PARTICIPACION

GRUPOS POLÍTICOS E PERSOAL MUNICIPAL DE CEDEIRA FAN ACTIVISMO VIRTUAL CONTRA AS VIOLENCIAS NESTE 25N

Os tres grupos municipais no Concello de Cedeira participaron esta mañá na lectura do manifesto da iniciativa “En negro contra as violencias”, para expresar un ano máis o seu rexeitamento a toda clase de maltrato ás mulleres. Tal como recordou o alcalde, Pablo Diego Moreda Gil, Cedeira está adherida á dita acción colectiva, que funciona ao longo de todo o ano pero que nesta data do 25N intensifica o seu traballo a prol da sensibilización de todos e todas contra o machismo. Neste 2020, dadas as especiais limitacións que impuxo o coronavirus, as accións fanse de xeito virtual, compartindo a mensaxe e as imaxes na web e nas redes sociais do Concello.

O Concello repartiu entre o seu persoal, en establecementos comerciais e empresas, entidades, e en xeral, ao tecido social da vila, camisetas e suadoiros, máscaras e carteis coas verbas “25N Cedeira en negro” e outros lemas da campaña. Aínda que o material quedou escaso para atender toda a demanda, e o goberno local pediu escusas por elo, o interese da veciñanza por apoiar esta acción conseguiu darlle moita visibilidade no municipio.

Os traballadores e traballadoras de mantemento, da oficina de Turismo, de Servicios Sociais, da biblioteca municipal e doutras instalacións municipais fixéronse fotos vestindo prendas negras coa mensaxe “25N Cedeira en negro” que van ser compartidas na páxina do Concello en Facebook, tamén tinguida de loito neste día.

Nun vídeo, que tamén quedará colgado hoxe nas redes sociais do Concello de Cedeira recóllese a lectura do manifesto, no que se asume a “obriga de todas e todos nós de traballar todos os días pola igualdade en todos os ámbitos da nosa vida porque só así seremos capaces de transformar a nosa sociedade”. A mensaxe fai incidencia en que “este 25 de novembro en especial temos que facer máis visible aínda a loita contra a violencia machista, darlles a todas as mulleres maltratadas a visibilidade que lles nega a terrible crise sanitaria que estamos a padecer”.

Link ao vídeo:

ALUMNADO DO IES PUNTA CANDIEIRA PINTA UN MURAL COLECTIVO SOBRE A IGUALDADE

A defensa da igualdade entre homes e mulleres, e tamén doutros valores como a convivencia, o respecto ou a equidade, é o tema do novo mural que desde hai poucos días decora a parede situada en fronte do IES Punta Candieira. A pintura é o resultado dun traballo colaborativo que o Concello de Cedeira lle propuxo ao centro educativo e que implicou tamén á agrupación artística Vella Escola.

Segundo explicou o concelleiro de Facenda e Servizos Económicos, Ocio e Tempo de Lecer, Manuel Martínez, a iniciativa naceu do devezo do goberno local de traballar pola igualdade de xénero en diferentes eidos, neste caso coas novas xeracións da vila. A proposta foi moi ben acollida polo IES Punta Candieira e púxose en marcha un proceso de reflexión e xeración de ideas co alumnado da asignatura optativa de Igualdade que se imparte ao alumnado de 1º da ESO no centro. Do mesmo saíron frases, debuxos, motivos, etc, que o colectivo artístico Vella Escola foi depurando e ordenando ata chegar ao deseño final.

Pablo Castiñeira, director de Vella Escola, comenta que o resultado desa fase de reflexión sorprendou pola madurez das propostas, nas que se percibiu o traballo feito previamente polo centro co alumnado. “Foi un proceso con moita participación, do que obtivemos reflexións bastante profundas, con diferentes puntos de vista e enfoques moi orixinais”, comentou Pablo Castiñeira.

