Author: Ana

O Concello de Cedeira publicou na Plataforma de Contratación do Sector Público o expediente de licitación dunhas obras de mellora da capa de rodadura de dous camiños de titularidade municipal, o que vai de Meizoso a Biduido e o ramal que conecta Meizoso coa DP2205, na parroquia de Régoa. A actuación está orzamentada en 77.646,57€ (IVE incluído) e o goberno municipal vai financiala cos fondos procedentes da Agader (64.170,72€) e tamén con recursos municipais.

O camiño de Meizoso a Biduido percorre 2,9 quilómetros e o seu ancho vai dos 3 aos 3,5 metros, mentres que o ramal de Meizoso ata a estrada provincial ten 700 metros de lonxitude e un ancho de tres metros. Ambos os dous presentan un importante grao de deterioración e cómpre abordar a súa mellora.

A actuación vai consistir na limpeza e perfilado dos foxos, así como nunha escavación na zona de mordentes á saída de Meizoso en dirección a Biduido, na marxe dereita, para corrixilos, e tamén na construción dunha gabia de formigón nunha zona da Condocia para canalizar un efluente que corre ao lado do camiño. Despois farase o recheo de fochancas e finalmente un doble tratamento superficial para darlles aos camiños unhas condicións máis acordes ao tráfico que soportan.

O prazo de presentación de ofertas, para as empresas interesadas, está aberto ata o vindeiro 9 de agosto. Unha vez adxudicados os traballos, o prazo de execución será dun mes.

O Concello de Cedeira adxudicou a subministración dun punto limpo móvil que contribuirá a mellorar a xestión dos residuos do municipio. O contrato asinarase cun prezo de 19.311,60€ (IVE incluído) e cunha mellora sustancial no prazo de garantía, que abranguerá en total cinco anos. O goberno local tramitou unha axuda diante da Consellería de Medio Ambiente para financiar case na súa totalidade este equipamento, que na práctica suporá levar un punto limpo polas diferentes parroquias e puntos do municipio para facilitar á veciñanza o depósito dos residuos.

O punto limpo móvil irá nun remolque que se poderá acoplar a algún dos vehículos de titularidade municipal. Unha vez que estea en funcionamento, o Concello anunciará cando e onde estará estacionado en cada unha das parroquias para que a xente poida ir a deixar restos de pintura ou disolventes, tubos fluorescentes e outros residuos con mercurio, baterías e acumuladores, equipos eléctricos e outros materiais, a través das 14 bocas situadas nos seus laterais.

O obxectivo do Concello é seguir avanzando na mellora da recollida separada dos residuos. Xa existe un punto limpo no polígono da Xunqueira, ao que se poden levar enseres os mércores de 16.00 a 20.00 e os sábados de 10.00 a 14.00h, porén este novo servizo será itinerante e facilitará o depósito á veciñanza das diferentes parroquias. Cómpre recordar que tamén dispón Cedeira de recollida separada de envases lixeiros, papel-cartón e vidro, así como dun servizo de recollidas periódicas de residuos voluminosos porta a porta e colectores de roupa e de aceite de cociña usado.

Desde a Concellería de Medio Ambiente do Concello de Cedeira confían en que este novo equipamento axudará a loitar contra o depósito incontrolado de lixo nos espazos naturais e recordan que todos e todas temos que tomar conciencia da importancia de coidar a contorna, entre outras cousas a través do depósito dos refugallos no lugar que corresponde

Lémbrase que o concello de Cedeira conta cun Punto Limpo e un servizo de recollida de enseres e voluminosos a domicilio, do que toda a veciñanza pode facer uso, para iso existen dúas opcións:

1. Achegar os residuos ás instalacións do punto limpo de Cedeira, no polígono da Xunqueira en horario de:

Mércores de 15:30 a 19:30 h e sábados de 10:00 a 14:00 h.

2. Chamar ao número de teléfono 605 028 892 para concertar cita para recollida a domicilio dos voluminosos.

Os residuos que se poden levar ao punto limpo ou solicitar a recollida a domicilio son:

• Escombros de pequenas obras domésticas (ata 25 kg)
• Ferralla
• Metais e restos metálicos (ata 60 Kg)
• Mobles
• Colchóns (máx 2 unids)
• Electrodomésticos e aparellos electrónicos
• Téxtiles
• Plásticos de silos e invernadoiros domésticos (ata 100 Kg)
• Baterías, pilas
• Tubos fluorescentes e lámpadas
• Aceites domésticos (máx. 8L)
• Aceites minerais (máx. 5L)
• Restos de disolventes, pinturas e vernices domésticos (máx. 1Kg)