NOVAS

O GOBERNO LOCAL DE CEDEIRA COMPRA Á CONFRARÍA DE PESCADORES A PARCELA DO MIRADOIRO DE CRÓNICAS

A Xunta de Goberno do Concello de Cedeira aprobou o prego administrativo para a adquisición dunha parcela propiedade da Confraría de Pescadores e situada no barrio mariñeiro de Crónicas, xunto á rúa de Nosa Señora do Mar. É unha operación que vén regularizar unha situación que existía de facto desde hai anos, xa que o Concello viña asumindo o coidado e mantemento destes terreos.

O acordo acadado polo Concello de Cedeira e a Confraría de Pescadores establece o prezo da parcela en 18.300€, segundo a valoración dos técnicos, e especifica que terá que manter o uso dotacional como mínimo durante vinte anos. A totalidade da superficie mide algo máis de mil metros cadrados. Nela unicamente está construída unha pista deportiva con dúas porterías, e o resto do espazo é zona verde, con algún banco, e de aparcamento. A franxa de terreo sitúase diante das vivendas de mariñeiros da rúa de Nosa Señora do Mar, sobre o camiño de Area Longa. Desde el hai unhas excelentes vistas da praia da Madalena e do faro de Robaleira e, de feito, o lugar conta cun miradoiro.

Segundo explicou o alcalde, Pablo Diego Moreda Gil, a intención do goberno local é adquirir tamén algunha outra parcela na zona e acometer unha posta ao día das mesmas, mantendo o seu carácter de espazo público e de lecer, así como habilitando espazos para aparcamento.

O CONCELLO DE CEDEIRA PON EN MARCHA O CONSELLO LOCAL DA INFANCIA E ADOLESCENCIA

O pleno da corporación de Cedeira aprobou o venres por unanimidade o regulamento do Consello Local de Infancia e Adolescencia (CLIA), nunha sesión extraordinaria na que xa estiveron presentes os trinta nenos, nenas e adolescentes que van integrar este órgano consultivo. Tal como explicou na súa intervención Noel López, concelleiro de Mocidade, o CLIA vai ser “o lugar de interlocución” coa alcaldía e o resto das concellerías, para “facer chegar as súas demandas ou necesidades, trasladar as preocupacións ou problemáticas que lles afectan”.

A creación do CLIA é consecuencia do Plan de Infancia e Adolescencia que aprobou o pleno da corporación de Cedeira o pasado 5 de maio. Na posta en marcha da folla de ruta que contén dito plan está a aprobación do regulamento e a creación deste Consello Local, que segundo explicou Noel López vai comezar a funcionar de inmediato. A vindeira semana, os rapaces e rapazas que forman o CLIA van realizar unha visita ao Parlamento de Galicia e en decembro asistirán a unha charla sobre o funcionamento dos Orzamentos Participativos que está a desenvolver o Concello desde hai varios anos.

A intención do goberno local é facer de Cedeira unha “Cidade Amiga da Infancia”, unha distinción que Unicef concede a aquelas vilas comprometidas cos dereitos dos nenos, nenas e adolescentes, dacordo coa Convención sobre os Dereitos do Neno. É un título que unicamente posúen nesta zona os concellos de Moeche e Cabanas. Cedeira quixo celebrar o pleno de aprobación do CLIA en vésperas deste 20 de novembro, data na que se conmemora o Día Mundial da Infancia, para adherirse a este “club” que representa poñer todas as políticas municipais tamén baixo a mirada da poboación menor de idade, atendendo ás súas necesidades de xeito transversal.

Cómpre destacar o grande interese amosado polo alumnado do CEIP Nicolás do Río e do IES Punta Candieira por participar no CLIA. A educadora social Tania Merelas, que foi a técnica que coordinou a elaboración do plan e a súa posta en marcha, fixo unha serie de sesións con rapaces e rapazas de ambos os dous centros para explicarlles o que é o consello local e como vai funcionar, cunha excelente resposta. Presentáronse máis voluntarios e voluntarias dos 30 necesarios, polo que foi preciso seleccionar coidando o equilibrio por idades e centros.

O CLIA está formado polos nenos, nenas e adolescentes, desde os dez anos de idade aos 17, así como por representantes dos centros educativos e das asociacións de nais e pais O Beco e Picapeixe, e do goberno municipal.

Descarga regulamento na seguinte ligazón:

Descarga PDF Regulamento CLIA

TEIXIDO, FINAL DE ETAPA DO “CAMIÑO GASTRONÓMICO” DE PROMOCIÓN DA RUTA DO MAR E DOS PRODUTOS PESQUEIROS

O alcalde de Cedeira, Pablo Diego Moreda Gil, e o concelleiro de Cultura e Patrimonio e Deportes, José Antonio Rodríguez Arribe, recibiron onte en Santo André de Teixido ao grupo de persoas da Asociación do Camiño do Mar que están a facer dito itinerario, en sete fins de semana, co obxetivo de promocionar a ruta de peregrinación e tamén o consumo de pescado. É a cuarta edición do chamado “Camiño Gastronómico”, no que as diferentes etapas van seguidas de degustacións. Esta que rematou en Cedeira completouse coa elaboración por parte do chef Suso Villarino dunha Tosta de Pez Espada en escabeche con crema de queso afumado e Fabas IXP de Lourenzá con Potas en Salsa.
A etapa que realizou o grupo este domingo partiu de Cariño ás 09.45h e chegou a Teixido sobre as 13.15h. Os camiñantes asistiron á súa chegada á misa no santuario de Santo André e participaron tamén na posterior procesión. A continuación, a casa de turismo rural de Teixido acolleu a degustación. Desde a Asociación do Camiño do Mar agradeceron a colaboración do Concello de Cedeira co programa, que seguirá en sucesivas fins de semana ata chegar a Neda.

Máis información do Camiño Gastronómico:

https://www.asocaminodelmar.com/acciones/camino-gastron%C3%B3mico