O artista Brais Rodríguez dirixiu a fase de execución, na que se involucraron todos e todas as estudantes de primeiro de Bacharelato. A pintura ocupa 35 metros lineais do muro do campo municipal do Beco, e na mesma está o nome de Cedeira sobre fondo morado e con mans e puños pechados simbolizando a unión, a loita pola igualdade e tamén a diversidade. A bandeira LGTBI, o “smile” ou a palabra “Respeto” en referencia á canción de Aretha Franklin forman parte tamén desta creación colectiva.

Máis murais

A pintura a prol da igualdade que acaban de pintar os e as estudantes do IES Punta Candieira súmase á galería de arte na rúa que está a promover o goberno local de Cedeira. Nos últimos días quedou tamén rematado o mural adicado ao Samaín que a artista Laura Recio (@aole.ilustra en Instagram) debuxou na parede do número 13, da Rúa da Cruz. O desfile de pantasmas que este ano non puido pasar por este lugar quedou plasmado na parede a través do seu debuxo, no que aparecen pequenos e maiores de todas as idades, cabazas tebrosas e bruxas boas, notas musicais e estrelas.

O CONCELLO REPARTE Á VECIÑANZA UN NOVO NÚMERO DO BOLETÍN INFORMATIVO “AS7PARROQUIAS”

O Concello de Cedeira está a repartir estes días polos domicilios, centros sociais e espazos públicos do municipio o novo número do boletín As7Parroquias, unha ferramenta coa que o goberno local reforza a súa vontade de transparencia e rendición de contas ante a veciñanza. Este número, o 15, chega cunha mensaxe do alcalde, Pablo Diego Moreda, que se dirixe directamente á cidadanía cedeiresa para agradecerlle o seu esforzo para encarar da mellor maneira a crise sanitaria e recoñecer moi especialmente o traballo das persoas que estiveron día a día ao pé do canón mantendo en funcionamento os servizos esenciais. O rexedor local expresa o compromiso do goberno municipal “de estar a carón de vós e apoiarvos na superación das dificultades” agora que chega outra etapa difícil.

As accións do Concello para apoiar aos emprendedores e pemes da localidade ocupan, precisamente, a portada do boletín As7Parroquias, tanto no que respecta ao reparto de axudas como á posta en marcha do Plan de Mellora do Comercio e a Hostalería. As páxinas do caderno informativo dan conta tamén da aprobación dos presupostos municipais, cunha compoñente máis social este ano, e doutras actuacións como a compra dunha ducia de guindastres que están a mellorar a calidade de vida en familias con escasos recursos e persoas enfermas ao seu coidado.

As7Parroquias recolle a actividade do goberno local en diferentes eidos. Así, este número inclúe un artigo sobre a adxudicación da rehabilitación do Pazo de Moscoso e outro sobre a volta a mans do Concello do antigo escolar de Santalla. Tamén informa das novas actuacións en materia de renovación do sistema de iluminación pública e mellora do saneamento, así como a posta en marcha dun estudo sobre o río Condomiñas que dará paso á súa rexeneración, nun tramo de cinco quilómetros curso arriba desde a Ponte da Acea.

Tamén dá conta o boletín do comezo da terceira campaña arqueolóxica deste ano no Castro Sarridal, que incluirá a colocación dun peche perimetral e un panel informativo. A concesión de axudas ao tecido asociativo da vila e ás entidades deportivas, o impulso dun Plan de Igualdade ou a realización dun novo mural nas rúas de Cedeira son outros dos temas que aborda este número da revista, na que tamén se fala da importancia das obras que se van realizar de inmediato na AC566 e das moitas xestións e actuacións que ao longo dos anos liderou o Concello para que a Xunta asumise esta actuación.

Como é habitual, a contraportada de As7Parroquias está adicada a unha entidade local, desta volta ao Club Candieira. Trátase dunha asociación creada hai poucos meses e que agrupa a diferentes afeccionados a deportes de montaña, tanto sobre dúas rodas como a pé, e que ten entre os seus obxectivos a mellora de varios camiños polos que adoitan transitar.

DESCARGA PDF boletín As7Parroquias nº 15