URBANISMO

O CONCELLO INVESTIU PRETO DE 30.000€ NA EXECUCIÓN DUN NOVO PAVIMENTO NO PATIO DO COLEXIO AREAL

O Concello de Cedeira vén de investir preto de 30.000€ na execución dun novo pavimento para a pista deportiva do colexio Areal –actual extensión do CEIP Nicolás do Río- para unificar o seu nivel coa zona cuberta do patio e eliminar os chanzos actuais. A obra permitiu dotar á superficie dunha nova canalización de augas pluviais, que se recollen a través de novos sumidoiros na liña de unión entre as dúas zonas. O alcalde, Pablo Diego Moreda Gil, destacou que unha vez máis esta é unha actuación que fala da aposta do goberno municipal pola mellora da calidade do ensino público e “coa que esperamos vencer atrancos e achandar o camiño á Consellería de Educación para que asuma a cuberta deste espazo”.

A obra consistiu na aplicación de formigón con fibra, cun acabado semi-pulido, acaído para a práctica deportiva. O firme anterior era de aglomerado e presentaba unha superficie moi irregular na que a cotío se formaban pozas de auga. A existencia de chanzos contribuía tamén a que se produciran caídas e pequenos accidentes entre a cativada.

En febreiro de 2021 o pleno da corporación de Cedeira aprobou por unanimidade unha moción na que se recollía a petición, compartida pola comunidade educativa, de que se dote ao patio do Areal dunha estrutura cuberta. A intervención do Concello é unha aposta máis para que se faga realidade dita demanda.

O CONCELLO DISTRIBUE ENTRE A CIDADANÍA UN NOVO NÚMERO DO BOLETÍN INFORMATIVO AS7PARROQUIAS

O goberno local de Cedeira reparte estes días entre a veciñanza o boletín informativo As7Parroquias, que chega ao seu número 22. A publicación dá conta do traballo do Concello nos últimos meses, destacando o balance da campaña de turismo deste verán. A revalorización do atractivo da vila para as persoas que a visitan grazas entre outras cousas á recuperación das cetarias do Sarridal, a posta en marcha da vía ferrata, ou a reapertura do Castelo da Concepción, xunto coa alta afluencia que tiveron as festas e o resto das actividades confirmaron unha volta á normalidade de antes da pandemia.

No boletín infórmase do balance dos proxectos acollidos ao programa do GALP A MariñaOrtegal na localidade. Foron máis de 800.000 euros investidos en diferentes iniciativas dirixidas a poñer en valor a economía e a cultura ligadas á pesca e o marisqueo en Cedeira. A localidade distinguiuse no último plan de actuación plurianual do GALP como unha das máis dinámicas no desenvolvemento de accións e o Concello participa xa na definición do novo plan que estará vixente ata o 2027.

As7Parroquias dá conta tamén do avance nas escavacións no xacemento do Sarridal, da adxudicación de axudas ao tecido asociativo no eido deportivo e no sociocultural, da licitación da ambiciosa renovación do pavimento do polideportivo municipal e, entre outras cousas, a compra de libros para a escola infantil da Galiña Azul. O boletín trata tamén sobre o recorte de profesorado no IES Punta Candieira e do rexeitamento que esta medida xerou entre a cidadanía e no Concello, así como do ninguneo da Consellería de Educación á petición dunha entrevista urxente que foi unanimemente solicitada pola corporación municipal.

A contraportada do boletín está adicada á Escola de Música Vila de Cedeira, que cumpre dez anos con gran vitalidade.

Pódese descargar o Boletín na seguinte ligazón:

VER PDF Boletín as 7 parroquias nº22

CEDEIRA LICITA DE NOVO AS OBRAS DE REPARACIÓN DAS CUBERTAS DOS ANTIGOS ESCOLARES DE SAA E SISALDE

O Concello de Cedeira acaba de publicar de novo a licitación da obra de “Consolidación e reparación da cuberta nos centros escolares de Saa e Sisalde Maior”, debido a que a empresa adxudicataria solicitou a rescisión do contrato. A actuación conta cun orzamento de 74.163,47€ (IVE incluído), con cargo ao programa provincial POS+2021, e as empresas interesadas teñen ata o día 7 de novembro de prazo para a presentación das súas ofertas.

Trátase dunha actuación que ten a consideración de urxente, xa que é precisa para garantir a conservación destes dous edificios, catalogados como arquitectura indiana e herdanza da emigración cedeiresa. O expediente de licitación, que segue o procedemento aberto simplificado, está publicado na Plataforma de Contratación do Sector Público.

As dúas construcións, hoxe empregadas para usos comunitarios, foron promovidas pola mesma sociedade de instrución e beneficencia “Progreso de Esteiro”, fundada en La Habana. Son edificacións de dúas alturas, nas que o baixo estaba antigamente ocupado por unha aula de nenos e outra de nenas, e o primeiro piso era a casa do mestre.

A de Saa data do ano 1925 e está afectada por unhas filtracións de auga e humidades na cuberta e na cornisa perimetral que provocaron o deterioro do tramado de madeira. Pola súa banda, o antigo escolar de Sisalde Maior foi levantado en 1931 e necesita a urxente consolidación e reparación dos muros, a cuberta e os caleiros. A súa estabilidade está en perigo, como o anterior inmoble, polas humidades que afectaron ás vigas, estrutura de madeira e muros de carga.

O goberno local acometera en 2018, cun investimento de preto de 60.000€, obras de pintura e renovación da carpintería exterior nos dous edificios, co que mudou a imaxe de abandono no que estaban. Porén, esta nova intervención é precisa polo estado das cubertas e resposta á demanda expresada pola Asociación de Veciños de Esteiro.

En ambos os dous edificios, as obras consistirán na sustitución dos elementos deteriorados, o saneamento das pezas de madeira que poidan ser recuperadas, a impermeabilización de muros e o reforzo estrutural en determinados puntos.