Author: Ana

O proxecto do Xeoparque do Cabo Ortegal, á espera do primeiro ditame da UNESCO

O proxecto do Xeoparque do Cabo Ortegal presentouse onte, por vía telemática, ante a Comisión Nacional Española de Cooperación coa UNESCO, en Madrid. O acto tivo lugar no consistorio de San Sadurniño, aínda que a primeira intervención se realizou desde Santiago, a cargo da directora xeral de Patrimonio Natural, Belén do Campo, en representación do Goberno autonómico. Despois tomou a palabra Beatriz Bascoy, alcaldesa de Moeche e presidenta de quenda da asociación de concellos que xestiona este proxecto, en nome dos sete concellos.

Francisco Canosa, doutor en Xeoloxía e director científico do proxecto, presentou a columna vertebral do proxecto, que vira ao redor dos valores xeolóxicos do territorio, formado polos municipios de Cariño, Cedeira, Cerdido, Moeche, Ortigueira, San Sadurniño e Valdoviño. E Ignacio Fernández, técnico de Desenvolvemento Local do Concello de San Sadurniño, resumiu o potencial socioeconómico.

Tamén estiveron presentes na videoconferencia os alcaldes de Cerdido, Benigno Galego, e Cedeira, Pablo Moreda, xunto coa concelleira de Turismo, Carmela Prieto. Os participantes presenciaron a presentación das outras dúas candidaturas deste ano, ambas as de Cantabria. Antes do 9 de outubro, a comisión remitirá suxestións sobre o contido inicial do dossier remitido a Madrid, e unha vez efectuadas as posibles correccións e a tradución ao inglés, o 30 de outubro remitirase á UNESCO. Canosa lembra que, a comisión nacional só pode presentar un máximo de dúas candidaturas cada ano. «Iso si, dixéronnos que aquelas que poidan quedar fóra pódense volver presentar o ano que vén», comentou Canosa tras a presentación telemática.

Fonte da noticia: La Voz de Galicia

IR Á LIGAZÓN O proxecto do Xeoparque do Cabo Ortegal, á espera do primeiro ditame da UNESCO

O colexio de Cedeira converte un vello patio nun horto que pode usarse para dar clase

O CEIP Nicolás del Río transformou un vello patio, abandonado, nun horto e un espazo que pode usarse tanto con fins educativos -non só pola propia plantación senón porque incluíron unha lousa para poder impartir clase- como lúdicos, como lugar para os recreos. «Co tema do covid-19 pensamos que había que aproveitar todos os patios interiores, ao ter que dividir os grupos. Había un interior que non se usaba e co orzamento do colexio e, sobre todo, coa axuda do Concello de Cedeira e de Mobles García, cambiámolo todo», explica a directora, Marta Cameselle. Os traballos comezaron antes do verán e culminaron en agosto, da man de persoal municipal e dos propios docentes. Entre todos lograron acondicionar unha superficie duns 200 metros cadrados.

O resultado foi «ounha horta e unha serie de actividades de dinamización, cun bancal para cada curso, onde os alumnos van plantar algo que dea froita, flor e tamén verdura, segundo a temporada e vendo a súa evolución», sinala Cameselle. Tamén hai mesas circulares que, de momento, polas restricións da pandemia, só poderán utilizar os grupos de convivencia, para traballar ao aire libre. Con esta iniciativa, o colexio gaña unha actividade, o horto, e un espazo «para que todos os grupos poidan estar separados nos recreos cando fai bo tempo», apunta a directora. Hai outros tres patios, xa habilitados, entre os que se reparten os alumnos do centro.

Polo patio da horta pasarán todos os colexiais, de xeito periódico, primeiro para limpar as herbas malas e abonar, e despois para plantar e realizar un seguimento das distintas especies cultivadas. A maiores, o Concello instalou un compostero, onde os escolares depositan os restos de froita que van tirando nun cubo en clase.

Fonte da noticia e fotografía: La Voz de Galicia

IR Á LIGAZÓN O colexio de Cedeira converte un vello patio nun horto que pode usarse para dar clase

O Concello suma novas zonas cardio protexidas coa compra de catro desfibriladores máis

O goberno local de Cedeira acaba de investir 5.552 euros na compra de catro novos desfibriladores para diferentes espazos municipais, dando así un paso máis nunha campaña que xa iniciara no ano 2017 coa subministración dos dous primeiros, ao que sumou outro o pasado ano. O alcalde, Pablo Diego Moreda Gil, entregou en días pasados dous destes desfibriladores á Asociación de Veciños de Piñeiro e ao local social de Saa, e informou de que os outros dous irán destinados á Casa do Concello, ao Auditorio Municipal, e aos antigos escolares de Saa e Figueiras.

O alcalde subliñou que Cedeira amplía as súas zonas cardio protexidas, ao sumar xa sete desfibriladores a disposición da poboación. Recordou que os dous primeiros foron para o campo de fútbol municipal do Beco e para o Polideportivo, e que o último, que o Concello incorporou o ano pasado, foi para o CEIP Nicolás do Río, onde estivo dispoñible para posibles urxencias na praia durante o verán.

“Os desfibriladores son equipamentos que poden ser vitais para a supervivencia dunha persoa no caso de parada cardiorespiratoria, de maneira que é evidente a importancia de contar con este recurso”, dixo o alcalde.