MEDIO AMBIENTE

O Concello de Cedeira chama á colaboración dos comerciantes da localidade a participar nunha campaña que dará como resultado a elaboración dun Plan de Acción para o Clima e a Enerxía Sostible (PACES). Trátase dun documento estratéxico para avanzar, desde a administración local, nos obxectivos da Unión Europea cara ao ano 2030 e reducir as emisións do CO2 no conxunto do municipio.

A adhesión do Concello, en febreiro de 2020, á iniciativa europea “Pacto das alcaldías para o Clima e a Enerxía” representa o compromiso do executivo local pola eficiencia enerxética, as fontes de enerxía renovables e por reducir as emisións contaminantes.

Trala declaración de Emerxencia Climática e Ambiental en España, o goberno municipal decidiu tamén desenvolver liñas de acción que fagan fronte á crise climática e aproveitar os beneficios sociais e económicos que ofrece a transición ecolóxica para mellorar a calidade de vida de veciños e veciñas.

Esta acción de goberno materializarase nos próximos días coa visita de persoal técnico de Energal Sl aos locais comerciais para coñecer o consumo enerxético coa fin de reducir o gasto eléctrico e deseñar a mellor estratexia posible. Só será necesario ter a man unha factura na que figure o consumo.

O alcalde, Pablo Diego Moreda Gil, adiantou que a intención do Concello tamén pasa por ampliar ao conxunto do municipio o uso de enerxía obtida a través de fontes renovables, unha política xa vixente nos edificios de titularidade municipal, e que, no seu momento, levou a Cedeira a acollerse á plataforma de contratación da FEMP para poder facelo.

O compromiso do executivo local co medio ambiente ponse así mesmo de manifesto tanto pola adhesión ao pacto polo clima como á política de substitución das lámpadas de Vapor de Sodio (WAPS) polas de tecnoloxías Led. Cabe recordar que tan só nas últimas semanas o goberno contratou proxectos que darán lugar á substitución de máis de 1.500 bombillas na zona rural e tamén urbana.

O Concello de Cedeira saca a contratación a subministración de 921 lámpadas Led na zona rural, máis concretamente nas parroquias de San Román de Montoxo (117 unidades), Esteiro (230), Piñeiro (140), Régoa (129), Cervo (151), Cedeira (66) e Montoxo, de San Xiao, (88). Deste xeito, Cedeira pasará a ter na zona non urbana un total de 1.460 lámpadas Led conectadas á iluminación pública antes de que remate o ano.

O investimento ascende a 65.872,78 euros (IVE incluído) e o prazo de execución dos traballos é de dous meses. As empresas interesadas dispoñen ata o día 31 deste mes para presentar as súas ofertas.

Coa contratación deste novo proxecto o executivo local volve incidir na súa política de apostar polas novas tecnoloxías fronte ás antigas lámpadas de vapor de sodio (VSAP) por ser máis respectuosas co medio ambiente e porque necesitan a metade de potencia para producir o mesmo fluxo luminoso, o que tamén se traduce nun menor gasto eléctrico. Segundo a Federación de Municipios y Provincias, o uso de Led na iluminación pública -que representa entre o 40% e 70% do gasto enerxético dos concellos- reduce practicamente a metade da factura eléctrica. Neste sentido, cabe recordar tamén que o Concello de Cedeira está a traballar en proxectos que teñen como obxectivo a redución das emisións de Carbono como membro do Pacto dos Alcaldes polo Clima e a Enerxía, unha alianza a nivel global de cidades e gobernos locais comprometidos coa loita ao cambio climático.

Todas as bombillas que serán substituídas por LED terán 30 W de potencia e viran a iluminar, entre outros, os lugares de Fragoso, Veciñeira e Aron, na parroquia de San Román de Montoxo; San Miguel, Vilela e Os Loureiros, na de Esteiro, e Ventosa, Camiño do Beco e Virizo, na de Piñeiro. Na parroquia de Régoa, as novas lámpadas localizaranse, entre outras, nas zonas de Barral, A Rúa e Ervellas, mentres que na de Cervo estarán en Vilar, Covo e Trasmonte. Vilacacín e Areosa serán os lugares da parroquia de Cedeira que pasarán a ter Led, unha novidade que tamén se deixará sentir nos das Filguieras, Carracedo e Mundín vinculados a San Xiao de Montoxo.