Skip to content Skip to left sidebar Skip to footer

SERVIZOS

O CONCELLO LICITA POR UN ORZAMENTO DE 63.000€ A MELLORA DE MÁIS DE 1,6KM DE CAMIÑOS MUNICIPAIS

A Xunta de Goberno do Concello de Cedeira aprobou o expediente de contratación das obras de mellora de tres camiños situados no Barral (Esteiro), Casal de María (San Román) e na Ferrería (Montoxo) por un importe total de 63.007,81€ (IVE incluído). A actuación nestes tres viais, cuxo anuncio de licitación está xa publicado na Plataforma de Contratación do Sector Público, abórdase con cargo á financiación procedente do Plan de Mellora de Camiños Municipais da Axencia Galega de Desenvolvemento Rural.

Os tres camiños suman unha lonxitude de 1,6km e teñen en común que os seus tratamentos asfálticos presentan xa algúns deterioros e irregularidades. O máis longo é o da Ferrería, na parroquia de Montoxo, que percorre 756 metros e ten un ancho medio de entre 3,20 e 3,50 metros, aínda que conta cun tramo de 79 metros no que o ancho é maior, de 4,50 metros. Neste camiño, que vai da AC-566 á Igrexa de San Xiao de Montoxo, os traballos consistirán na limpeza das gabias, o barrido da superficie e a posta dunha nova capa de asfalto.

A mesma actuación vaise levar adiante no camiño situado no Barral, na parroquia de Esteiro, que dá servizo desde a estrada AC-566. Este vial ten 435 metros de lonxitude e un ancho medio de 3,20m. Por último, a mesma intervención farase no camiño do Casal de María, en San Román, que percorre 416 metros entre a CP-2202 e a AC-566 e ten un ancho medio de 3,40m.

O prazo de execución das obras será de dous meses e as empresas interesadas teñen ata o 25 agosto de prazo para a presentación das súas ofertas.

“AS7PARROQUIAS” DESTACA NO SEU ÚLTIMO NÚMERO O INVESTIMENTO DE 2,6M€ DO GOBERNO CENTRAL EN CEDEIRA

O Concello de Cedeira está a distribuír estes días entre a veciñanza unha nova edición do boletín informativo “As7Parroquias”, no que recolle as novidades máis destacadas do traballo municipal dos últimos meses. Así, neste número 18 da publicación destaca a noticia do compromiso acadado polo Ministerio de Transición Ecolóxica de financiar con 2,6 millóns de euros a rexeneración da praia da Madalena e o proxecto de recuperación da antiga cetaria das Sonreiras, así como a modificación de créditos aprobada polo pleno, a través da cal o Concello incorpora máis de medio millón de euros ao capítulo de investimentos deste ano, procedentes de remanentes do pasado 2020.

O novo programa de axudas creado polo Concello de Cedeira para paliar o impacto da covid nas empresas e autónomos da vila, dotado con 70.000 euros, é outra das cuestións das que informa o boletín. “As7Parroquias” tamén dá conta da execución dos orzamentos participativos, coa realización do parque de calistenia e o ciclo de auto-cine, así como da presencia de Cedeira na última edición de Fitur.

O rexeitamento aos proxectos de parques eólicos mariños que proxecta Iberdrola no litoral próximo a Cedeira e tamén ao parque eólico terrestre Badulaque é tamén un tema que aborda o boletín, en cuxas páxinas o Concello informa igualmente da recente contratación de todos os suministros enerxéticos municipais de fontes renovables. A nova ordenanza de protección de camiños municipais e o apoio do Concello á flota pesqueira fronte ao regulamento proposto pola Unión Europea son outros dos temas que aborda a publicación.

A Banda de Música Vila de Cedeira protagoniza desta volta a contraportada do boletín, despois dunha recente renovación na directiva. O relevo xeracional garante o futuro desta formación, con grande arraigamento na localidade e cun espíritu bulideiro que a leva a integrar todo tipo de músicas no seu repertorio.

Pódese descargar o boletín na seguinte ligazón:

DESCARGA Boletín nº 18

O CONCELLO ACOMETERÁ A MELLORA DE MÁIS DE 1,2KM DE BEIRARRÚAS CON CARGO AO POS+ADICIONAL

O goberno local aprobou no último pleno a proposta para investir os fondos procedentes do POS+Adicional por maior achega da Deputación no proxecto de “Mellora das beirarrúas na Avenida de España, as rúas Ponte Nova, José Pascual Lopez Cor, Salinas e Camiño de Pitilleira”. Segundo informa o alcalde, Pablo Diego Moreda Gil, o Concello de Cedeira conta cun orzamento de 241.926,09€ deste plan provincial, dotado cos fondos procedentes das baixas nas adxudicacións, e o devandito proxecto está presupuestado en 219.932,78. Así, aínda quedarán preto de 22.000€ para unha segunda fase que o goberno local prevé destinar á mellora de diferentes camiños e viais de titularidade municipal.

O proxecto que se vai acometer nesta primeira fase servirá para mellorar máis de 1.200 metros lineais de beirarrúas en cinco viais diferentes do casco urbano de Cedeira. Así, na Avenida de España, rúa José Pascual López Cor, Camiño de Pitilleira e Salinas levantarase o pavimento actual, que se atopa bastante deteriorado, para instalar unhas losas rectanculares de formigón granallado, mentres que na Ponte Nova colocaranse losas de pedra granítica.

A substitución de beirarrúas realizarase en todos os tramos das rúas citadas, salvo en López Cor, onde o cambio afectará só a unha das marxes. No caso do tramo da Avenida de España comprendido entre as rúas Vila Méjico e As Pontes de García Rodríguez, aproveitarase a intervención para ampliar as beirarrúas e darlles un ancho de 1,80 metros.

O goberno local ten previsto levar ao próximo pleno o segundo proxecto do POS+Adicional, que incluirá melloras en viais de Santalla, Candelas, Cordolelas e Santallamar.