NOVAS

CEDEIRA ENTRÉGASE DESDE MAÑÁ Á FESTA DO SAMAÍN

A vila de Cedeira volve un ano máis ao cerne da festa tradicional do Samaín galego, fuxindo do anglosaxón Halloween. Será un ano máis unha festa popular, en cuxa organización está implicada unha boa representación do tecido asociativo local, e terá o seu centro no paseo da Mariña e nas rúas do casco vello durante a tarde de mañá venres, día 27, e do sábado 28.

Desde o Concello de Cedeira recordan o sentido da festa, que é “familiar e integradora”, arredor do tallado das caliveras na cortiza dos melóns. Quen queira ir disfrazado, recomendan, pode ir de pantasma branca, as chamadas “avisións”, ou ben coa cara ciscada simulando ser unha ánima doutro mundo.

O programa comeza mañá venres ás 17.00 horas no paseo da Mariña, onde se desenvolverán un taller de zonchos e outro de pintura. Ás 20.00 horas, co lusco e fusco, a compañía Barafunda ofrecerá o espectáculo “Os espíritus divertidos do Samaín”.

O Centro de Ocio Xuvenil organiza tamén para a tarde de mañá venres, de 17.30 a 19.30 horas, un obradoiro de repostería de Samaín que será impartido por Mercedes Fernández e María Arribí.

Para o sábado, a partir das 17.00 horas, están previstos obradoiros de tallado de cabazas e de maqueado, baixo as carpas que se instalarán no paseo da Mariña. Estarán expostas as caliveras, nas que ano tras ano a xente de Cedeira plasma toda a súa creatividade. Abrirá tamén un ano máis as súas portas a “Casa do Terror” e ofrecerase unha merendola de outono ao público, con bola de axucre e requeixo.

Sobre as 20.30 horas será o pasarrúas, un desfile no que van maiores e pequenos e que percorre as rúas do casco vello case ás escuras, só coa luz das velas que leven algúns dos participantes. É un percorrido barulleiro e cheo de risas.

Xunto coa Asociación de Amigos do Samaín, colaboran na organización desta festa as asociacións Mulleres da Vila, Buxainas, Mares, a Escola de Música, a Banda de Música e a ANPA Picapeixe.

Redondeará o programa o pase da película “O corpo aberto” o domingo, ás 19.00 horas, no Auditorio Municipal. Cadra co ambiente esta historia dirixida por Ángeles Huerta sobre un mestre que vai destinado a unha aldea inhóspita e de tradicións ancestrais. Nun lugar dominado pola superstición, a morte dun veciño da aldea libera un espírito en busca dun corpo que lle permita seguir coa súa existencia, que levará ao protagonista a cuestionar os límites entre o mundo dos vivos e o dos mortos. É unha proxección enmarcada no ciclo Mestre Mateo, que leva a Cedeira as películas premiadas e nominadas no certame do cine en galego. Neste caso, “O corpo aberto” recibiu o premio ao mellor longametraxe.

O CONCELLO CEDE SEIS PROXECTORES ÁS ASOCIACIÓNS DE VECIÑOS E PON DOUS A DISPOSICIÓN DOUTRAS ENTIDADES

O goberno local de Cedeira vén de ceder gratuitamente seis proxectores ás asociacións de veciños de Montoxo, Régoa, San Román, Piñeiro e Esteiro (neste último caso dous, un para o local de Saa e outro para o de Sisalde). Trátase de equipos que o Concello comprara no seu día para o colexio e que caeran en desuso por ter o centro educativo outros máis novos.

Así, o Concello ocupouse de revisar e reparar estes equipos para poñelos a disposición das asociacións de veciños. Quedou ademais con outros dous proxectores que poderán ser empregados polas entidades culturais, sociais ou deportivas da localidade que así o soliciten.

Ademais, o Concello tamén adquiriu recentemente un desfibrilador para a nova asociación de veciños de Régoa, un equipamento que tamén ten xa o resto das entidades veciñais da localidade. Dotoulla, igualmente, dunha caldeira de biomasa para facer máis confortable o local social.

