NOVAS

O MUSEO MARES DE CEDEIRA OFERTA VISITAS SOBRE AS ARTES DE PESCA E ORGANIZA UNHA MESA REDONDA SOBRE SUSTENTABILIDADE

O PROXECTO “CEDEIXURA-PESCA DE COSTA”, financiado polo GALP A MariñaOrtegal e o Fondo Europeo e Marítimo de Pesca está coordinado pola CONFRARÍA DE PESCADORES DE CEDEIRA, tendo como socio ao CONCELLO DE CEDEIRA. Ten como cometido darlle visibilidade á calidade diferencial da pesca de baixura e do marisqueo, implicando ademais, neste obxectivo, ao sector hostaleiro.

Así, no pasado mes de xuño, celebráronse diversos “showcooking profesionais” nos que participaron Iñaki Bretal, Estrela Michelín 2021 e Miguel A. Campos ex-presidente, do Grupo Nove. Nestas sesións formativas, que estiveron dirixidas aos establecementos hostaleiros de Cedeira, xa se explicaba como son os procesos de extracción, o control da calidade e a garantía da trazabilidade, de cara á elaboración de propostas culinarias, baseadas en produtos da pesca de costa e do marisqueo.

En agosto, tamén tivo lugar a regata de traiñeiras, na que se promoveu a imaxe de marca “Pesca de Costa” durante o evento, como acción de sensibilización sobre a calidade diferencial dos produtos mariños de Cedeira, nun encontro deportivo de gran afluencia de público e con gran recoñecemento na identidade do pobo.

Agora, no mes de setembro, o proxecto continúa con actuacións de sensibilización sobre a sustentabilidade e as características da extracción artesanal. Deste modo, prográmanse unha serie de visitas guiadas sobre as artes de pesca utilizadas para a pesca de baixura (volanta, rascos, palangre, miños), que terán lugar no Museo Mares de Cedeira.

Nas salas do museo pódense observar distintos aparellos de pesca (garabetas, caceas, nasas, redes, mallas…) e maquetas de barcos, ademais de embarcacións tradicionais, de carpintería de ribeira.

Ademais, o Museo Mares de Cedeira, ten programado para o venres 24 de setembro ás 18,00 horas unha mesa redonda titulada “Responsables co mar”, na que participaran dúas mulleres da xunta directiva da “Asociación Museo Mares de Cedeira”, Isolina Díaz Novo e María del Carmen Pérez Muíño, Iria Freire Pérez, a bióloga da Confraría, ademais do colectivos de mariscadoras, percebeiros e diversos representantes de oficios relacionados co mar.

Tanto para obter máis información deste encontro, como para reservar prazas para as visitas guiadas, que están limitadas a un total de 20 persoas por grupo, pódese contactar co Museo mediante o seguinte correo electrónico: museomaresdecedeira@gmail.com

CONCELLO E DIRECCIÓN DO CEIP NICOLÁS DO RÍO SUMAN ESFORZOS PARA MELLORAR AS INSTALACIÓNS DO CENTRO

O Concello de Cedeira investiu algo máis de 10.000€ nas obras de renovación do pavimento de caucho da zona de xogos dos nenos e nenas de Infantil no CEIP Nicolás do Río. Segundo explicou o alcalde, Pablo Diego Moreda Gil, a actuación é froito dun acordo polo que o centro e a administración local asumiron o custo ao 50%, no que “se pon de manifesto unha vez máis o positivo clima de colaboración que temos co colexio e a nosa vontade de contribuír á mellora dos recursos da educación pública”.

Moreda explicou que o goberno local respostou a unha proposta de colaboración do propio centro, que suxeriu unha actuación para garantir a durabilidade do pavimento, que tiña xa moitas losetas levantadas e deterioradas. “Convimos a realización destas obras, un exemplo máis de como a suma de esforzos, por parte da dirección do colexio e do Concello, fai que consigamos máis cousas”.

