NOVAS

O Concello convoca este ano por primeira vez as axudas municipais á creación de empresas do programa “CEDEIRA EMPRENDE”

O CONCELLO CONVOCA ESTE ANO POR PRIMEIRA VEZ AS AXUDAS MUNICIPAIS Á CREACIÓN DE EMPRESAS DO PROGRAMA “CEDEIRA EMPRENDE”

Incentivar a creación de novos proxectos, fomentar a actividade empresarial e contribuír a xeración de emprego son os tres piares das axudas municipais que o Concello de Cedeira convoca este ano por primeira vez baixo o programa denominado “Cedeira emprende”.

Poden tomar parte na convocatoria os novos proxectos empresariais emprendidos no ámbito deste concello por empresarios individuais ou a través de pequenas e medianas empresas, independentemente da súa forma xurídica, que tivesen iniciado a súa actividade dende o 1 de xaneiro do ano 2016.

O prazo para tramitalas finaliza o día 20 do presente mes. A partida reservada ascende a 20.000 euros e a cuantía máxima por axuda será de 2.000 euros. Poderá ser beneficiario calquera persoa física ou xurídica cun novo proxecto empresarial, sexa autónoma individual ou autónoma integrada nunha sociedade civil, mercantil, sociedade laboral ou comunidade de bens.

Entre outros requisitos -as bases xa se poden consultar nas oficinas municipais- precísase estar empadroado na localidade no momento do inicio da actividade, estar en situación de desemprego, ter o negocio ou proxecto empresarial dentro do municipio cedeirés, presentar unha iniciativa viable técnica, económica e financeiramente, estar ao día das obrigas fiscais co Concello e ter concedidas todas as licenzas pertinentes para o desenvolvemento da actividade.

As axudas son a fondo perdido e están pensadas para facer frente a gastos de aluguer, luz, auga, lixo, saneamento e telefonía feitos no ano 2016.

A instrución do procedemento a realizará unha comisión avaliadora presidida polo alcalde, Pablo Moreda Gil, e na que tamén tomarán parte como vogais a concelleira de Cultura, Turismo e Urbanismo, María Xosé Rodríguez, un técnico municipal e o axente de emprego e desenvolvemento local do Concello. A proposta de resolución darase a conocer nun prazo máximo dun mes dende a finalización do periodo de presentación de solicitudes. O aboamento da subvención efectuarase mediante un pagamento único.

O alcalde salientou que se trata dunha iniciativa que fomenta o emprendemento e favorece a creación de emprego. Explicou que o feito de publicar as bases no mes de novembro só obedece ao interese do goberno en aumentar o poder de convocatoria das axudas, xa que de abrirse o prazo no mes de agosto quedarían fora todos aqueles proxectos postos en marcha durante a segunda metade do ano.

DESCARGAR EN PDF as bases do programa CEDEIRA EMPRENDE

O talento da cedeiresa Irene Caruncho despunta en “La Voz 4”

O TALENTO DA CEDEIRESA IRENE CARUNCHO DESPUNTA EN “LA VOZ 4”

A cedeiresa Irene Caruncho, de 20 anos, converteuse nunha das voces favoritas no televisivo programa “La Voz” de Telecinco que afronta a súa cuarta edición. A moza impresionou co seu talento aos catro “coaches” do programa – Malú, Alejandro Sanz, Manuel Carrasco e Melendi – que tardaron escasos segundos en virarse na terceira entrega das audicións a cegas. A moza escolleu como carta de presentación o tema “Run”, versionado pola cantante británica Leoa Lewis, e o bordó.

A súa actuación valeulle a admiración e os eloxios dos catro “coaches” do programa pero a cedeirense decantouse finalmente polo equipo liderado por Malú que recoñeceu en Irene Caruncho a unha das mellores voces de todas as tempadas do programa. “Mira, o que vou dicir pode ser ata mal… “La Voz” leva catro edicións con esta e é a miña cuarta edición aquí e mira que escoitei voces grandiosas per oes que desde o momento en que ti abriches a boca á miña puxéronseme os pelos, xa non do brazo, senón de todo o meu corpo, de punta”, indicaba Malú.

A cantante foi un dos “coaches” máis efusivos coa galega. “Dígocho coa maior sinceridade e co corazón na man: es un bicharraco, estás masterizada, tes algo na voz, no corazón cando cantas que eu che pido, non, rógoche, eles vanche a dicir de todo, poesía, pero rógocho, venche ao meu equipo que gañamos A Voz”, dixo.

E así fixo a cedeirense. Irene Caruncho empezou a cantar desde moi pequena. Estudante do IES Punta Candieira e, posteriormente, do IES Rodolfo Ucha, de Ferrol, xa daba acenos do seu potencial cando hai dous anos proclamábase gañadora do concurso “Canta Ferrol” na categoría de mellor voz de Ferrolterra. Agora cun teito máis alto, demostrará a súa valía nesta plataforma nacional onde se viu as caras co numeroso público do estudio. “É a mellor maneira de superar a miña timidez”, dixo.