Proxector para o Auditorio
Por outra banda, o Concello de Cedeira comprou recentemente un novo proxector para o Auditorio Municipal que permite o pase de películas con alta definición. Foi un investimento de 13.046,22€ (IVE incluído), cuxa rendibilidade está a comprobarse xa nas sesións do ciclo Mestre Mateo, no que a veciñanza está a ver de xeito gratuíto as cintas finalistas dos premios do cine en galego.

Concretamente, o Auditorio Municipal incorporou ao seu equipamento un proxector Epson EB-PU2010B, con 10.000 lúmenes, para a visualización en alta definición en formato panorámico. O custe do proxector foi de 11.968,11€ (IVE incluído), porén este tipo de equipo precisa a incorporación dunha lente –no caso dos de uso doméstico vén xa incorporada). Adquiriuse por elo tamén unha lente Epson (ratio,45-2,32:1) cuxo prezo foi de 1.078,11€ (IVE incluído).

O alcalde, Pablo Moreda, enfatizou que o importe total é o resultado da compra do proxector e a lente e lamentou que o grupo do PP teña manifestado en redes sociais que a compra se realizou fóra de Cedeira e por riba do prezo de mercado sen ter en conta a indispensable lente. Puntualizou, tamén, que a elección do proveedor realizouse seguindo as consideracións dos técnicos municipais, que fan as súas recomendacións en función do seu coñecemento e de criterios obxectivos. Ao fío disto, o alcalde pediu ao grupo da oposición “máis rigor e responsabilidade”.

O CONCELLO DE CEDEIRA LEVA Á DEPUTACIÓN A PETICIÓN DUNHA SENDA PEONIL DE CHAO DO MONTE A SANTO ANDRÉ

O alcalde de Cedeira, Pablo Diego Moreda Gil, e o concelleiro de Cultura, Patrimonio e Deportes, José Antonio Rodríguez, reuníronse recentemente na Coruña coa deputada provincial de Vías e Obras, Mónica Rodríguez Ordóñez, para solicitar a mellora da mobilidade peonil nos accesos ao núcleo de Santo André. Concretamente, o goberno local pide a construción dunha senda que facilite o percorrido a pé desde o mirador de Chao do Monte ata enlazar coa senda xa existente na entrada de Teixido, nun itinerario duns 3 km. A actuación precisaría dun orzamento aproximado de 600.000€.

O obxectivo é seguir mellorando os accesos a Santo André de Teixido, un lugar que recibe cada vez máis visitantes e que ten o seu acceso fundamental a través da estrada provincial DP 2206. Cómpre recordar que a Deputación Provincial rematou xa en 2021 a variante de Pontigas, na CP 2204, salvando os estreitamentos da vía que facían difícil a circulación ao seu paso polo núcleo de poboación. Foi unha mellora especialmente importante para os numerosos autobuses que se dirixen a Santo André, ao igual que sucede coas obras que vai iniciar en breve a Deputación no punto quilométrico un da estrada 2206 e que van corrixir a perigosa curva que existe na valgada do regato de Tide. A institución provincial inviste nestas obras preto de 395.000€.

Xunto coa mellora das condicións para o tráfico rodado, o goberno local de Cedeira aspira a mellorar e facilitar a peregrinación a pé ao núcleo de Teixido. A senda peonil é unha actuación especialmente dirixida ás persoas con problemas de mobilidade, que atopan especiais dificultades no trazado orixinal do camiño. A proposta do Concello pasa por abrir unha senda de dous metros de ancho, que tamén contribuiría a dar máis amplitude á estrada nun trazado estreito e inzado de curvas.

O goberno local solicitou á Deputación Provincial a súa aposta por este proxecto, para o que tamén pediu o máximo respeto ao contorno natural e patrimonial. A aspiración do Concello é poder ampliar no futuro a senda peonil e levala ata Cedeira, conectando a vila con esta aldea, que constitue o núcleo de peregrinación máis importante de Galicia despois de Compostela. Trátase dun plan que encaixa coa estratexia de desenvolvemento do Xeoparque Cabo Ortegal, na que teñen peso as rutas de sendeirismo e tamén a potenciación do camiño a Santo André.