MEDIO AMBIENTE

A CAMPAÑA DE ESCAVACIÓN NO SARRIDAL DESCOBRE OS RESTOS DUNHA FORXA DA ÉPOCA GALAICO ROMANA

O equipo de Axa Arqueoloxía vén de rematar unha nova campaña de escavación no Castro Sarridal, con financiación da Dirección Xeral de Patrimonio, que deixou interesantes achados. En concreto o descubrimento de varios elementos dunha forxa castrexa da época galaico romana: parte dos muros, a fragua, unha base de pedra que faría as veces de macho e as pías nas que estaría a auga para enfriar as pezas. Emilio Ramil, o director dos traballos arqueolóxicos, confirmou que en moitos xacementos galegos apareceron restos que confirmaron este tipo de actividade industrial, pero que esta é a primeira ocasión en que se poden presentar estas estruturas.

A zona da forxa está situada entre a muralla perimetral do castro e o cantil, fóra do recinto residencial. Na escavación apareceron restos de opus signinum, un pavimento romano, así como pezas de tella que indican a existencia dunha cuberta a dúas augas nesta área de traballo. Este pavimento está sobre outra capa de empedrado propiamente castrexo na que aparecen vestixios de foxas que xa eran empregadas para recoller a auga, así como escorias que confirman que tamén antes esta parte do asentamento era utilizaba para forxar ferramentas de ferro antes da chegada dos romanos. Entre os achados están tamén pedras anfibolitas que son altamente refractarias e que se empregarían para expor ao lume.

Esta nova campaña de escavacións confirmou unha vez máis a importancia do xacemento do Castro Sarridal. Desde o ano 2017, no que comezaron os traballos, sucedéronse as campañas financiadas polo Concello de Cedeira e a Dirección Xeral de Patrimonio. Confirmouse a través dos sucesivos achados que este foi un lugar habitado desde o século III ou IV a.C. ata o IV ou V d.C. Nel apareceu a quinta pedra formosa descuberta en Galicia –o que sería un balneario castrexo-, unha moneda romana e as devanditos elementos dunha ferrería prehidráulia, entre outros elementos.

REUNIÓN CON PORTOS PARA TRATAR SOBRE O SANEAMENTO E A POSIBLE CREACIÓN DE AMARRES DEPORTIVOS

O alcalde de Cedeira, Pablo Diego Moreda Gil, e o concelleiro José Antonio Rodríguez mantiveron onte unha reunión co presidente de Portos de Galicia, José Antonio Álvarez Vidal, para abordar diferentes cuestións entre as que estiveron a necesidade de realizar as obras de saneamento na zona portuaria da localidade e a posible creación dun porto deportivo na localidade. Moreda Gil destacou o clima de diálogo e a vontade de colaboración que as dúas partes amosaron no encontro.

En canto ao saneamento, os representantes do Concello incidiron en que a falta dunha correcta recollida e tratamento das augas residuais e pluviais desta zona incide na calidade da auga da ría e na actividade do marisqueo. Portos de Galicia comprometeuse a analizar esta demanda.

A creación do porto deportivo foi outro dos temas que se abordaron na reunión, celebrada na sede de Portos de Galicia na Coruña. Tal como explicou Moreda Gil, o goberno local é consciente de que as condicións da ría de Cedeira non permiten un gran número de amarres, pero si existe a posibilidade de crear entre 50 e 60 prazas para embarcacións de recreo. A idea foi ben acollida polo responsable de Portos, de maneira que o goberno municipal de Cedeira vai elaborar un estudo técnico que apoie a viabilidade da actuación.

Por último, o encontro foi aproveitado por Moreda e Rodríguez para presentar unha demanda da Confraría de Pescadores respecto ao estado do seu edificio. Segundo explicou o alcalde, o inmoble presenta humidades e outros problemas que cómpre resolver.

OS BANCOS MARISQUEIROS DE PANTÍN E ESTEIRO ESTÁN A REXISTRAR ALTOS NIVEIS DE CONTAMINACIÓN

Os alcaldes de Cedeira e Valdoviño, Pablo Diego Moreda Gil e Alberto González Fernández, xunto con outros concelleiros dos seus gobernos locais, mantiveron este xoves unha reunión con mariscadoras da Confraría de Cedeira para abordar a grave situación que se está a rexistrar nos bancos de ameixa e berberecho das enseadas de Pantín e de Esteiro, así como na praia de Vilarrube. Estas zonas pasaron hai pouco a ser zonas C, polos altos niveis de E. coli que se detectaron, polo que é preciso retirar o marisco e reinstalalo en xaulas ata que acadan os niveis sanitarios dunha zona A. “É urxente detectar a orixe desta contaminación, que ameaza o futuro duns bancos que sempre se caracterizaron pola excelente calidade das augas”, coincidieron en subliñar Moreda Gil e Alberto González.
Segundo se acordou no encontro, os concellos de Cedeira e Valdoviño van reclamar a mediación da delegada territorial da Xunta de Galicia en Ferrol, Martina Aneiros, para urxir reunións cos organismos concernidos –Sanidade, Medio Ambiente, Augas de Galicia e o propio Intecmar- e reclamar que se investigue cal é o foco, ou focos, desta contaminación. Trátase dunha zona do litoral que mantiña, desde hai moitos anos, unha calidade e limpeza das augas excelente. Desde o 2020 se producen puntuais elevacións dos niveis de ecoli e o pasado ano xa estiveron estas zonas calificadas como C desde novembro a febreiro.
O colectivo de mariscadoras e mariscadores da Confraría de Cedeira –actualmente 17 persoas- está moi preocupado pola situación. Na actualidade, o problema causa de feito a parálise da actividade durante moitos días. Os temporais conficionan as viaxes que pode facer o barco que recolle o marisco para levalo ás xaulas de depuración na boca da ría de Ferrol, por unha banda, e por outra os venres o servizo non funciona. A Xunta tampouco ten operativo o sistema de reinstalación durante os meses de xullo e agosto, polo que de prolongarse o problema podería causar un prexuizo moito máis grave durante o próximo verán.
Máis aló dos danos para o colectivo de mariscadoras, os alcaldes de Cedeira e Valdoviño coincidiron en sinalar que é un problema de saúde pública e que require dunha actuación decidida.