Os traballos consistiron na retirada das pezas deterioradas do vello solo de caucho e a súa substitución por novas losetas, axuste, limpeza e recheo das xuntas para darlle unha capa final coloreada que aporta continuidade aos 340 metros cadrados de superficie deste espacio de xogos. O Concello de Cedeira asumiu a mitade da obra –en total tivo un orzamento de pouco máis de 22.000€-, que xa está rematada e lista para o comezo do novo curso.

É unha intervención máis das que nos últimos anos asumiu o Concello de Cedeira para o mantemento e mellora das instalacións do CEIP Nicolás do Río. Así, o persoal municipal traballou o pasado ano na adecuación doutra zona de xogos que facilitou a separación de grupos, contratouse a construción dun teito de abrigo no corredor de acceso ao centro, a realización dun mural no peche e o pulido do solo do polideportivo, entre outras actuacións. O goberno local facilitou tamén o pasado ano máscaras e xel hidroalcohólico á comunidade educativa, coa que a colaboración discorre igualmente, dun xeito moi construtivo, na organización de diferentes actividades ao longo do ano.

AS VISITAS Á OFICINA DE TURISMO MEDRARON ESTE ANO UN 70%, FUNDAMENTALMENTE CON VISITANTES NACIONAIS

A Oficina de Turismo de Cedeira recibiu durante os meses de xullo e agosto deste ano un total de 4.240 visitas de persoas procedentes de diferentes puntos de España, fundamentalmente. A afluencia supón un incremento de preto do 70% con respecto ao mesmo período do pasado ano e aproxímase ás cifras pre-pandemia, polo que a concelleira de Turismo, Carmela Prieto, evaluou moi positivamente o desenvolvemento da campaña e a súa repercusión na economía da vila.

Segundo os datos recollidos na Oficina de Turismo, foron 1.710 en xullo e 2.525 en agosto as persoas que se achegaron polo servizo para recoller información dos principais atractivos de Cedeira e a súa contorna. A práctica totalidade foi turismo nacional e aproximadamente un 5% viu de fóra de España. Os estranxeiros foron poucos, pero si máis que o pasado ano, cando segundo recorda a técnica responsable da oficina, Mar López, chegaran unicamente un ou dos grupos que arribaron a Cedeira en barco. Desta volta xa volveron viaxeiros doutros países en coche ou caravana, en avión e tamén de novo en iates.

Entre o turismo nacional, o grupo máis numeroso foi o procedente de Madrid, seguido de Cataluña, País Vasco, a propia Galicia, Castilla y León –destacou o número de persoas de Burgos-, Aragón –cunha tamén salientable afluencia de xente de Zaragoza- e Andalucía, entre outras comunidades. Das visitas estranxeiras, destacou Francia e houbo tamén xente de Inglaterra, Alemaña e Bélxica.

As personas que se achegan á Oficina de Turismo fanno para coñecer fundamentalmente que poden visitar dentro do municipio e entre os seus intereses destacan o núcleo de Santo André de Teixido, a ruta dos miradoiros, os cantís de Herbeira, o castro de Sarridal, o Museo Mares e as praias, así como o sendeirismo. Esta última foi unha opción que cobrou forza entre os viaxeiros xa o pasado ano e que en Cedeira conta con moitas alternativas: as xeorrutas, os roteiros “Descobre Cedeira” e o Camiño a Santo André son as máis destacadas.

Concello de Interese Turístico

A Oficina de Turismo do Concello de Cedeira está situada no Palacete Municipal e abre as súas portas durante todo o ano, como corresponde a un municipio declarado pola Xunta de Galicia como de Interese Turístico. Durante este verán son tres as persoas que atenden e informan aos visitantes, aos que ademais de proporcionar orientación sobre os atractivos do municipio facilitan explicacións e documentación sobre outros recursos nas comarcas de Ortegal e de Ferroterra.

O horario de atención durante o verán, que se vai manter en setembro, é moi completo: de luns a venres, entre as 09.00 e as 14.30 horas polas mañás e de 15.30 a 21.00 polas tardes; os sábados de 10.00 a 14.00 e de 17.00 a 20.00 e os domingos polas mañás, de 10.00 a 14.00 horas.