NOVAS

O CONCELLO ADXUDICOU A RENOVACIÓN DA ILUMINACIÓN PÚBLICA EN TODA A AVENIDA AREA E PARTE DE CASTELAO

O Concello de Cedeira vén de adxudicar a obra de renovación do alumeado público nas avenidas Area e Castelao por un importe de 84.095€ (IVE incluído). O proxecto ten un prazo de execución dun mes e consiste en cambiar o vello sistema con lámpadas de vapor de socio polo novo, máis eficiente, tipo LED. En total van renovarse 35 luminarias, dúas delas na avenida Castelao e o resto na Area. O alcalde, Pablo Diego Moreda Gil, subliñou o esforzo realizado nos últimos anos na eficiencia da rede de iluminación, co que “actualmente Cedeira ten o 99,99% do seu alumeado público con tecnoloxía LED”.

Segundo destaca o alcalde, Pablo Diego Moreda, “ter mellor iluminada este vial, no que hai moito comercio e actividade, vai redundar en que teña máis afluencia, en maior seguridade para o tráfico e para os peóns, ademais de reducir o consumo eléctrico”. O contrato inclue a colocación dos novos farois sobre columnas de oito metros de alto, as canalizacións subterráneas, a posta a terra e as arquetas de paso, así como a retirada das luminarias actuais. É unha obra que o Concello de Cedeira afronta con financiación da segunda fase do POS+Adicional 2022. As novas bombillas LED garanten un fluxo de luz acaído para as necesidades de cada zona, beirarrúa ou calzada ao tempo que permiten un grande aforro económico. Precisan menos da metade da potencia eléctrica que as lámpadas tradicionais, de vapor de sodio, para producir a mesma iluminación.

Con esta nova actuación, o alcalde reiterou o compromiso do Concello coa mellora da eficiencia enerxética e apuntou que os proxectos que xa se teñen levado a cabo neste eido permitiron que a suba do prezo da electricidade, especialmente durante o pasado ano, non impactase nas contas municipais.

No ano 2020 o Concello procedera a renovar o resto da iluminación da Avenida Castelao, cun investimento de máis de 47.000€ para o cambio de 97 puntos de luz. Agora, este novo proxecto permitirá rematar a modernización desta vía, coa substitución das dúas únicas farolas antigas que quedaban, na rotonda da que parte a avenida da Area. Nesta última vía instalanse os 33 restantes LEDs desta actuación.

O NATACIÓN CEDEIRA ESTRÉASE NUN CAMPIONATO INTERNACIONAL COA PARTICIPACIÓN DE CINCO DEPORTISTAS

O Club Natación Cedeira está a protagonizar un arranque de ano extraordinario, cos seus deportistas despuntando en natación, atletismo e triatlón. Desde o Concello quérese felicitar á entidade polos éxitos acadados e salientar que en poucos días a entidade vai a participar por primeira vez nunha competición internacional, na Copa de Europa de triatlón junior que se vai disputar o vindeiro domingo en Melilla.

O director do club, Xan Suárez Vilela, destaca non so que Cedeira vaia estar por primeira vez nun campionato internacional, senón que chega alí con cinco deportistas. Damián Suárez, Samuel Sánchez, Lucas Riola, Juan Piñón e Irea Alén van participar na competición europea, un fito que Xan Suárez considera importante non tanto polos resultados que poidan acadar senón como experiencia e para abrirse portas cara a competicións de maior nivel.

Un repaso aos éxitos deste comezo de ano corrobora o paso firme co que o Club Natación Cedeira está a avanzar competindo con tres federacións e competicións diferentes. Falando de natación, Andrea Freire foi subcampioa e Irene García levou o bronce no recente campionato galego na categoría alevín.

Na mesma cita Teo Sanesteban conseguiu tres ouros e unha prata, convertíndose no mellor deportista da cita. Cómpre destacar o potencial deste nadador, que entrou no chamado Grupo Especial de Seguimento da Federación Galega, no que é chamado de tempo en tempo para facer adestramentos e concentracións.

