Skip to content Skip to left sidebar Skip to footer

Author: Ana

Cedeira busca fortalecer o comercio e a hostalería local cun plan de acción para súa dinamización

O goberno municipal impulsa un plan de dinamización do comercio e a hostalería da localidade para revitalizar dous dos sectores máis afectados pola pandemia da Covid- 19 e así tamén mellorar as súas perspectivas de futuro.

Esta acción de goberno levou ao executivo a contratar á empresa Goodlife Factory SL, que estará á fronte duns traballos que necesitan desde o contacto directo con empresas e consumidores ata o deseño de estratexias de mercado. Estas medidas axudarán a debuxar unha folla de ruta que incrementará a competitividade global do tecido comercial de Cedeira cara aos próximos tres anos. O contrato ascende a 18.000 euros (IVE incluído), sendo a empresa adxudicataria a de menor contía das tres que presentaron ofertas.

Porque, segundo o alcalde, Pablo Diego Moreda Gil, “o noso obxectivo, como goberno, é crear un sinal de identidade do que é Cedeira”. “En definitiva”, apuntou a rexedor, “non só queremos que o municipio sexa cabeceira de comarca a nivel turístico senón tamén da hostalaría e, por suposto, do comercio”. Para alcanzar estes propósitos, é necesario, segundo Moreda Gil, “elaborar un plan que axude a comercios e locais de hostalería a optimizar todos os seus recursos con innovación e melloras que veñan a incrementar a calidade dos servizos”. Para o equipo de goberno, dixo o alcalde, o plan de dinamización tamén se convertirá nunha referencia para fixar prioridades cara a futuros proxectos.

Xa para rematar, Pablo Diego Moreda Gil, destacou a importancia que ámbolos dous sectores teñen para a economía local e considerou necesario investir para coñecer cal é a súa situación actual e, a partir desa realidade, idear medidas que contribúan a fortalecer o seu futuro.

  • 27 Agosto, 2020 en NOVAS

Cedeira ordena os accesos ao areal da madalena para evitar posibles contaxios

O Concello de Cedeira está a organizar o fluxo de entrada e de saída de persoas da praia da Madalena para poñer freo aos riscos sanitarios fronte á Covid-19.

Hoxe mesmo daba comezo a obra de instalación de novas pasarelas de madeira que, situadas á altura da praza Roxa e na zona da Revolta, permitirán garantir a distancia entre persoas recomendada pola Consellería de Sanidade para evitar posibles contaxios. Deste xeito, cada acceso á praia terá unha prioridade de paso peonil, ben de entrada ou de saída.

O proxecto xurde, segundo o alcalde de Cedeira, Pablo Diego Moreda Gil, “da necesidade de adoptar estratexias destinadas a controlar a propagación do virus, especialmente nun municipio costeiro cunha alta demanda turística como é o noso, ademais de representar unha mellora significativa na accesibilidade do areal”. Moreda Gil reiterou así mesmo a prioridade que para o executivo local representa a realización de obras que axuden a mellorar a mobilidade das persoas.

En cuestión de días, na contorna da Praza Roxa comezará a funcionar unha estrutura dobre de madeira, en forma de “U”, que permitirá ordenar o circuíto de entrada e saída desde o paseo marítimo. Esta vía será prioritaria para persoas con discapacidade, mobilidade reducida ou maiores, que forman parte dos grupos de risco fronte á Covid-19.

O segundo punto, paralelo ao Rego da Veiga desde a zona coñecida como A Revolta, contará cunha nova pasarela que prolonga varios metros á xa existente e que será utilizada unicamente como vía de saída desde a franxa central do areal.

A intervención completarase coa instalación de carteis informativos para axudar á adaptación da veciñanza e mesmo dos visitantes a estas novas medidas organizativas. Os carteis colocaranse en distintos puntos de accesos á praia.

O Concello de Cedeira contou coa colaboración económica de Vicepresidencia e da Consellería de Presidencia, Administracións Públicas e Xustiza da Xunta de Galicia para a realización dunha obra, cuxo importe superou os 13.800 euros. O convenio firmouse esta mesma semana.

O VI certame de pintura rápida “Vila de Cedeira” será o día 30 do presente mes de agosto

O Concello de Cedeira convoca para o día 30 o Certame de Pintura Rápida “Vila de Cedeira”, que este ano chega a súa sexta edición e co que o goberno municipal quere promocionar a cultura en xeral e a vila cedeirense en particular.

O concurso segue a manter as características das pasadas edicións, así como a contía dos premios, que chegan ata os 1.800 euros no seu conxunto. O primeiro clasificado recibirá 800 euros, mentres que o segundo obterá 600 e 400 euros serán para o terceiro.

A convocatoria dará comezo ás dez da mañá e finalizará sete horas máis tarde, ás cinco. O fallo do xurado darase a coñecer ás 18.00 horas e, a partir das 20.00, as obras non premiadas entrarán a formar parte dunha exposición que se poderá visitar na praza Roxa, fronte a Sala Áncora.

Trátase dunha iniciativa aberta á participación de afeccionados e profesionais, de estilo e temática libre e coa que o executivo local quere estimular a creatividade e a promoción da vila a través dunha das creacións artísticas máis versátiles, a pintura. A idea é capturar unha paisaxe, un recuncho ou unha estampa da localidade nunha obra pictórica realizada “in situ” e durante as sete horas de duración do certame.

As bases do concurso poderanse consultar, a partir de hoxe mércores, na páxina web do Concello (http://www.cedeira.gal).

Un total de 20 persoas tomaron parte na pasada edición, na que Néstor López Casas, de Xixón, acadou o primeiro premio.