SERVIZOS

O CONCELLO CELEBRA A POSTA EN MARCHA DAS OBRAS DE RECUPERACIÓN DAS VELLAS CETARIAS DO SARRIDAL

O alcalde de Cedeira, Pablo Diego Moreda Gil, visitou hoxe co xefe da Demarcación de Costas de Galicia, Rafael Eimil, e o enxeñeiro xefe do mesmo organismo, Carlos Gil, as obras de recuperación das antigas cetarias do Sarridal, que acaban de comezar. O Ministerio de Transición Ecolóxica financia con 340.600€ este proxecto, que o alcalde considerou importantísimo para a posta en valor da tradición pesqueira da vila. “Temos que agradecer o compromiso do Goberno coa recuperación de parte da nosa historia, porque garante que se manteña a memoria de como se traballaba nestas estruturas –comentou Moreda-; e tamén porque vai ser un atractivo máis nun lugar que xa é un tesouro desde o punto de vista turístico, co xacemento arqueolóxico do Sarridal, o Castelo da Concepción, un mirador espectacular e a praia das Sonreiras, todo concentrado no mesmo lugar”.

O proxecto, que executa a empresa Tragsa, ten un prazo de tres meses. A intervención vai consistir, por un lado, na recuperación e consolidación das vellas estruturas das cetarias, e por outro, na adecuación dos accesos –que permitirán achegarse ata elas- e tamén na creación dun miradoiro na parte alta do cantil, no que haberá un panel explicativo sobre como funcionaban e como se traballaba nestas vellas piscinas de mar, onde se gardaba e engordaba o marisco vivo que logo se comercializaba a nivel nacional.

O goberno local de Cedeira recuperou este proxecto no anterior mandato, despois de que quedara paralizado por problemas técnicos desde o ano 2011. Así, o Concello encargouse do informe de impacto ambiental e Demarcación de Costas someteuno a exposición pública a finais de 2018 e tramitou a addenda necesaria para actualizalo e corrixir os problemas que se detectaran no pasado.

Xunto con esta actuación, o Ministerio de Transición Ecolóxica está a tramitar o proxecto de rexeneración da praia da Magdalena, valorado nuns 2,3 millóns de euros. Segundo se puxo de manifesto na visita de hoxe, as previsións de Demarcación de Costas pasan por ter en marcha a mediados do próximo ano as obras de rexeneración da praia. O proxecto superou o período de alegacións e está pendiente a licitación das obras.

CEDEIRA MELLORARÁ MÁIS DE 1,6KM DE CAMIÑOS MUNICIPAIS CON CARGO Á SEGUNDA FASE DO POS+ADICIONAL

O Concello de Cedeira vai acometer, con cargo á segunda fase do POS+Adicional 2021, o proxecto de mellora dos firmes nos viais que dan acceso aos núcleos rurais de Santallamar, Corcobelas, Magoira e Os Candales. Son, en total, máis de 1,6 quilómetros de camiños municipais nos que, con esta actuación presupostada en 41.489,47€, se vai incrementar a seguridade do tráfico rodado.

Segundo informou o alcalde, Pablo Diego Moreda Gil, nestas obras vaise investir a cantidade que quedaba despois da aplicación da primeira fase do programa provincial. Así, o Concello de Cedeira contaba cun orzamento do POS+Adicional de 241.926,09€, dos que estaban pendentes de gastar 21.993,31€ tras adicar 219.932,78€ ao proxecto de Mellora das beirarrúas na Avenida de España, as rúas Ponte Nova, José Pascual Lopez Cor, Salinas e Camiño de Pitilleira. O arranxo dos catro camiños municipais que se acomete agora ten un presuposto de 41.489,47€, polo que a cantidade que achega a institución provincial vai ser complementada con outros 19.494,16€ de orzamento municipal.

Nos catro casos, a actuación vai consistir no reforzo e tratamento do firme existente, que se atopa deteriorado polo tráfico e o efecto das choivas. O vial de Santallamar é o que dá acceso ao núcleo de vivendas máis importante dos catro. As obras afectarán a un tramo de 221 metros de lonxitude, cun ancho medio de 3,10 metros. No caso do vial de Corcobelas, que sae da estrada AC-566 para enlazar co devandito núcleo, o camiño ten 410 metros de lonxitude e un ancho medio de 3,10 metros.

