URBANISMO

“AS7PARROQUIAS” DESTACA NO SEU ÚLTIMO NÚMERO O INVESTIMENTO DE 2,6M€ DO GOBERNO CENTRAL EN CEDEIRA

O Concello de Cedeira está a distribuír estes días entre a veciñanza unha nova edición do boletín informativo “As7Parroquias”, no que recolle as novidades máis destacadas do traballo municipal dos últimos meses. Así, neste número 18 da publicación destaca a noticia do compromiso acadado polo Ministerio de Transición Ecolóxica de financiar con 2,6 millóns de euros a rexeneración da praia da Madalena e o proxecto de recuperación da antiga cetaria das Sonreiras, así como a modificación de créditos aprobada polo pleno, a través da cal o Concello incorpora máis de medio millón de euros ao capítulo de investimentos deste ano, procedentes de remanentes do pasado 2020.

O novo programa de axudas creado polo Concello de Cedeira para paliar o impacto da covid nas empresas e autónomos da vila, dotado con 70.000 euros, é outra das cuestións das que informa o boletín. “As7Parroquias” tamén dá conta da execución dos orzamentos participativos, coa realización do parque de calistenia e o ciclo de auto-cine, así como da presencia de Cedeira na última edición de Fitur.

O rexeitamento aos proxectos de parques eólicos mariños que proxecta Iberdrola no litoral próximo a Cedeira e tamén ao parque eólico terrestre Badulaque é tamén un tema que aborda o boletín, en cuxas páxinas o Concello informa igualmente da recente contratación de todos os suministros enerxéticos municipais de fontes renovables. A nova ordenanza de protección de camiños municipais e o apoio do Concello á flota pesqueira fronte ao regulamento proposto pola Unión Europea son outros dos temas que aborda a publicación.

A Banda de Música Vila de Cedeira protagoniza desta volta a contraportada do boletín, despois dunha recente renovación na directiva. O relevo xeracional garante o futuro desta formación, con grande arraigamento na localidade e cun espíritu bulideiro que a leva a integrar todo tipo de músicas no seu repertorio.

Pódese descargar o boletín na seguinte ligazón:

DESCARGA Boletín nº 18

O CONCELLO ACOMETERÁ A MELLORA DE MÁIS DE 1,2KM DE BEIRARRÚAS CON CARGO AO POS+ADICIONAL

O goberno local aprobou no último pleno a proposta para investir os fondos procedentes do POS+Adicional por maior achega da Deputación no proxecto de “Mellora das beirarrúas na Avenida de España, as rúas Ponte Nova, José Pascual Lopez Cor, Salinas e Camiño de Pitilleira”. Segundo informa o alcalde, Pablo Diego Moreda Gil, o Concello de Cedeira conta cun orzamento de 241.926,09€ deste plan provincial, dotado cos fondos procedentes das baixas nas adxudicacións, e o devandito proxecto está presupuestado en 219.932,78. Así, aínda quedarán preto de 22.000€ para unha segunda fase que o goberno local prevé destinar á mellora de diferentes camiños e viais de titularidade municipal.

O proxecto que se vai acometer nesta primeira fase servirá para mellorar máis de 1.200 metros lineais de beirarrúas en cinco viais diferentes do casco urbano de Cedeira. Así, na Avenida de España, rúa José Pascual López Cor, Camiño de Pitilleira e Salinas levantarase o pavimento actual, que se atopa bastante deteriorado, para instalar unhas losas rectanculares de formigón granallado, mentres que na Ponte Nova colocaranse losas de pedra granítica.

A substitución de beirarrúas realizarase en todos os tramos das rúas citadas, salvo en López Cor, onde o cambio afectará só a unha das marxes. No caso do tramo da Avenida de España comprendido entre as rúas Vila Méjico e As Pontes de García Rodríguez, aproveitarase a intervención para ampliar as beirarrúas e darlles un ancho de 1,80 metros.

O goberno local ten previsto levar ao próximo pleno o segundo proxecto do POS+Adicional, que incluirá melloras en viais de Santalla, Candelas, Cordolelas e Santallamar.

ADXUDICADAS AS OBRAS DE CONSTRUCIÓN DUN SKATE BOWL E UNHA TIROLINA DO PARQUE DO CAMIÑO REAL

A Xunta de Goberno do Concello de Cedeira acaba de resolver a adxudicación da obra do skate bowl e a tirolina que se van situar no parque do Camiño Real da Madalena. O concurso, que saiu cun orzamento de 126.000€, recibiu cinco ofertas entre as que a mellor valorada foi a de Roig i Fills Associats, que se fai cargo da actuación por un prezo de 120.969,75€ (IVE incluído). O prazo de execución é de tres meses e, ao igual que coa obra de reforma do anel da Praza Roxa, o comezo das obras adíase ata o mes de setembro para interferir o menos posible no lecer da poboación e dos visitantes durante o verán.

Tal e como destacou o alcalde, Pablo Diego Moreda Gil, é unha intervención “que vai sumar novos atractivos na vila para a infancia e a mocidade, en definitiva ás familias, nun espazo próximo á praia, con arborado e con todos os elementos para gozar do aire libre con tranquilidade e seguridade”.

O skate bowl ou bañeira de patinaxe ocupará o lugar no que agora hai unha fonte circular sen uso. Trátase dunha pista para skaters, cunha unha superfie irregular e pendientes e formas redondeadas. Terá unha profundidade máxima menor a un metro e pendientes de entre 80 e 90 centímetros, de maneira que ofreza seguridade aos principiantes e que sexa suficientemente atractiva para aqueles máis experimentados co monopatín. A instalación para patinar será de 176 metros cadrados, aínda que a superficie total, co perímetro habilitado, será de 264 metros cadrados.

A tirolina estará preto da randeeira hexagonal que hai nun dos parques de xogos da zona. Terá 28 metros de largo, cunha altura de catro metros na salida e tres na chegada, e o percorrido terá solo de caucho. Cómpre recordar que o goberno local ten tamén o proxecto de construír neste parque infantil unha cuberta que protexerá da choiva e o vento case toda a zona de xogos, salvo a devandita randeeira.