Author: Ana

A biblioteca municipal López Cortón rexistrou 68 novas altas durante os meses de xullo e agosto, un 23% máis que no mesmo período do ano anterior e coas que chegou a sumar 5.579 persoas socias. Son 121 máis que ao finalizar o ano 2023, co que prosegue a evolución positiva que ten este servizo desde que quedou atrás o parón da pandemia.

Incrementouse tamén durante estes dous meses o número de préstamos respecto ao mesmo período do ano anterior. Foron desta volta 2.259, fronte aos 2.025 de xullo e agosto de 2023, dos que 1.153 foron para persoas lectoras adultas e os restantes 1.106 de libros infantís. A maioría, 1974, foron volumes escritos en castelán e 285 en galego.

A tendencia positiva no uso da biblioteca López Cortón tamén quedou patente no número de persoas que acudiron ás instalacións para ler alí libros ou xornais e outras publicacións. Foron durante xullo e agosto deste ano 3.705 persoas fronte ás 3.240 dos mesmos meses do pasado 2023, un 14% máis.

O Concello de Cedeira leva dende o 2018 encargándose, en colaboración coa asociación ABAC, da xestión das colonias felinas existentes no municipio.

Cóntase cun censo de colonias controladas, ás cales se lles aplicou o método CER (captura, esterilización e retorno) co fin de levar a cabo o control poboacional dos gatos comunitarios. Ademáis de efectuar labores de alimentación coordinadas, en horario, nas zonas e por persoas habilitadas para tal fin.

Esta xestión continúa a facerse coas novas colonias que van aparecendo, de cara ao cumprimento do artigo 39 da Lei 7/2023, de 28 de marzo, de protección dos dereitos e o benestar dos animais.

Polo que queremos recordar á veciñanza que, actos que ás veces se realizan de boa fé, como a alimentación libre na vía pública, a animais que puideran parecer en estado de abandono ou sen propietario, constitúen unha mala praxe de cara ás condicións de salubridade para todos e todas, ademáis de constituír unha acción sancionable.

No caso de querer colaborar no coidado das colonias felinas controladas, recomendamos ás persoas interesadas que se poñan en contacto coa asociación ABAC, a través das súas redes sociais (Facebook e Instagram), onde serán informadas dos termos de colaboración.

Cedeira recibe por segundo ano consecutivo as proxeccións do Ciclo Mestre Mateo, o programa co que a Academia Galega do Audiovisual e a Deputación da Coruña levan por toda Galicia, e este ano tamén ás comunidades galegas no exterior, as películas finalistas dos premios do cine feito na nosa lingua. O Auditorio Municipal da localidade vai acoller nove sesións de aquí ata finais de novembro comezando por este venres, ás 21.00h, co pase de “Fatum”, dirixida por Juan Galiñares e protagonizada por Luís Tosar. A entrada é de balde.

A de “Fatum” será a proxección inaugural do programa na provincia da Coruña. Trátase dun filme de acción no que Sergio, interpretado por Luís Tosar ten graves problemas co xogo. Despois de recibir un aviso sobre un suposto amaño dun partido de fútbol regresa á casa de apostas coa intención de recuperar o diñeiro perdido. Alí o seu destino cruzarase co de Pablo (a quen dá vida Álex García) un francotirador dos GEO. Os dous veranse envoltos nun atraco a unha casa de apostas, onde un disparo cambiará as súas vidas para sempre. A película foi finalista en cinco categorías nos XXII Premios Mestre Mateo: Mellor longametraxe, interpretación masculina protagonista, dirección, montaxe e vestiario.

Cedeira, xunto con Betanzos e Boiro, volven albergar este ano as proxeccións das longametraxes de ficción e documental finalistas dos Mestre Mateo, porén á lista complétase na provincia con A Laracha, Valdoviño e Vimianzo, que acollerán as proxeccións por vez primeira. O calendario do Ciclo Mestre Mateo en Cedeira abrangue as seguintes datas, sempre no Auditorio ás 21.00h: -Venres 27 de setembro: “Chichi e mais eu”. -Venres 4 de outubro: “Salta” . -Venres 11 de outubro: “A viaxe de Lucy”. -Venres 25 de outubro: “Emoción, vida e teatro: A nave das Marías”. -Venres 8 de novembro: “Espazos en brando”. -Venres 15 de novembro: pase das curtas “Antes de que se poña o sol”, “Nena”, “O Coidado”, “O neno sardiña” e “Ulises”. -Sábado 16 de novembro: pase das curtas de animación “Illa Cordura”, “In Half”, “O monstro e a nena” e “To Bird or not to bird”. -Venres 22 de novembro: “Matria”. -Venres 29 de novembro: “O Corno”.

Cómpre recordar que, tamén esta fin de semana, Cedeira ten outra cita cinematográfica. O Auditorio acollerá o domingo ás 19.00h, o pase da curtametraxe “Balle Voyage”, unha homenaxe ao mestre do suspense Alfred Hitchcock rodada no ascensor panorámico do Monte de San Pedro, na Coruña, con escenario e música espectaculares. Tras a proxección abrirase un coloquio cos actores protagonistas e ofreceranse tamén contidos inéditos da rodaxe. A entrada será de balde.

A axenda complétase cun novo espectáculo do ciclo “Cantos e Contos ao Solpor”, que este sábado chegará ao local da Asociación de Veciños de Régoa. Alí Sole Felloza compartirá historias recolleitas arredor da lareira e da cociña de ferro, da boda de mulleresque cociñan a lume manso. A cita será ás 20.00h.