Pode consultar o artigo publicado no Diario de Ferrol na seguinte ligazón:

IR Á LIGAZÓN Diario de Ferrol – El talento de la cedeiresa Irene Caruncho despunta en “La Voz 4” (7 outubro 2016)

Plan marco de mellora de camiños municipais

PLAN MARCO DE MELLORA DE CAMIÑOS MUNICIPAIS

Ó Concello de Cedeira está a executar a obra referida ao proxecto de Mellora de camiños municipais en Cedeira, subvencionado polo Plan marco: mellora de camiños municipais de acceso a explotacións agrarias 2016, cofinanciado co Feader ao abeiro do PDR de Galicia 2014-2020. Agader é o órgano responsable da xestión e a instrumentación das actuacións inherentes a este Plan marco.


Campaña de limpeza

CAMPAÑA DE LIMPEZA

O Concello de Cedeira anima aos veciños da vila a tomar parte nunha campaña de limpeza que se levará a cabo o día 3 na garita de Herbeira xa que tras o paso da Vuelta Ciclista a España e a pesar dos traballos levados a cabo seguen aparecendo restos de plásticos, latas e demais desperdicios que fan necesaria a colaboración ciudadana para súa retirada. As persoas que desexen axudar terán que estar no lugar ás 17.30 horas.

O Goberno rexeita a conduta homófoba da organización do LUGNASAD

O GOBERNO REXEITA A CONDUTA HOMÓFOBA DA ORGANIZACIÓN DO LUGNASAD

O equipo de goberno de Cedeira desmárcase da conduta homófoba que, segundo tivo constancia agora, ven impoñendo a organización do Lugnasad ao negarse a casar parellas gais durante a celebración da festa celta. Na última edición, que tivo lugar a pasada fin de semana, foron dúas as parellas que viron rexeitada a súa participación na celebración pola súa condición sexual. Unha delas deixou constancia da súa queixa a través do Facebook oficial do Concello.

A concelleira de Cultura, María Xosé Rodríguez, agradece a estas persoas que “nos puxeran de manifesto o que estaba acontecendo” e recordou que a participación do Concello na festa límitáse exclusivamente a unha colaboración de tipo económico.

Pero chegados a este punto, segundo apuntou María Xosé Rodríguez, o Concello móstrase partidario de revisar as bases das axudas destinadas á área Cultura coa fin de evitar que organizacións que fomenten ou manteñan condutas discriminatorias poidan ter acceso a cartos públicos. A responsable de Cultura dixo descoñecer a política que viña mantendo a Asociación Amigos de Lugnasad, “moi contraria ao sentir xeral do goberno”, e lembrou que a bandeira arco iris ondeou no balcón da Casa do Concello con motivo da chegada do actual equipo de goberno á Alcaldía de Cedeira. María Xosé Rodríguez pediu desculpas polo sucedido no nome de todos os seus membros.

Difusión de bases de selección persoal seitura22

DIFUSION DE BASES DE SELECCION PERSOAL SEITURA22

Xa se pode descargar as bases para a selección de persoal laboral da asociación seitura22 Ferrol, Eume, Ortegal, Miño e Vilarmaior, para xestionar, no GDR nº 24 a medida leader de Galicia cofinanciada polo FEADER, no marco do PDR de Galicia 2014-2020.

DESCARGA DAS BASES

Trinta parellas casarán este ano no LUGNASAD que se celebra esta fin de semana

TRINTA PARELLAS CASARÁN ESTE ANO NO LUGNASAD QUE SE CELEBRA ESTA FIN DE SEMANA EN CEDEIRA

Algeciras, Perú, Madrid, Benidorm, Burdeos, Langreo ou Valladolid son, xunto a Viveiro, Vigo e Ferrol, algúns dos lugares de procedencia das trinta parellas que este ano casarán na festa de Lugnasad que se celebra a vindeira fin de semana en Cedeira, superando así as 20 de 2015.

O programa, que chega á súa oitava edición, recrea a vida e costumes dos celtas do Atlántico, incluída a elección de parella para pasar os rigores do inverno.

Manuel Aneiros foi a persoa que tivo a idea orixinal e a que segue a levar o peso dunha celebración para a que conta coa colaboración do Concello, a Asociación de Amigos de Lugnasad, a banda de música Vila de Cedeira, as asociacións de hostaleiros e comerciantes da vila e a entidade de Caza e Pesca Cedeira-Cerdido.

Aneiros, tamén coñecido como “Hechi”, xa ten todo previsto para os próximos tres días. As celebracións terán como punto de partida a instalación de cabanas que xa están en construción e que axudan a recrear un antigo poboado celta. Haberá máis de 14 de diferentes estilos no camiño real da Madalena. Tanto a súa realización como os materiais empregados son responsabilidade dos grupos de amigos ou familiares dos protagonistas do Lugnasad, unha participación que supera as 200 persoas.

