Skip to content Skip to left sidebar Skip to footer

NOVAS

O GOBERNO LOCAL PIDE COMPRENSIÓN POLAS MOLESTIAS QUE PODEN OCASIONAR AS OBRAS EN MARCHA

O goberno local de Cedeira informou do comezo das obras de reforma integral da praza 18 de Decembro –tamén coñecida como a “dos cabalos”- e da construción da tirolina no parque do Camiño Real. O alcalde, Pablo Diego Moreda Gil, pediu á veciñanza paciencia e comprensión polas molestias que poden ocasionar estas actuacións e asegurou que se tentará axilizalas ao máximo. “Sabemos que as obras provocan incomodidades, pero cómpre recordar que se fan para ter mellores equipamentos e que todos e todas poderemos gozar do resultado”, explicou o rexedor.

As obras na praza 18 de Decembro van restrinxir temporalmente o número de prazas de estacionamento na zona, por exemplo. Porén, este investimento –de máis de 270.000€- vai dotar á vila dun espazo para o lecer cuberto e ao abrigo do vento.

Na zona do Camiño Real, o Concello de Cedeira ten xa rematada a construción do skate bowl, un novo espazo para o ocio da mocidade. No mesmo proxecto, adxudicado por preto de 121.000 euros, está a instalación dunha tirolina de 28 metros de largo, cunha altura de catro metros na saída e tres na chegada, que se está a colocar tamén estes días preto da randeeira hexagonal que está no mesmo parque.

SATISFACCIÓN NO CONCELLO POLA INICIATIVA DE CREAR UNHA PLANTA DE PROCESADO DE MERLUZA NA TRABE

O goberno local de Cedeira celebra a iniciativa da empresa Juan García Pesca, que vai crear no polígono da Trabe unha nave de procesamento e despece da merluza DoNorte, a marca creada e presentada o pasado verán coa que se identifica a calidade da pescada en Cedeira. O proxecto vai crear vinte empregos.

O alcalde, Pablo Diego Moreda Gil, felicitou expresamente ao empresario Juan García por apostar polo sector pesqueiro de Cedeira e contribuír a darlle un novo valor engadido ao produto.

Máis información sobre o proxecto:

https://www.lavozdegalicia.es/noticia/ferrol/cedeira/2022/01/16/merluza-donorte-procesara-cedeira-vender-espana/0003_202201F16C9991.htm

O CONCELLO RETOMA A VINDEIRA SEMANA OS TALLERES DE MEMORIA E AS CLASES DE XIMNASIA TERAPÉUTICA

O Concello de Cedeira retoma a vindeira semana os talleres de memoria e as clases de ximnasia terapéutica que xa formaron parte nos últimos anos da programación de actividades que promove a Concellería de Servicios Sociais durante os meses de inverno, de xeito gratuíto, para a veciñanza. Son dúas propostas que contan cunha excelente acollida entre as persoas maiores.

Os talleres de memoria comezarán o día 17 e se desenvolverán nas tardes de cada luns e venres, en dúas quendas ás 16.00 e 17.30 horas. A actividade será na cafetería do Centro Sociocultural de Cedeira e desde o Concello indican que as persoas que xa participaron en edicións anteriores poden inscribirse directamente acudindo a unha das clases. Quen non estivera antes nos talleres deberá inscribirse nas oficinas de Servizos Sociais (de 10.00 a 13.00 horas).

Pola súa banda, a ximnasia terapéutica é unha actividade que corre a cargo dunha fisioterapeuta e que se desenvolve en diferentes parroquias. Neste caso as clases serán os martes e os xoves, a partir da vindeira semana. O local social de Esteiro acollerá a clase os martes ás 09.30 horas, mentres que na cafetería do Auditorio Municipal desenvolveranse na mesma xornada dúas quendas, ás 11.00 e ás 12.00 horas. Os xoves, a ximnasia terapéutica chegará aos locais veciñais de Montoxo (09.30 horas), San Román (10.45h) e Santalla (12.00h). Ao igual que no caso anterior, as persoas que xa participaron en anos anteriores so teñen que acudir ás sesións, mentres que as novas inscricións deben facerse en Servizos Sociais.

Desde o goberno municipal subliñan os beneficios que estas actividades teñen para as persoas maiores, tanto pola súa saúde física como mental, xa que favorecen a socialización e a convivencia.