MEDIO AMBIENTE

O alcalde de Cedeira, Pablo Diego Moreda Gil, e o concelleiro de Cultura, Patrimonio e Deportes, José Antonio Rodríguez, acompañaron onte á delegada da Xunta de Galicia en Ferrol, Martina Aneiros, nunha visita ao xacemento arqueolóxico de Punta Sarridal. O equipo de Axa Arqueoloxía está desenvolvendo alí desde primeiros deste mes unha nova campaña, desta volta financiada pola Dirección Xeral de Patrimonio, que ten por obxecto tanto a escavación dunha zona preto do cantil como a consolidación dos restos levantados agora e na anterior campaña que custeou o Concello.

Cómpre recordar que a Dirección Xeral de Patrimonio da Xunta de Galicia e o Concello de Cedeira manteñen desde que se realizaron as primeiras catas na zona do Sarridal, hai seis anos, unha alternancia na financiación das sucesivas campañas, de escavación e consolidación dos restos. Segundo explicou Emilio Ramil, o arqueólogo que dirixiu os traballos desde o primeiro momento, nesta actuación, que se vai prolongar ata decembro, se está a completar a descuberta de toda a muralla, concretamente na zona máis próxima ao cantil, así como os restos da mesma época que están na terraza e que corresponden a unha zona industrial, tamén da época castrexa. Neste punto hai moita escoria e terra queimada, así como os restos dunha forxa, onde os habitantes do castro fabricarían coitelos e outras ferramentas.

Durante esta campaña o equipo de AXA Arqueoloxía vai realizar tres visitas comentadas. Hoxe foi a primeira e as seguintes serán os días 23 e 30 de novembro, ás 11.00 horas. Nelas é posible coñecer, coas explicacións dos propios arqueólogos, os achados deste castro, entre os que destacan unha pedra formosa, a quinta descuberta en Galicia. A través das sucesivas campañas coñeceuse que o enclave estivo habitado desde o século III ou IV antes de Cristo ata, polo menos, o IV ou o V despois de Cristo, de maneira que hai restos da época castrexa e posteriores, da galaico-romana.

Tal como se informou recentemente, a seguinte fase de traballos que se quere abordar abrangue a retirada do camiño que bordea as estruturas castrexas xa levantadas e que se dirixe ao Castelo da Concepción, para recuperar os restos que están por debaixo e que completarán a exhumación do foxo, o pavimento e o muro. Para garantir a circulación de peóns pola zona, ao tempo que se poñen en valor estes restos, haberá que construír unha ponte de madeira sobre a zona a escavar que requerirá un investimento duns 18.000€. En total, as necesidades de financiación desta nova fase das actuacións ascende a uns 36.000€, contando esta ponte, a consolidación da última campaña e a excavación na zona do camiño.

O alcalde e o concelleiro de Cultura de Cedeira, Pablo Diego Moreda Gil e José Antonio Rodríguez, mantiveron no pasado mes de setembro unha xuntanza coa directora xeral de Patrimonio, María del Carmen Martínez Insua, para abordar precisamente as futuras fases da escavación, nas que o Concello confía en seguir contando co apoio da Xunta.

O alcalde de Cedeira, Pablo Diego Moreda Gil, e o concelleiro de Cultura, Patrimonio e Deportes, José Antonio Rodríguez, reuníronse recentemente na Coruña coa deputada provincial de Vías e Obras, Mónica Rodríguez Ordóñez, para solicitar a mellora da mobilidade peonil nos accesos ao núcleo de Santo André. Concretamente, o goberno local pide a construción dunha senda que facilite o percorrido a pé desde o mirador de Chao do Monte ata enlazar coa senda xa existente na entrada de Teixido, nun itinerario duns 3 km. A actuación precisaría dun orzamento aproximado de 600.000€.

O obxectivo é seguir mellorando os accesos a Santo André de Teixido, un lugar que recibe cada vez máis visitantes e que ten o seu acceso fundamental a través da estrada provincial DP 2206. Cómpre recordar que a Deputación Provincial rematou xa en 2021 a variante de Pontigas, na CP 2204, salvando os estreitamentos da vía que facían difícil a circulación ao seu paso polo núcleo de poboación. Foi unha mellora especialmente importante para os numerosos autobuses que se dirixen a Santo André, ao igual que sucede coas obras que vai iniciar en breve a Deputación no punto quilométrico un da estrada 2206 e que van corrixir a perigosa curva que existe na valgada do regato de Tide. A institución provincial inviste nestas obras preto de 395.000€.

Xunto coa mellora das condicións para o tráfico rodado, o goberno local de Cedeira aspira a mellorar e facilitar a peregrinación a pé ao núcleo de Teixido. A senda peonil é unha actuación especialmente dirixida ás persoas con problemas de mobilidade, que atopan especiais dificultades no trazado orixinal do camiño. A proposta do Concello pasa por abrir unha senda de dous metros de ancho, que tamén contribuiría a dar máis amplitude á estrada nun trazado estreito e inzado de curvas.

O goberno local solicitou á Deputación Provincial a súa aposta por este proxecto, para o que tamén pediu o máximo respeto ao contorno natural e patrimonial. A aspiración do Concello é poder ampliar no futuro a senda peonil e levala ata Cedeira, conectando a vila con esta aldea, que constitue o núcleo de peregrinación máis importante de Galicia despois de Compostela. Trátase dun plan que encaixa coa estratexia de desenvolvemento do Xeoparque Cabo Ortegal, na que teñen peso as rutas de sendeirismo e tamén a potenciación do camiño a Santo André.