NOVAS

ADXUDICADAS AS OBRAS DE CONSOLIDACIÓN E REPARACIÓN DOS ANTIGOS ESCOLARES DE SAA E SISALDE

A Xunta de Goberno de Cedeira aprobou a adxudicación da obras de consolidación e reparación da cuberta nos antigos centros escolares de Saa e Sisalde, un proxecto que o Concello acomete con cargo ao POS+2021. A empresa Obras Gallaecia foi a que presentou a oferta mellor valorada, entre as sete que concurriron ao proceso de licitación, cun orzamento de 73.260,73€ (IVE incluído).

As dúas construcións son exemplos de arquitectura indiana e testemuños do esforzo que a emigración da zona fixo para mellorar a vida e a educación da veciñanza da súa localidade de orixe. As dúas edificacións, hoxe empregadas para usos comunitarios, foron promovidas pola mesma sociedade de instrución e beneficencia “Progreso de Esteiro”, fundada na Habana. Ambas as dúas tiñan no seu tempo unha aula de nenos e outra de nenas na planta baixa e a casa do mestre no primeiro piso. Ambas as dúas están catalogadas e a intervención conta co visto bo da Dirección Xeral de Patrimonio.

A de Saa data do ano 1925 e está afectada por filtracións de auga e humidades na cuberta e na cornisa perimetral que provocaron o deterioro do tramado de madeira. O goberno local pintara recentemente o edificio e cambiara a carpintería exterior, ao igual que no antigo escolar de Piñeiro, non obstante a súa conservación precisaba desta intervención. Pola súa banda, o antigo escolar de Sisalde Maior foi levantado en 1931 e necesita a urxente consolidación e reparación dos muros, a cuberta e os caleiros. A súa estabilidade está en perigo, como o anterior inmoble, polas humidades que afectaron ás vigas, estrutura de madeira e muros de carga.

En ambos os dous edificios, os traballos que vai executar a empresa Obras Gallaecia vai consistir na sustitución dos elementos deteriorados, o saneamento das pezas de madeira que poidan ser recuperadas, a impermeabilización de muros e o reforzo estrutural en determinados puntos. O prazo de execución é de seis meses.

VOLVE O CICLO “CANTOS E CONTOS AO SOLPOR” CON ESPECTÁCULOS DE CONTACONTOS E MÚSICA

O Concello de Cedeira abre o vindeiro domingo unha nova edición do ciclo “Cantos e contos ao solpor”, un programa de tres espectáculos que vai viaxar por outras tantas parroquias do municipio para pasar páxina do verán e recibir ao outono da man do teatro, a música e as historias populares.

O actor Avelino González será o primeiro contador este sábado, ás 20.00 horas, no local social de Tarroiba, en Cervo (Santalla). Alí presentará o espectáculo “A todo Risco”, no que fala de Vicente Risco e tamén da Xeración Nós. Segundo reza a presentación deste monólogo, Vicente Risco “era un coñón, noctámbulo, bohemio, que gustaba do baile e de gozar da vida ata altas horas da madrugada. Gustaba da sauna e da meditación e do viño tostado e fundou a primeira congregación budista de Galicia. Sabía e practicaba o humor como xabre que daba solidez, perenne e sólida, ó estarmos no mundo”.

A seguinte cita con “Cantos e contos ao solpor” será o 18 de setembro, tamén ás 20.00 horas, no local social da asociación de veciños de Montoxo. Bieitta James e Pepe King ofrecerán “Blues do país”, un concerto no que este estilo musical adáptase ao galego “con extra de retranca”. A parella de músicos reinterpreta os clásicos e os axustan á nosa realidade.

Cándido Pazó protagonizará a última cita deste programa o día 2 de outubro, ás 20.00 horas, no local veciñal de San Román. O coñecido actor levará ata alí o seu espectáculo “Botando a lingua a pastar”, no que recolle contos da tradición oral, historias extraídas e adaptadas de diferentes obras literarias e outras de creación propia. O humor e a empatía oral estarán no fío condutor desta proposta.

ADXUDICADA POR MÁIS DE 51.000€ A OBRA DE MELLORA DE TRES CAMIÑOS MUNICIPAIS NA ZONA RURAL

A Xunta de Goberno do Concello de Cedeira aprobou a adxudicación das obras de mellora de tres camiños de titularidade municipal situados no Barral (Esteiro), Casal de María (San Román) e Ferreira (Montoxo), por un importe de 51.042,63€ (IVE incluído). A empresa Lancer Proyectos y Obras será a encargada dos traballos, financiados con cargo ao Plan de Melora de Camiños Municipais da Axencia Galega de Desenvolvemento Rural (Agader).

Os tres viais nos que se vai actuar suman máis de 1,6km de lonxitude. As obras consistirán na limpeza de gabias, o barrido da superficie e o recheo das fochancas onde as haxa e na posta dunha nova capa de asfalto, que proporcionará maior seguridade vial aos camiños, situados en diferentes parroquias da zona rural de Cedeira.

O máis longo dos viais incluídos nesta actuación é o da Ferrería, situado na parroquia de Montoxo, que percorre 756 metros e ten un ancho medio de entre 3,20 e 3,50 metros, aínda que conta cun tramo de 79 metros no que o ancho é maior, de 4,50 metros. Neste camiño, que vai da AC-566 á Igrexa de San Xiao de Montoxo. Levaranse tamén adiante as obras de mellora no camiño situado no Barral, na parroquia de Esteiro, que dá servizo desde a estrada AC-566. É un vial de 435 metros de lonxitude e un ancho medio de 3,20 metros. O terceiro camiño é o do Casal de María, en San Román, que percorre 416 metros entre a CP-2202 e a AC-566, cun ancho medio de 3,40 metros.

O prazo de execución das obras será de dous meses.