Na zona de Magoira vaise actuar en dous camiños, un de 240 metros de percorrido e outro de 316, ambos os dous cun ancho medio de 3,10 metros. Por último, no camiño dos Candales, que ten o mesmo ancho, as obras afectarán a 447 metros de lonxitude.

Os traballos consistirán na limpeza das gabias para aproveitar todo o ancho dos viais e na aplicación en quente dunha capa de cinco centímetros de espesor de aglomerado asfáltico.

O CONCELLO PROMOVE INVESTIMENTOS POR VALOR DE CASI 295.000€ PARA A MELLORA DAS INSTALACIÓNS DEPORTIVAS

O goberno local de Cedeira ten previsto realizar varios investimentos para a mellora das instalacións deportivas municipais por valor de case 295.000€. O máis importante é o cambio do pavimento e o marcador electrónico do Polideportivo, un proxecto valorado en máis de 189.000€ e no que o Concello vai solicitar a colaboración da Deputación Provincial da Coruña. Xunto con esta intervención, estes días saíron a concurso outras dúas para pechar as pistas de pádel e cambiar o sistema de deshumectación da piscina municipal, e acaba de adxudicarse un contrato menor para cambiar varios elementos da carpintería de aluminio do campo de fútbol.

A intervención máis importante das que proximamente van afectar ás instalacións deportivas de Cedeira é a do Polideportivo Municipal, para a que o Concello está a tramitar unha subvención da Deputación da Coruña tal e como se aprobou, por unanimidade, no último pleno da corporación. O investimento ascende a 189.793,23€, dos que a administración provincial cubriría o 80%, e os traballos consistirán na substitución do pavimento e o cambio do marcador electrónico. O proxecto contempla a retirada do parquet existente, que está colocado directamente sobre o formigón sen separación nin impermeabilización, por un pavimento en madeira maciza de fresno sobre rastrel, con membrana impermeabilizante contra o formigón e os muros exteriores. En canto ao marcador, faise convinte o cambio para que resposte ás normas dos diferentes deportes que alí se practican.

O alcalde, Pablo Diego Moreda Gil, comentou que o Polideportivo Municipal “ten una ocupación practicamente total de luns a domingo, algo que é unha alegría, porque fala do arraigo que ten o deporte na nosa vila”. Segundo explicou, “estas instalacións cumpriron xa trinta anos, e a intensidade de uso fai necesaria unha posta ao día máis aló dos traballos de mantemento e mellora que cada ano afronta o Concello, como foron os arranxos nos vestiarios, o cambio da iluminación, o elevador para persoas con mobilidade reducida, a baranda nas bancadas…”.

Xunto con este proxecto, o Concello acaba de sacar a concurso as obras de peche das pistas de pádel, por un presuposto de 59.887,49€ (IVE incluído), e o cambio do sistema de deshumectación da piscina municipal, por 39.061,42€ (IVE incluído). Ambas as dúas llicitacións están publicadas na Plataforma de Contratación do Sector Público e as empresas interesadas teñen de prazo ata o vindeiro día 26 de outubro para presentar as súas ofertas.

Nas pistas de pádel, o proxecto consiste en completar o peche das dúas canchas exteriores, que contan actualmente cunha cuberta de chapa autoportante e paredes de vidro templado e malla electrosoldadada insuficientes en caso de climatoloxía adversa. A obra que se vai acometer permitirá dar uso ás instalacións ao longo de todo o ano, independientemente da choiva e o vento. Pola súa banda, na piscina municipal o investimento vai dirixido a cambiar a actual sistema de deshumectación por outro novo, dado que o seu estado faría máis costosa a reparación. O alto grao de humidade da instalación, explican desde o goberno local, fai preciso este equipamento para evitar danos estruturais ou a proliferación de mofo ou fungos.

Por último, o Concello de Cedeira acaba de contratar á Carpintería López y Villadóniga o cambio de tres portas, dúas ventás e catro barandas de aluminio no campo de fútbol municipal, por un importe de 5.313€ (IVE incluído).