Skip to content Skip to left sidebar Skip to footer

MEDIO AMBIENTE

O CONCELLO DE CEDEIRA LEVA Á DEPUTACIÓN A PETICIÓN DUNHA SENDA PEONIL DE CHAO DO MONTE A SANTO ANDRÉ

O alcalde de Cedeira, Pablo Diego Moreda Gil, e o concelleiro de Cultura, Patrimonio e Deportes, José Antonio Rodríguez, reuníronse recentemente na Coruña coa deputada provincial de Vías e Obras, Mónica Rodríguez Ordóñez, para solicitar a mellora da mobilidade peonil nos accesos ao núcleo de Santo André. Concretamente, o goberno local pide a construción dunha senda que facilite o percorrido a pé desde o mirador de Chao do Monte ata enlazar coa senda xa existente na entrada de Teixido, nun itinerario duns 3 km. A actuación precisaría dun orzamento aproximado de 600.000€.

O obxectivo é seguir mellorando os accesos a Santo André de Teixido, un lugar que recibe cada vez máis visitantes e que ten o seu acceso fundamental a través da estrada provincial DP 2206. Cómpre recordar que a Deputación Provincial rematou xa en 2021 a variante de Pontigas, na CP 2204, salvando os estreitamentos da vía que facían difícil a circulación ao seu paso polo núcleo de poboación. Foi unha mellora especialmente importante para os numerosos autobuses que se dirixen a Santo André, ao igual que sucede coas obras que vai iniciar en breve a Deputación no punto quilométrico un da estrada 2206 e que van corrixir a perigosa curva que existe na valgada do regato de Tide. A institución provincial inviste nestas obras preto de 395.000€.

Xunto coa mellora das condicións para o tráfico rodado, o goberno local de Cedeira aspira a mellorar e facilitar a peregrinación a pé ao núcleo de Teixido. A senda peonil é unha actuación especialmente dirixida ás persoas con problemas de mobilidade, que atopan especiais dificultades no trazado orixinal do camiño. A proposta do Concello pasa por abrir unha senda de dous metros de ancho, que tamén contribuiría a dar máis amplitude á estrada nun trazado estreito e inzado de curvas.

O goberno local solicitou á Deputación Provincial a súa aposta por este proxecto, para o que tamén pediu o máximo respeto ao contorno natural e patrimonial. A aspiración do Concello é poder ampliar no futuro a senda peonil e levala ata Cedeira, conectando a vila con esta aldea, que constitue o núcleo de peregrinación máis importante de Galicia despois de Compostela. Trátase dun plan que encaixa coa estratexia de desenvolvemento do Xeoparque Cabo Ortegal, na que teñen peso as rutas de sendeirismo e tamén a potenciación do camiño a Santo André.

CEDEIRA ACOLLE UN CURSO DE FORMACIÓN EN AGRICULTURA ECOLÓXICA DIRIXIDO AO SECTOR AGROGANDEIRO

O Concello de Cedeira colabora coa Consellería de Medio Rural na promoción de varios cursos dirixidos a mellorar a capacitación e as competencias no sector agrogandeiro da zona. Hoxe comeza o primeiro deles, organizado pola Axencia Galega de Competencia Alimentaria (Agacal) a través da Oficina Agraria Comarcal e centrado na agricultura ecolóxica. Un total de 18 persoas están inscritas neste programa formativo, que se vai desenvolver na sala de usos múltiples do Polideportivo de Cedeira todos os venres ata o vindeiro 3 de novembro, en horario de 16.00 a 20.00h.

Durante estas sesións exporanse, entre outros, os principios básicos da agricultura ecolóxica, os cultivos máis habituais, as pragas e enfermidades máis comúns, así como os posibles sistemas para combatilas e tratalas e a fertilización da terra. Todo isto no marco dunha agricultura sostible e equilibrada. O curso desenvolverase de maneira práctica e no programa está prevista unha visita a unha explotación de horta ecolóxica.

Por outra banda, o Concello informa de que proximamente haberá outro curso de realización de trámites na sede electrónica para explotacións agrarias.

Estas accións formativas están financiadas ao100% con Fondos FEADER (Fondo Europeo Agrario de Desarrollo Rural).

O CONCELLO DE CEDEIRA DISTRIBÚE ESTES DÍAS UN NOVO NÚMERO DO BOLETÍN INFORMATIVO AS7PARROQUIAS

O Concello de Cedeira ten xa colgado na súa web e está a distribuír polas entidades veciñais e sociais do municipio un novo número do boletín informativo As7Parroquias, ferramenta de transparencia que traslada á cidadanía o traballo do goberno local. Nesta edición, que fai a número 24, faise balance das festas e eventos lúdicos e deportivos de este verán e repásanse, como é habitual, as obras en curso ou recentemente executadas. A consecución do título de Xeoparque Cabo Ortegal ocupa tamén un espazo destacado, subliñando o vieiro de oportunidades que representa entrar neste importante club da Unesco de lugares xeoloxicamente únicos.

A publicación fai un percorrido polos eventos deste verán, desde as verbenas e demais actos das Festas da Patroa ata a Festa do Percebe e os encontros culturais e deportivos máis destacados, citas que tiveron en común sempre unha alta participación e o bo ambiente. Dase conta tamén no boletín da nova distribución de responsabilidades e a composición das comisións dentro do goberno local, despois do acordo que acadaron o PSOE e o BNG no mes de xullo.

A visita ás obras que a Deputación está a acometer na zona do Rego de Tide para mellorar o trazado da estrada provincial que vai a San Andrés, así como a aprobación do Plan Contra Incendios Forestais de Cedeira están tamén neste novo número de As7Parroquias. O mesmo que o recoñecemento ao Xeoparque Cabo Ortegal e a recente reunión que mantieron o alcalde, Pablo Diego Moreda Gil, e o concelleiro de Patrimonio, José Antonio Rodríguez, coa directora xeral de Patrimonio Cultural da Xunta de Galicia, María del Carmen Martínez Insua, para tratar os próximos pasos a dar na escavación arqueolóxica do Sarridal.

No capítulo de obras, As7Parroquias repasa proxectos xa executados ou a piques de rematar, como son a ampliación do saneamento das Pontigas, a senda peonil do camiño de Cordobelas, o arranxo das pistas de pádel ou a renovación da pista multideporte e o marcador do Polideportivo, así como outras que están en proceso de contratación como o cambio das caldeiras da piscina municipal e do ascensor do Auditorio, a ampliación do ximnasio e a colocación de novo céspede artificial no campo do Beco, entre outras. Infórmase tamén da solicitude de fondos, a través de diferentes programas supramunicipais, para acometer outras actuacións, como por exemplo a dixitalización da piscina municipal para que entre nunha rede de instalacións “intelixentes” ou a creación dunha nova zona verde e de lecer na rúa Silva.

A contraportada desde número está adicada ao Cedeira Basket Club, unha entidade que está a traballar polo rexurdimento deste deporte na localidade despois de anos nos que a súa presencia decaera. O éxito do campionato 3×3 que organizou este verán é unha proba do éxito que está a ter a entidade no seu empeño.


VER PDF Boletín as 7 parroquias nº24