NOVAS

OS BANCOS MARISQUEIROS DE PANTÍN E ESTEIRO ESTÁN A REXISTRAR ALTOS NIVEIS DE CONTAMINACIÓN

Os alcaldes de Cedeira e Valdoviño, Pablo Diego Moreda Gil e Alberto González Fernández, xunto con outros concelleiros dos seus gobernos locais, mantiveron este xoves unha reunión con mariscadoras da Confraría de Cedeira para abordar a grave situación que se está a rexistrar nos bancos de ameixa e berberecho das enseadas de Pantín e de Esteiro, así como na praia de Vilarrube. Estas zonas pasaron hai pouco a ser zonas C, polos altos niveis de E. coli que se detectaron, polo que é preciso retirar o marisco e reinstalalo en xaulas ata que acadan os niveis sanitarios dunha zona A. “É urxente detectar a orixe desta contaminación, que ameaza o futuro duns bancos que sempre se caracterizaron pola excelente calidade das augas”, coincidieron en subliñar Moreda Gil e Alberto González.
Segundo se acordou no encontro, os concellos de Cedeira e Valdoviño van reclamar a mediación da delegada territorial da Xunta de Galicia en Ferrol, Martina Aneiros, para urxir reunións cos organismos concernidos –Sanidade, Medio Ambiente, Augas de Galicia e o propio Intecmar- e reclamar que se investigue cal é o foco, ou focos, desta contaminación. Trátase dunha zona do litoral que mantiña, desde hai moitos anos, unha calidade e limpeza das augas excelente. Desde o 2020 se producen puntuais elevacións dos niveis de ecoli e o pasado ano xa estiveron estas zonas calificadas como C desde novembro a febreiro.
O colectivo de mariscadoras e mariscadores da Confraría de Cedeira –actualmente 17 persoas- está moi preocupado pola situación. Na actualidade, o problema causa de feito a parálise da actividade durante moitos días. Os temporais conficionan as viaxes que pode facer o barco que recolle o marisco para levalo ás xaulas de depuración na boca da ría de Ferrol, por unha banda, e por outra os venres o servizo non funciona. A Xunta tampouco ten operativo o sistema de reinstalación durante os meses de xullo e agosto, polo que de prolongarse o problema podería causar un prexuizo moito máis grave durante o próximo verán.
Máis aló dos danos para o colectivo de mariscadoras, os alcaldes de Cedeira e Valdoviño coincidiron en sinalar que é un problema de saúde pública e que require dunha actuación decidida.

VISITA AO XACEMENTO DE SARRIDAL PARA COÑECER O AVANCE DOS TRABALLOS DE ESCAVACIÓN E CONSOLIDACIÓN

O alcalde de Cedeira, Pablo Diego Moreda Gil, e o concelleiro de Cultura, Patrimonio e Deportes, José Antonio Rodríguez, acompañaron onte á delegada da Xunta de Galicia en Ferrol, Martina Aneiros, nunha visita ao xacemento arqueolóxico de Punta Sarridal. O equipo de Axa Arqueoloxía está desenvolvendo alí desde primeiros deste mes unha nova campaña, desta volta financiada pola Dirección Xeral de Patrimonio, que ten por obxecto tanto a escavación dunha zona preto do cantil como a consolidación dos restos levantados agora e na anterior campaña que custeou o Concello.

Cómpre recordar que a Dirección Xeral de Patrimonio da Xunta de Galicia e o Concello de Cedeira manteñen desde que se realizaron as primeiras catas na zona do Sarridal, hai seis anos, unha alternancia na financiación das sucesivas campañas, de escavación e consolidación dos restos. Segundo explicou Emilio Ramil, o arqueólogo que dirixiu os traballos desde o primeiro momento, nesta actuación, que se vai prolongar ata decembro, se está a completar a descuberta de toda a muralla, concretamente na zona máis próxima ao cantil, así como os restos da mesma época que están na terraza e que corresponden a unha zona industrial, tamén da época castrexa. Neste punto hai moita escoria e terra queimada, así como os restos dunha forxa, onde os habitantes do castro fabricarían coitelos e outras ferramentas.

Durante esta campaña o equipo de AXA Arqueoloxía vai realizar tres visitas comentadas. Hoxe foi a primeira e as seguintes serán os días 23 e 30 de novembro, ás 11.00 horas. Nelas é posible coñecer, coas explicacións dos propios arqueólogos, os achados deste castro, entre os que destacan unha pedra formosa, a quinta descuberta en Galicia. A través das sucesivas campañas coñeceuse que o enclave estivo habitado desde o século III ou IV antes de Cristo ata, polo menos, o IV ou o V despois de Cristo, de maneira que hai restos da época castrexa e posteriores, da galaico-romana.

Tal como se informou recentemente, a seguinte fase de traballos que se quere abordar abrangue a retirada do camiño que bordea as estruturas castrexas xa levantadas e que se dirixe ao Castelo da Concepción, para recuperar os restos que están por debaixo e que completarán a exhumación do foxo, o pavimento e o muro. Para garantir a circulación de peóns pola zona, ao tempo que se poñen en valor estes restos, haberá que construír unha ponte de madeira sobre a zona a escavar que requerirá un investimento duns 18.000€. En total, as necesidades de financiación desta nova fase das actuacións ascende a uns 36.000€, contando esta ponte, a consolidación da última campaña e a excavación na zona do camiño.

O alcalde e o concelleiro de Cultura de Cedeira, Pablo Diego Moreda Gil e José Antonio Rodríguez, mantiveron no pasado mes de setembro unha xuntanza coa directora xeral de Patrimonio, María del Carmen Martínez Insua, para abordar precisamente as futuras fases da escavación, nas que o Concello confía en seguir contando co apoio da Xunta.

A BANDA DE MÚSICA DE CEDEIRA REPASARÁ A SÚA HISTORIA ESTE SÁBADO NO CONCERTO DE SANTA ICÍA

A Banda de Música Vila de Cedeira vai ofrecer este sábado o seu tradicional concerto de Santa Icía, unha ocasión para gozar da calidade desta senlleira formación que encarna á perfección a grande afección pola música que existe na localidade. A formación anunciou que a cita será un repaso da súa historia, polo que ten invitado a participar a todas as persoas que tocaron nela nos seus máis de trinta anos de traxectoria. A cita, de entrada gratuíta, será ás 20.00h no Auditorio Municipal.
A Banda Vila de de Cedeira ofrecerá, como adoita facer neste tipo de ocasións, un repertorio excepcionalmente variado, cos máis clásicos pasodobles ou as populares muñeiras xunto con grandes éxitos do rock.

O domingo, día 19, chega unha nova proxección do ciclo Mestre Mateo. “María Casares, a muller que viviu mil vidas” pasarase no Auditorio Municipal, ás 19.00 horas e con entrada de balde. A cinta gañou o premio ao mellor documental no certame do cine en galego. Xavier Villaverde dirixe este trabalo, no que se fai unha aproximación íntima e profunda á vida dunha muller extraordinaria e unha figura fundamental nas artes escénicas da Europa do século XX.