NOVAS

O CONCELLO DE CEDEIRA REXEITARÁ NESTE 25N A VIOLENCIA CONTRA AS MULLERES CUN MINUTO DE RUÍDO

O Concello de Cedeira conmemorará este sábado o Día Internacional da Eliminación da Violencia contra as Mulleres cun acto institucional no que se lerá un manifesto e se fará un “minuto de ruído” polas vítimas. Trátase de non silenciar o problema, tal como explicou Lucía Picos, a concelleira de Igualdade, e de expresar a rabia e a carraxe ante esta lacra. Neste acto, que terá lugar ás 19.00 horas no Auditorio Municipal, as voluntarias do Punto Lila lerán fragmentos do libro “Comezar desde cero”, no que a educadora social Tania Merelas recolle as voces de mulleres no proceso de recuperar as súas vidas despois da violencia machista.

Tamén o mesmo sábado 25 están programados actos de sensibilización contra a violencia contra as mulleres no Centro de Ocio Xuvenil. Alí, rapaces e rapazas de 12 a 18 anos están invitadas a asistir, ás 17.30 horas, á proxección da curta “Violencia invisible”, de María Giséle Royo. A cinta, premiada no Festival de Cine de Mulleres de Berlín, aborda situacións de violencia psicolóxica de xénero, unha parte que moitas veces queda oculta ou esquecida baixo o global do problema. Tras o pase comezará unha merenda-coloquio na que participará o equipo Faro da Igualdade do IES Punta Candieira.

No marco da conmemoración do 25N o Concello de Cedeira tamén impulsou a instalación, na entrada e no vestíbulo do Auditorio Municipal, dunha exposición creada polo alumnado do ciclo de Edición de Publicacións do IES de Leixa. Nela aparecen siluetas de mulleres colgadas polos pés, con frases de cancións coñecidas que teñen unha dramática lectura baixo o foco da violencia machista.

Ata o Auditorio Municipal achegáronse esta mañá os alumnos e alumnas de 4º e 5º de ESO do IES Punta Candieira, para asistir á representación da obra “Vestido de voda”, unha peza de teatro social especialmente dirixida a promover a reflexión sobre a igualdade, os estetetipos de xénero, os mecanismos polos que se exerce o poder… todo a través do diálogo e a participación do público.

O GOBERNO LOCAL DE CEDEIRA COMPRA Á CONFRARÍA DE PESCADORES A PARCELA DO MIRADOIRO DE CRÓNICAS

A Xunta de Goberno do Concello de Cedeira aprobou o prego administrativo para a adquisición dunha parcela propiedade da Confraría de Pescadores e situada no barrio mariñeiro de Crónicas, xunto á rúa de Nosa Señora do Mar. É unha operación que vén regularizar unha situación que existía de facto desde hai anos, xa que o Concello viña asumindo o coidado e mantemento destes terreos.

O acordo acadado polo Concello de Cedeira e a Confraría de Pescadores establece o prezo da parcela en 18.300€, segundo a valoración dos técnicos, e especifica que terá que manter o uso dotacional como mínimo durante vinte anos. A totalidade da superficie mide algo máis de mil metros cadrados. Nela unicamente está construída unha pista deportiva con dúas porterías, e o resto do espazo é zona verde, con algún banco, e de aparcamento. A franxa de terreo sitúase diante das vivendas de mariñeiros da rúa de Nosa Señora do Mar, sobre o camiño de Area Longa. Desde el hai unhas excelentes vistas da praia da Madalena e do faro de Robaleira e, de feito, o lugar conta cun miradoiro.

Segundo explicou o alcalde, Pablo Diego Moreda Gil, a intención do goberno local é adquirir tamén algunha outra parcela na zona e acometer unha posta ao día das mesmas, mantendo o seu carácter de espazo público e de lecer, así como habilitando espazos para aparcamento.

O CONCELLO DE CEDEIRA PON EN MARCHA O CONSELLO LOCAL DA INFANCIA E ADOLESCENCIA

O pleno da corporación de Cedeira aprobou o venres por unanimidade o regulamento do Consello Local de Infancia e Adolescencia (CLIA), nunha sesión extraordinaria na que xa estiveron presentes os trinta nenos, nenas e adolescentes que van integrar este órgano consultivo. Tal como explicou na súa intervención Noel López, concelleiro de Mocidade, o CLIA vai ser “o lugar de interlocución” coa alcaldía e o resto das concellerías, para “facer chegar as súas demandas ou necesidades, trasladar as preocupacións ou problemáticas que lles afectan”.

A creación do CLIA é consecuencia do Plan de Infancia e Adolescencia que aprobou o pleno da corporación de Cedeira o pasado 5 de maio. Na posta en marcha da folla de ruta que contén dito plan está a aprobación do regulamento e a creación deste Consello Local, que segundo explicou Noel López vai comezar a funcionar de inmediato. A vindeira semana, os rapaces e rapazas que forman o CLIA van realizar unha visita ao Parlamento de Galicia e en decembro asistirán a unha charla sobre o funcionamento dos Orzamentos Participativos que está a desenvolver o Concello desde hai varios anos.

A intención do goberno local é facer de Cedeira unha “Cidade Amiga da Infancia”, unha distinción que Unicef concede a aquelas vilas comprometidas cos dereitos dos nenos, nenas e adolescentes, dacordo coa Convención sobre os Dereitos do Neno. É un título que unicamente posúen nesta zona os concellos de Moeche e Cabanas. Cedeira quixo celebrar o pleno de aprobación do CLIA en vésperas deste 20 de novembro, data na que se conmemora o Día Mundial da Infancia, para adherirse a este “club” que representa poñer todas as políticas municipais tamén baixo a mirada da poboación menor de idade, atendendo ás súas necesidades de xeito transversal.

Cómpre destacar o grande interese amosado polo alumnado do CEIP Nicolás do Río e do IES Punta Candieira por participar no CLIA. A educadora social Tania Merelas, que foi a técnica que coordinou a elaboración do plan e a súa posta en marcha, fixo unha serie de sesións con rapaces e rapazas de ambos os dous centros para explicarlles o que é o consello local e como vai funcionar, cunha excelente resposta. Presentáronse máis voluntarios e voluntarias dos 30 necesarios, polo que foi preciso seleccionar coidando o equilibrio por idades e centros.

O CLIA está formado polos nenos, nenas e adolescentes, desde os dez anos de idade aos 17, así como por representantes dos centros educativos e das asociacións de nais e pais O Beco e Picapeixe, e do goberno municipal.

Descarga regulamento na seguinte ligazón:

Descarga PDF Regulamento CLIA