Skip to content Skip to left sidebar Skip to footer

Author: Ana

A praia da Madalena xa forma parte da rede Galega de praias sen fume

A PRAIA DA MADALENA XA FORMA PARTE DA REDE GALEGA DE PRAIAS SEN FUME

O Concello de Cedeira incorpórase á Rede Galega de Praias sen Fume ao sumar a praia da Madalena á iniciativa da Xunta de Galicia para combater o tabaquismo.

O programa da Consellería de Sanidade ten unha finalidade educativa, de impulso á saúde e de protección do medio ambiente. A idea, que xorde en 2012 no Concello de Baiona, vai agregando anualmente novas zonas e chega xa á cifra de 141 praias de 64 municipios en 2019.

Se ben o cumprimento desta restrición é totalmente voluntario, desde o Concello animamos á cidadanía a respectar a medida porque é responsabilidade de todos e todas contribuír a desnormalizar o consumo de tabaco na sociedade, favorecer comportamentos saudables nas persoas máis novas e fomentar un modelo de praia que respecte e coide o medio ambiente.

Por que a praia da Madalena libre de tabaco? O fume do tabaco ten substancias tóxicas que son liberadas ao aire que respiramos, incluíndo monóxido de carbono e dióxido de carbono que contribúen ao efecto invernadoiro. Ao problema de contaminación do aire engádese que o filtro dun cigarro está formado nun 80% de acetato de celulosa, que pode tardar ata 25 anos en degradarse. De feito, os cigarros e cabichas son a principal causa de lixo en océanos e praias de todo o mundo. Estes refugallos, ao entrar en contacto coa auga, liberan rapidamente compostos tóxicos con efectos negativos sobre a vida do mar.

FAGÁMOLO ENTRE TODAS E TODOS!

 

Pode consultar toda a información ao respecto nas seguintes ligazóns:

Descarga PDF Folleto de praia sen fume

Descarga PDF Rede de praias sen fume 2019

Rede_Praias_Sen_Fume_2019 folleto_praias_sen_fume

Comezaron as obras de ampliación e reforma da escola infantil da rede a galiña azul en Cedeira

COMEZARON AS OBRAS DE AMPLIACIÓN E REFORMA DA ESCOLA INFANTIL DA REDE A GALIÑA AZUL EN CEDEIRA

O alcalde de Cedeira, Pablo Moreda Gil, e máis o xerente do Consorcio Galego de Servizos de Igualdade e Benestar, Perfecto Rodríguez, participaron onte na firma da acta de replanteo das obras de ampliación e reforma da escola infantil da localidade. A actuación aumentará en 20 o número de prazas ofertadas para nenas e nenos de 0 a 3 anos, polo que pasará de 58 a 78.

Este acto supón o anuncio do inicio inmediato das obras, cun investimento total previsto de máis de 141.000 euros. Deles, o Consorcio -que xestiona o centro- desembolsará 100.000 euros (cunha achega do 80% procedente de Fondos Feder da Unión Europea), mentres que o montante restante corresponderalle ao Concello de Cedeira. Da actuación encargarase a empresa Prace Servicios y Obras S.A. cun prazo de execución máximo de seis meses.

As obras se levarán a cabo sen alterar o funcionamento ordinario do centro. Aproveitarase o mes de agosto no que a escola permanece pechada por vacacións para levar a cabo os traballos mais complexos e que a intención é que as actuacións rematen antes do Nadal.

Ademais das intervencións propias da ampliación, executaranse outras actuacións de mellora entre as que se atopan o incremento do espazo das aulas, a reforma completa da cociña e a instalación dun sistema de ventilación natural na área de descanso para menores de 0 a 1 anos. Tamén se dotará ás instalacións de novos elementos de protección no desnivel interior que existe entre plantas.

A Xunta e o Concello asinaron en xullo do pasado ano o convenio de colaboración para levar a cabo este proxecto de ampliación, para o que a administración local cedeu o edificio anexo á escola. A intervención mellorará a calidade da prestación do servizo nesta escola infantil que facilita a conciliación ás familias deste concello e da súa contorna.

Cedeira prepárase para celebrar o próximo domingo a III Festa da merluza da volanta

CEDEIRA PREPÁRASE PARA CELEBRAR O PRÓXIMO DOMINGO A III FESTA DA MERLUZA DA VOLANTA

O Concello de Cedeira colabora coa Confraría de Pescadores local na celebración da III Festa da Merluza da Volanta, que este ano será o próximo domingo día 30 de xuño e coa que se trata de poñer en valor un produto “cunha calidade moi difícil de superar”, segundo apuntou o patrón maior do pósito cedeirense, Eduardo González.

Un total de oito de barcos dedicados á pesca da volanta achegarán os 200 quilogramos de merluza necesarios para a elaboración do menú que comezará a servirse a partir das 12.00 horas na explanada da Confraría. Haberá carpa.

A organización espera repartir unhas 500 racións nas que a merluza será o ingrediente principal dun menú, no que haberá racións a oito euros, así como unha táboa con seis elaboracións diferentes que se poderá adquirir por 13. Neste último importe vai incluído o recipiente de madeira.

Estas propostas gastronómicas ademais sempre se poderán completar ou mesmo alternar con racións de berberechos ao vapor, empanada e pastelón do apreciado bivalvo que tamén formarán parte do menú e cuxo prezo non superará os seis euros.A Confraría tamén porá os 250 quilogramos de berberechos. Ademais, haberá un menú, a base de hamburguesa e perritos quentes, pensado para os nenos e nenas.

A festa inclúe así mesmo animación infantil, a cargo de “Fiestoke!”, e as actuacións do grupo “Los eternos”, a partir das 12.00 horas, e de Pepo Suevos, despois das tres da tarde.

Pola súa banda, o Museo Mares de Cedeira súmase á celebración dedicada á merluza da volanta cunhas xornadas que se desenvolverán ao longo de todo o día, entre as 9.30 e as 19.30 horas, e que consistirán en visitas guiadas nas que o viaxeiro terá a posibilidade de acercarse á técnica da extracción da ameixa e da coquina e así como á captura da merluza da volanta. Esta última información chegará ao visitante a través dun traballo documental. O prezo de entrada ao museo segue a ser dun euro.

Desde o Concello de Cedeira considérase a cita do próximo domingo como unha magnífica oportunidade para coñecer a vila, comer ao aire libre e saborear un produto que, “en menos de 24 horas pasa do mar ao prato, unha realidade difícil de superar”, segundo subliñou o patrón maior da Confraría de Cedeira.