SERVIZOS

O Concello de Cedeira recupera o antigo escolar de Santalla para darlle un uso social e turístico

O Concello de Cedeira recupera para uso público o antigo escolar de Santalla, unha propiedade municipal utilizada durante os últimos sete anos pola Organización Juvenil Española(OJE). Esta decisión responde á extinción, por mutuo acordo, do contrato que a administración local subscribira no 2013 coa entidade xuvenil e pon “freo ao erro histórico que foi a súa concesión”, segundo apuntou o alcalde, Pablo Diego Moreda Gil, no pleno no que a proposta do goberno resultou aprobada por unanimidade.

A recuperación da propiedade abre a posibilidade, segundo o rexedor municipal, de adaptar o inmoble para acoller un albergue na planta baixa e unha vivenda na superior. O albergue permitiría aloxar turistas e peregrinos, mentres que casa sería para casos de emerxencia social “moi necesaria”, segundo o alcalde. O antigo escolar, situado na parroquia de Cervo, consta dunha primixenia construción escolar á que posteriormente foi engadido un soportal.

O pleno, que tivo carácter extraordinario, serviu tamén para aprobar un remanente de tesourería que, por un importe de 408.509,59 euros, dará lugar a un conxunto de 45 actuacións. Algunhas delas son: a subministración de máis de 900 lámpadas led para distintos lugares da zona rural, a mellora de camiños públicos en Fernando Lago, Cordobelas e Bouzas e a construción de beirarúas no cemiterio municipal. Tamén se contempla a realización dunha nova rede de saneamento na rúa Amor Hermoso, a pavimentación de pistas municipais, a recuperación integral do río Condomiñas a realización dun mural exterior na escola infantil e o arranxo de fontes públicas. Este punto saiu adiante cos votos a favor do equipo de goberno e do BNG e a abstención do grupo popular.

Esta mesma votación repetiuse con respecto á proposta da Alcaldía pola que se delega na Xunta de Goberno o establecemento e modificación do prezo público para a prestación de campamentos e demais actividades dirixidas á poboación infantil. Desde o equipo de goberno destácase a necesidade deste acordo para dar continuidade á celebración do campamento que a ANPA Picapeixe, do colexio Nicolás del Río, organiza durante os meses de verán para escolares de Infantil e Primaria.

Outros asuntos tamén aprobados foron a declaración de interese público da obra de construción do fogar residencial de maiores e vivendas comunitarias; o establecemento dun complemento retributivo aos empregados públicos en situación de incapacidade temporal ou licenza por enfermidade;, as solicitudes de participación no POS+Adicional para gastos sociais derivados da COVID-19 e a aprobación das bases da subvención para o funcionamento das escolas de música da localidade. Na sesión plenaria tamén tivo lugar o sorteo das mesas electorais para os comicios autonómicos do próximo mes.

O pleno aprobou o orzamento municipal para este ano, que supera os 6 millóns de euros

O goberno de Cedeira xestionará este ano un orzamento de 6.299.684,12 euros, o que representa un incremento do 11,88% con respecto ao agora vixente (de 5. 630.601euros).

O asunto resultou aprobado na sesión celebrada o xoves pola corporación municipal e saíu adiante cos votos a favor do executivo local e coa abstención do PP e do BNG, un xesto que agradeceu o alcalde, Pablo Diego Moreda Gil, por entender que “todos estamos a traballar na mesma liña nun proxecto social de recuperación para as nosas familias que, por suposto, tamén é o proxecto de todos os partidos que formamos parte da corporación municipal”.

O rexedor municipal destacou así mesmo o traballo que fixo o equipo de goberno á hora de elaborar un orzamento “pensado para cubrir as necesidades sociais dos veciños/as e destinado a axudar ás persoas máis vulnerables e aos sectores máis prexudicados economicamente polo coronavirus. De feito, “as contratacións para persoal de atención ao servizo de axuda no fogar incrementouse máis de 80.000 euros con respecto ao ano pasado para atender aos máis dependentes”, segundo o executivo local. Un plan para combater a emerxencia social de 50.000 euros e outro de 150.000 para axudar a todas aquelas empresas e autónomos que viron a súa actividade paralizada pola pandemia están xa recollidos no documento aprobado o día 4. A dinamización do comercio e da hostalería de Cedeira tamén é outra das prioridades do goberno local e boa mostra diso é o proxecto de dinamización que o goberno prevé contratar en xullo coa entrada en vixencia dos orzamentos agora aprobados.

O goberno cedeirense manterá así mesmo unha política continuísta con respecto ao investimento en saneamento, con preto de 368.000 euros, e tamén no relativo á optimización do sistema de alumeado público, tanto na zona rural como na vila, cun gasto superior aos 143.000 euros para este ano. Adaptar o antigo pazo de Moscoso para acoller dependencias municipais e destinar máis de 100.000 euros á mellora de pistas municipais e desbroces son outros investimentos previstos polo executivo para este 2020, así como a contratación dun Plan de Igualdade e un proxecto de orzamentos participativos para a mocidade. Para este último, o equipo de goberno traballará conxuntamente co alumnado do IES Punta Candieira.

Haberá novos investimentos para continuar coas excavacións no xacemento do Sarridal -un a cargo do Concello e outro financiada para Xunta de Galicia- e, no relativo ao capítulo das subvencións de libre concorrencia para fomentar a cultura e deporte, no documento contable figuran as mesmas cantidades orzamentadas que ano pasado. En canto as axudas directas serán percibidas pola Escola de Música, Museo Mares de Cedeira, Apader, Agrupación local da Cruz Vermella, Asociación sobre Rodas, Asociación polo Benestar Animal (ABAC), Asociación Ecuestre “A crina”, Protección Civil, ANPAs Picapeixe e O beco, Asociación Amigos dos Ríos e Banda de Música Vila de Cedeira. Entre unhas e outras o Concello de Cedeira repartirá un total de 188.300 euros.

Con respecto ao capítulo de ingresos consignase unha baixada de 106.000 euros na recadación dos impostos directos (un 5,05%) pola a parálise da actividade económica pero, polo contrario, aumenta en 124.876,38 euros as transferencias correntes. Nelas se inclúen as achegas da Deputación da Coruña para gastos sociais extraordinarios derivados do Covid-19 e as destinadas á execución de obras. Estas últimas incrementanse un 75,64% respecto ao 2019.