A convocatoria festiva arrincará o día 26 coa finalización da montaxe das cabanas e a celebración dos primeiros xogos infantís. A pilla dos trasnos, completa a parella e óso ao caldeiro serán algúns deles. A denominada “Noite dos druídas” dará comezo ás 23.00 horas. Trátase dun encontro de druídas no campo da festa, onde se preparará unha gran queimada que máis tarde compartirán todos os presentes.

O programa do día seguinte, o 27, será moi completo, xa que inclúe un desfile dende o poboado da Madalena ata a praza Roxa e a presentación oficial dos noivos. A saída será ás doce do mediodía. Xa pola tarde, a partir das 17.00 horas, comezarán os actos con xogos populares para nenos (a busca do grial e o home do saco), e actividades para os maiores (lanzamento do tronco, óso ao caldeiro e tiro da corda). Ás 19.00 horas será a entrega de premios aos gañadores. A festa concluirá coa celebración das vodas celtas e a cena dos noivos. Estes últimos actos serán ás 23.00 e 23.30 horas, respectivamente.

A cerimonia das vodas é gratuíta. Durante todo o ano Manuel Aneiros está moi activo nas redes sociais para garantir o éxito da convocatoria.

Pleno sesión extraordinaria, luns 29 de agosto ás 13:00h

PLENO SESIÓN EXTRAORDINARIA LUNS 29 DE AGOSTO ÁS 13:00H
O vindeiro luns 29 de agosto, ás 13:00 h. en primeira convocatoria, realizarase un pleno en sesión extraordinaria coa seguinte orde do día:
1.- Sorteo dos membros das mesas electorais correspondentes ao Concello de Cedeira para a realización das eleccións ao Parlamento de Galicia de 2016

O Concello de Cedeira quere facerse un oco no percorrido da vuelta ciclista para os próximos anos

O CONCELLO DE CEDEIRA QUERE FACERSE UN OCO NO PERCORRIDO DA VUELTA CICLISTA PARA OS PRÓXIMOS ANOS

O día 23 de agosto entrará a formar parte da historia moderna do municipio de Cedeira coa chegada da Vuelta Ciclista a España. A importancia da cita levou a Concello e veciñanza a implicarse directamente na celebración, o primeiro facilitando as infraestruturas necesarias e a segunda saíndo ás rúas e enchendo os lugares polos que a media tarde pasarán os corredores.

Desde primeiras horas da mañá o ambiente festivo xa estaba nas rúas cos últimos preparativos antes de recibir unha proba deportiva que trae consigo a mobilización dunhas 2.000 persoas.

O alcalde, Pablo Moreda Gil, destacou este feito así como a posibilidade que se lle abre a Cedeira para darse a coñecer a nivel internacional. Significa, explicou Moreda, “mutiplicar por moito toda a repercusión mediática, ademais de poñer en valor os lugares de interese dos que pode presumir o noso municipio”. Neste sentido, citou os bos resultados turísticos que está tendo o Concello de Dumbría desde que empezou a súa participación na Vuelta no ano 2012.

O alcalde tamén valorou a implicación do Concello neste proxecto coa intención de que “a de hoxe non sexa a ultima vez que a Vuelta tome contacto co municipio” e agarda que quede incorporado á competición nos vindeiros anos. Así, falou da repercusión case inmediata que a proba ten no territorio, non só no día a día senon tamén no que a infraestruturas se refire e agradeceu tanto á Xunta como á Deputación as melloras realizadas na estrada a San Andrés, a creación dun aparcamento nas inmediacións da garita de Herbeira e outras obras realizadas na zona de Cari- ño. O alcalde destacou os magníficos resultados da presente campaña turística, estimando nun 25% máis de ocupación a rexistrada este ano con respecto ao anterior.

O presidente dos comerciantes do casco vello da vila de Cedeira, Francisco Zaera, salientou tamén a repercusión da Vuelta Ciclista a España. Zaera dixo que nun principio a proba trae consigo un alto nivel de ocupación nos establecementos hostaleiros da zona, pero engadiu que será máis a longo prazo cando os resultados sexan máis evidentes. “A Vuelta é moi mediática tanto por imaxes como por publicidade pero o retorno chegará de cara á Semana Santa ou no verán do 2017”, segundo a súa opinión.

Carmen Pernas, propietaria do hotel Herbeira, considera que a Vuelta é moi positiva para Cedeira. O seu establecimento ten posto o cartel de completo por ter aloxada a moita xente da que viaxa xunto aos ciclistas.

No restaurante Brisas, Lois Iglesias sinala que “sempre é moi interesante que unha proba destas características pase pola túa localidade” e engade que a Vuelta é “un escaparate publicitario de primeiro orde”.