparatos que mellorarán o equipamento dispoñible para os adestramentos, cumprindo así co proxecto de Orzamentos Participativos aprobado polo pleno da corporación o pasado mes de maio.

O goberno local conta cunha axuda de 10.000€, xestionada diante da Secretaría Xeral para o Deporte e que vai cubrir a metade do investimento. Segundo a resolución da subvención, a adminstración autonómica aporta 5.882€ con cargo ao exercicio 2023 e os restantes 4.118€ corresponderán ao de 2024. Concretamente, adícanse 17.711€ á compra dos aparatos e preto de 2.300€ á instalación dos mesmos.

A lista da compra abrangue máquinas multipress, apertura e deltoides, femoral-extensións, prensa horizontal, dorsais-remo medio, abdutor-adutor, glúteo e functional trainer, segundo o aprobado nos Orzamentos Participativos xurdidos do proceso democrático que no pasado curso protagonizou o alumnado de terceiro de ESO do IES Punta Candieira.

Cómpre recordar que actualmente están en proceso de contratación as obras de ampliación do ximnasio municipal, que ocupa un espazo contiguo á pista multideporte do Pavillón Municipal. O Concello conta cun orzamento de preto de 62.000€ para esta actuación, coa que o espazo pasará dos 83 metros cadrados actuais aos 119 en total, permitindo a instalación dun equipamento máis completo e variado.

O CONCELLO DESTINARÁ MÁIS DE 237.000€ DE FONDOS PROPIOS Á SUBSTITUCIÓN DO CAMPO ARTIFICIAL DO BECO

A Xunta de Goberno Local de Cedeira acaba de aprobar a adxudicación da substitución do céspede artificial do campo de fútbol municipal do Beco á máis ventaxosa entre as seis ofertas presentadas ao proceso de licitación. A obra levarase a cabo finalmente por un presuposto de 237.420,15€ (saíu a concurso por preto de 250.000€), informou o goberno municipal, que serán asumidos con fondos municipais dos que se incorporaron ao orzamento deste exercicio procedentes do remanente do ano anterior.

O campo do Beco ten 6.577,2 metros cadrados de superficie e está situado na traseira do Polideportivo Municipal. Está marcado para fútbol 11, ao longo, e tamén para fútbol 7 -en dous campos pintados en transversal- e ten unha alta intensidade de uso que causou, de feito, o seu deterioro ao longo da súa vida útil. Actualmente, o céspede presenta deficiencias de nivelacións en varias zonas, o que fai que se formen charcos e irregularidades que causan un comportamento inadecuado do balón, tanto nos rebotes como na rodadura.

Instalarase agora un sistema de última xeración coa herba artificial que irá colocada sobre unha base elástica de 10mm de espesor cunha absorción de impactos superior ao 35%. O novo campo garantirá unha maior durabilidade e a menor deformación co paso do tempo. Ademais, garantirá unha maior absorción de impactos, co que haberá menor risco de lesións para os xogadores e xogadoras.

Xunto co céspede en si, o contrato abrangue a renovación de elementos que están actualmente oxidados, tanto das porterías plegables de fútbol 7 como do sistema de drenaxe do campo, así como a instalación dun novo sistema de rego, aproveitando a rede xa existente, cuxos canóns de saída de auga poderán extraerse e quedar a conexión por debaixo da superficie, sen molestar no xogo cando non estean en uso.