NOVAS

O CONCELLO DE CEDEIRA EXPRESA O SEU FIRME REXEITAMENTO A TODAS AS FORMAS DE VIOLENCIA CONTRA AS MULLERES

O Concello de Cedeira conmemorou onte o Día Internacional pola Eliminación da Violencia contra as Mulleres cun acto institucional no que se expresou “o noso rexeitamento a todas as formas de violencia que sofren as mulleres polo mero feito de selo” e para reivindicar que este é un problema “que debe comprometer a toda a poboación, axentes sociais, institucións e medios de comunicación, recoñecendo a importancia do papel das entidades locais”.

“Combater as violencias machistas significa adoptar acordos e compromisos políticos para aumentar os orzamentos públicos destinados a facerlle fronte , e dotar a os equipos especializados dos recursos necesarios para a súa prevención e atención integral”, reivindicou a corporación de Cedeira a través do seu manifesto institucional, no que se recordou non so a alarmante cifra de vítimas senón tamén particularmente o incremento dos casos de agresións sexuais cometidas por menores e o paso atrás que representan os discursos negacionistas.

CINE, TEATRO E ACTIVIDADES SOBRE A VIOLENCIA DE XÉNERO, NA AXENDA DESTA FIN DE SEMANA EN CEDEIRA

Cine, teatro e os actos conmemorativos do Día Internacional da Eliminación da Violencia contra as Mulleres conforman a axenda desta fin de semana en Cedeira. Conclúen o ciclo Mestre Mateo co pase do documental “Onde máis doe” e remata tamén o programa de teatro afeccionado Fusa Guillén coa representación da compañía Axóuxere.

O Auditorio acollerá mañá sábado, ás 20.00h, a proxección de “Onde máis doe”, unha cinta que foi finalista na categoría de documental no certame do cine galego e que encaixa á perfección coa reflexión que se quere promover no 25N. Manane Rodríguez dirixe a película, na que un home asesina ao seu fillo despois de ameazar durante anos a súa ex parella. Ao igual que nas anteriores citas do ciclo, a entrada será gratuíta.

Tamén mañá terán lugar o programa organizado polo Concello de Cedeira con motivo do 25N. O acto institucional será ás 19.00h no Auditorio e consistirá na lectura dun manifesto e de fragmentos do libro “Comezar desde cero” de Tania Merelas, que recompila as voces de mulleres en proceso de recuperación despois de ser vítimas de violencia machista. Un “minuto de ruído” rematará con este acto.

O Centro de Ocio Xuvenil proxectará mañá ás 17.30h, para rapaces e rapazas de 12 a 18 anos, a curta “Violencia invisible”, de María Giséle Royo, na que se abordan as situacións de violencia psicolóxica de xénero. A continuación haberá unha merenda-coloquio na que participará o equipo Faro da Igualdade do IES Punta Candieira.

Xa o domingo chegará a última representación do ciclo de teatro afeccionado Fusa Guillén. A compañía de Oleiros Axóuxere Teatro representará “Facendo as Partixas”. A acción sitúase nos anos 80, cando o país esperta á democracia. Dúas irmás xúntanse, tras vinte anos sen verse, para repartir a herdanza familiar. Ana, a menor e progresista, fuxiu con 17 e estivo desconectada da familia mentres Laura, a maior e conservadora, quedou a coidar dos seus pais ao tempo que sacaba adiante á súa propia familia. Durante este reencontro, lembran o pasado, xurden as pantasmas e os reproches… pero descubrirán que teñen mais cousas en común das que crían. A reconciliación entre ambas, e cada unha consigo mesma, converterase nos alicerces dun esperanzador futuro. Esta obra está especialmente dirixida a quen poida lembrar ou teña referenzas dunha época sen teléfonos móbiles, onde as nenas xogaban con bonecas “Mariquita Pérez”.

O CONCELLO DE CEDEIRA REXEITARÁ NESTE 25N A VIOLENCIA CONTRA AS MULLERES CUN MINUTO DE RUÍDO

O Concello de Cedeira conmemorará este sábado o Día Internacional da Eliminación da Violencia contra as Mulleres cun acto institucional no que se lerá un manifesto e se fará un “minuto de ruído” polas vítimas. Trátase de non silenciar o problema, tal como explicou Lucía Picos, a concelleira de Igualdade, e de expresar a rabia e a carraxe ante esta lacra. Neste acto, que terá lugar ás 19.00 horas no Auditorio Municipal, as voluntarias do Punto Lila lerán fragmentos do libro “Comezar desde cero”, no que a educadora social Tania Merelas recolle as voces de mulleres no proceso de recuperar as súas vidas despois da violencia machista.

Tamén o mesmo sábado 25 están programados actos de sensibilización contra a violencia contra as mulleres no Centro de Ocio Xuvenil. Alí, rapaces e rapazas de 12 a 18 anos están invitadas a asistir, ás 17.30 horas, á proxección da curta “Violencia invisible”, de María Giséle Royo. A cinta, premiada no Festival de Cine de Mulleres de Berlín, aborda situacións de violencia psicolóxica de xénero, unha parte que moitas veces queda oculta ou esquecida baixo o global do problema. Tras o pase comezará unha merenda-coloquio na que participará o equipo Faro da Igualdade do IES Punta Candieira.

No marco da conmemoración do 25N o Concello de Cedeira tamén impulsou a instalación, na entrada e no vestíbulo do Auditorio Municipal, dunha exposición creada polo alumnado do ciclo de Edición de Publicacións do IES de Leixa. Nela aparecen siluetas de mulleres colgadas polos pés, con frases de cancións coñecidas que teñen unha dramática lectura baixo o foco da violencia machista.

Ata o Auditorio Municipal achegáronse esta mañá os alumnos e alumnas de 4º e 5º de ESO do IES Punta Candieira, para asistir á representación da obra “Vestido de voda”, unha peza de teatro social especialmente dirixida a promover a reflexión sobre a igualdade, os estetetipos de xénero, os mecanismos polos que se exerce o poder… todo a través do diálogo e a participación do público.