Tamén no eido do atletismo logrou éxitos destacables o Natación Cedeira. Irea Alén foi a subcampioa galega no campeonato galego de campo a través sub18 e, máis recentemente, Irene García e Manuel Sande foron tamén subcampioes na competición alevín. No triatlón, a participación de cinco deportistas de Cedeira no próximo europeo xuvenil é resultado do seu éxito no campionato de España que se celebrou en outubro pasado. Xa en decembro, preto do remate de 2022, o club conseguiu a mellor clasificación por equipos no campionato Nada+Corre, un éxito máis que corrobora a boa canteira e o futuro que ten o Natación Cedeira. O pasado ano, ademais, foi o único club que levou catro outros e un bronce en campionatos de España de Triatlón e Acuatlón.

A entidade conta na actualidade con 120 deportistas federados a partir de catro anos. Adestran na piscina, no pavillón do IES Punta Candieira, no local que ten o club preto do campo de fútbol e tamén no exterior, moitas veces polos viais pouco transitados do polígono de A Trabe. Xan Suárez subliña a importancia que ten conseguir a piscina de 25 metros, unha demanda que o goberno local presentou ao pleno da corporación para reforzala coa unanimidade das forzas políticas. Precisamente a intensa actividade do Club Natación Cedeira e os seus éxitos é un dos argumentos do goberno local para reclamar á Xunta de Galicia e á Deputación da Coruña a súa implicación na financiación da nova piscina.

O CLUB DE REMO VIVE UN MOMENTO DOCE POLOS BOS RESULTADOS COLLEITADOS POLOS SEUS DEPORTISTAS

O Club de Remo Cedeira está a vivir un momento doce polos destacados éxitos que está a colleitar en competicións nacionais e internacionais e polo seu prometedor comezo de tempada, con deportistas que sen dúbida poderán destacar nos campionatos da vindeira primaveira e o verán. A entidade ten unha remeira, Raquel Rodríguez, estudando cunha beca nunha universidade de California e outra, Candela Martínez, que acaba de obter un título nacional de remoergómetro, posicionada para entrar na selección nacional de remo en pista. Son so dous nomes do excelente equipo deste club, un dos de maior traxectoria na vila e que máis ten contribuído, por tanto, a consolidar a fonda tradición deportiva de Cedeira.

O presidente do club, José María Hermida, enumera os éxitos máis recentes no que vai deste ano 2023: medalla de ouro no Campionato de España de longa distancia na categoría xuvenil feminina; ouros nas competicións nacionais de remoergómetro nas categorías veterá e infantil masculinas; bronce no nacional de remoergómetro alevín feminino; prata e bronce no campionato de España absoluto feminino; bronce nos nacionais xuvenís masculino e feminino; e medallas de ouro e de prata por autonomías no campionato de España absoluto masculino. Súmanse estes logros aos do ano anterior, no que as remeiras do clube tamén colleitaron bos resultados en campinatos do Mundo e de Europa. Ocupan por tanto os remeiros e remeiras de Cedeira unha prometedora posición cara ás competicións a nivel nacional e internacional que se convocarán no que resta deste ano.

A historia da entidade remóntase a 1960. Naceu da man da Confraría de Pescadores de Cedeira e xa desde os seus primeiros anos combinou o banco móvil e o fixo. Hermida recorda que nos anos 70 a vida do club cobrou novos folgos co impulso de Juan Antonio Rodríguez. Daquela despuntou a remeira María Brocos, que abriu camiño á entidade nas competicións internacionais e á presencia de Cedeira na selección nacional. Foi tamén importante na historia do clube o ano 2016, cando o club se estreou con traíña propia na liga galega, na que se mantivo de maneira ininterrompida ata a tempada 2022.

Desde o goberno local destacan o esforzo do club e os logros que ten acadado, ao tempo que subliñan a importancia de que manteña en Cedeira a tradición do remo, tan vencellada á cultura mariñeira da localidade.