Skip to content Skip to left sidebar Skip to footer

MEDIO AMBIENTE

O CONCELLO DE CEDEIRA DISTRIBÚE ESTES DÍAS UN NOVO NÚMERO DO BOLETÍN INFORMATIVO AS7PARROQUIAS

O Concello de Cedeira ten xa colgado na súa web e está a distribuír polas entidades veciñais e sociais do municipio un novo número do boletín informativo As7Parroquias, ferramenta de transparencia que traslada á cidadanía o traballo do goberno local. Nesta edición, que fai a número 24, faise balance das festas e eventos lúdicos e deportivos de este verán e repásanse, como é habitual, as obras en curso ou recentemente executadas. A consecución do título de Xeoparque Cabo Ortegal ocupa tamén un espazo destacado, subliñando o vieiro de oportunidades que representa entrar neste importante club da Unesco de lugares xeoloxicamente únicos.

A publicación fai un percorrido polos eventos deste verán, desde as verbenas e demais actos das Festas da Patroa ata a Festa do Percebe e os encontros culturais e deportivos máis destacados, citas que tiveron en común sempre unha alta participación e o bo ambiente. Dase conta tamén no boletín da nova distribución de responsabilidades e a composición das comisións dentro do goberno local, despois do acordo que acadaron o PSOE e o BNG no mes de xullo.

A visita ás obras que a Deputación está a acometer na zona do Rego de Tide para mellorar o trazado da estrada provincial que vai a San Andrés, así como a aprobación do Plan Contra Incendios Forestais de Cedeira están tamén neste novo número de As7Parroquias. O mesmo que o recoñecemento ao Xeoparque Cabo Ortegal e a recente reunión que mantieron o alcalde, Pablo Diego Moreda Gil, e o concelleiro de Patrimonio, José Antonio Rodríguez, coa directora xeral de Patrimonio Cultural da Xunta de Galicia, María del Carmen Martínez Insua, para tratar os próximos pasos a dar na escavación arqueolóxica do Sarridal.

No capítulo de obras, As7Parroquias repasa proxectos xa executados ou a piques de rematar, como son a ampliación do saneamento das Pontigas, a senda peonil do camiño de Cordobelas, o arranxo das pistas de pádel ou a renovación da pista multideporte e o marcador do Polideportivo, así como outras que están en proceso de contratación como o cambio das caldeiras da piscina municipal e do ascensor do Auditorio, a ampliación do ximnasio e a colocación de novo céspede artificial no campo do Beco, entre outras. Infórmase tamén da solicitude de fondos, a través de diferentes programas supramunicipais, para acometer outras actuacións, como por exemplo a dixitalización da piscina municipal para que entre nunha rede de instalacións “intelixentes” ou a creación dunha nova zona verde e de lecer na rúa Silva.

A contraportada desde número está adicada ao Cedeira Basket Club, unha entidade que está a traballar polo rexurdimento deste deporte na localidade despois de anos nos que a súa presencia decaera. O éxito do campionato 3×3 que organizou este verán é unha proba do éxito que está a ter a entidade no seu empeño.


VER PDF Boletín as 7 parroquias nº24

TRINTA VIVENDAS PARTICIPAN NA PRESENTE EDICIÓN DO PROGRAMA DE COMPOSTAXE DOMÉSTICA MUNICIPAL DO CONCELLO DE CEDEIRA

Trinta veciños e veciñas pertencentes á zona rural do concello de Cedeira, participan na presente edición do programa de compostaxe doméstica, desenvolvido en colaboración coa Consellería de Medio Ambiente, Territorio e Vivenda da Xunta de Galicia no marco do Plan de recuperación, transformación e resiliencia, financiado pola Unión Europea-NextGenerationEU.

Este programa, iniciado na anualidade 2022 -e que deu continuidade a outras iniciativas xa levadas a cabo polo ente municipal- contou con grande acollida entre a veciñanza tal e como desprenden los controles efectuados “porta a porta” por técnicos especialistas na materia. A maioría dos composteiros funcionan de maneira correcta, o que contribúe en boa medida a reducir a materia orgánica presente na bolsa de lixo- e que posteriormente se deposita nos contedores tradicionais-, así como a consecuente redución da emisión de gases de efecto invernadoiro á atmosfera.

O CONCELLO DE CEDEIRA DÓTASE DO SEU PLAN MUNICIPAL DE PREVENCIÓN E DEFENSA CONTRA INCENDIOS FORESTAIS

O Concello de Cedeira dotouse do seu Plan Municipal de Prevención e Defensa Contra Incendios Forestais, en cumprimento do establecido na lexislación autonómica. O documento, que onte saiu publicado no BOP e está xa colgado na sede electrónica do Concello, localiza as faixas nas que é obrigado cortar e rozar para xestionar adecuadamente a biomasa e minimizar o risco de lumes. Desde o goberno local destacan que é unha ferramenta útil para os propietarios, que teñen así a seguridade de identificar as zonas que teñen que limpar, e que contribuirá a evitar lumes e coidar mellor do monte, que é patrimonio de todos e todas.

O plan concreta as ditas faixas lineais do territorio que pola súa localización preto de núcleos poboacionais, infraestruturas, equipamentos, zonas edificadas ou parques industriais requiren especial protección ante os incendios. En xeral, nestas parcelas non poden ter presencia o piñeiro, a mimosa, a acacia, o eucalipto, a xesta, o fento, as silvas ou o toxo, entre outras especies.

No mesmo documento, que pasa a integrar o Plan de Emerxencias do Concello de Cedeira, faise unha análise da situación, indicando que o municipio ten un risco potencial de incendios alto. Entre 2008 e o 2020 rexistráronse na localidade unha media anual de 5,33 incendios que queimaron, tamén de media, a 10,6 hectáreas. O ano 2012 foi o de maior número de lumes e máis superficie arrasada e a parroquia de Cervo a que máis incendios sufriu nese periodo.

Ao fío da publicación do Plan de Prevención de Incendios Forestais cómpre recordar que o Concello conta tamén co seu inventario de camiños municipais, que está colgado na web e no que é posible e doada a procura por referencia catastral dos terreos.

Para consultar o plan:
https://sede.cedeira.gal/sxc/export/sites/cedeira/recursos/downloads/Tablon/2023/ANUNCIO_PROG_20230915113027058_ANEXO_1694770227-1.pdf