Skip to content Skip to left sidebar Skip to footer

NOVAS

O CONCELLO DE CEDEIRA INVISTE 100.000€ PARA DOTARSE DUN NOVO TRACTOR CON BRAZO DESBROZADOR

O Concello de Cedeira acaba de publicar na Plataforma de Contratación do Sector Público o anuncio de licitación para a compra dun tractor con máquina desbrozadora lateral. Ata o vindeiro día 26 está aberto o prazo de presentación de ofertas para este concurso, que conta cun presuposto de 100.000€ (IVE incluído).

Este é un dos investimentos que o goberno local acomete con cargo ao remanente do pasado ano. Tal como explicou o alcalde, Pablo Diego Moreda Gil, o Concello ten a obriga de manter limpos e practicables máis de 250 quilómetros de rúas, camiños e viais da súa titularidade, garantindo ao longo de todo o ano o acceso aos diferentes núcleos rurais. “A limpeza da vexetación mellora a seguridade na circulación e axuda a previr incendios”, recordou o alcalde, que subliñou que co novo tractor van ser xa tres os que formen parte do parque de maquinaria do Concello.

“Contar con medios propios para acometer os desbroces supón ter maior autonomía e capacidade nos momentos en que son máis necesarios”, explicou. Recordou, neste sentido, que durante o pasado verán foi preciso recorrer a dúas empresas alleas para reforzar as brigadas municipais na limpeza dos viais.

O prego de condicións establece que o tractor deberá ter un motor con 110 cabalos de potencia e dobre sistema de tracción, así como unha capacidade de elevación de 4.300 quilos e cabina con todos os sistemas de seguridade. O brazo elevador lateral terá un alcance horizontal de 5m e vertical de 6,30m. A empresa suministradora deberá entregar o vehículo con todas as certificacións, garantías, plan de mantemento preventivo e ofrecer formación ao persoal municipal que se ocupará de manexalo.

PROXECTO “EMPRENDE PESCA”

O “PROGRAMA DE VALORIZACIÓN DA PESCA SUSTENTABLE, E PARA IMPULSO DO EMPRENDEMENTO, PRIORITARIAMENTE NA TRANSFORMACIÓN, NO SECTOR PESQUEIRO NOS CONCELLOS DE CARIÑO, CEDEIRA E VALDOVIÑO (EMPRENDE PESCA)” está promovido polos Concellos de Cedeira, Cariño e Valdoviño, e ten como obxecto a valorización da pesca sustentable, o marisqueo e os oficios do mar a través de accións de promoción de produtos mariños locais e do emprendemento nestes municipios.

EMPRENDE PESCA está a realizarse grazas ás axudas que a Unión Europea ofrece, no marco do Fondo Europeo e Marítimo de Pesca (FEMP), para proxectos ao abeiro das estratexias de desenvolvemento local participativo (EDLP), e que a Consellería do Mar aprobou para os grupos de acción local do sector pesqueiro (GALP).

  • Coste total do proxecto (subvencionable + non subvencionable): 126.445,00 €
  • Coste subvencionable do proxecto (inversión pública + inversión privada): 126.445,00 €
  • Total axuda pública aprobada (€): 126.445,00 €
  • % Subvención: 100

Obxectivo xeral: Valorizar a pesca sustentable, tanto os oficios do mar como o coñecemento das especies, para o impulso do emprendemento, principalmente na transformación, no sector pesqueiro nos Concellos de Cariño, Cedeira e Valdoviño

Obxectivos específicos:

  • Promocionar o carácter sustentable dos modos de extracción da pesca e do marisqueo no territorio.
  • Fomentar o coñecemento de especies con menor incidencia na comercialización e consumo nos establecementos e fogares.
  • Impulsar o emprendemento e especialmente a transformación nun territorio moi centrado na comercialización do produto fresco.

Para acadar estes obxectivos, levaranse a cabo as seguintes actuacións, ao longo de 2021 e 2022:

CEDEIRA RATIFICA O SEU FIRME COMPROMISO COS DEREITOS DAS PERSOAS LGTBI E O REXEITAMENTO DA VIOLENCIA

O pleno de Cedeira aprobou por unanimidade unha moción na que ratifica o compromiso firme do Concello “coa igualdade, os dereitos das persoas LGTBI e a erradicación de calquera tipo de violencia cara a este colectivo”, ao tempo que se suma á declaración institucional que o pleno da Deputación Provincial da Coruña aprobou como reacción ao crime de Samuel Luiz, na que se instaba a “condenar e rexeitar os discursos que pola súa natureza ou contido alentan a discriminación ou trato diferenciado por razón de sexo, xénero, raza, procedencia, etnia, posición social, etc. e que poden contribuír á xustificación de actitudes sexistas, homófobas, xenófobas, etc. que non deben ter cabida na nosa sociedade”.

Ambos os dous acordos subscritos polos grupos políticos do Concello de Cedeira, tanto a moción presentada polo PSOE como a declaración da Deputación, inclúen o compromiso de poñer en marcha campañas de sensibilización, información e formación sobre a realidade das persoas pertencentes ao colectivo LGTBI. Tamén recoñecen a LGTBIfobia e os discursos que a alentan “como unha afronta á calidade democrática porque apela directamente aos estándares de liberdade do noso país”.

Ademais, a moción aprobada polo Concello de Cedeira abrangue o acordo de establecer un plan formativo para a Policía Municipal encamiñado a que as e os axentes teñan a formación suficiente sobre a realidade das persoas LGTBI e poidan ofrecer un trato adecuado ás vítimas.

O alcalde de Cedeira, Pablo Diego Moreda Gil, lamentou que as agresións LGTBIfóbicas estean a aumentar en España e defendeu a necesidade de que as institucións sexan as primeiras en ondear a bandeira da tolerancia e expresar o seu apoio a estes colectivos.