NOVAS

O Concello de Cedeira celebrará este sábado, 10 de xuño, a presentación do libro “O Pazo de Moscoso en Cedeira: Datos para a súa historia”, obra do cronista oficial da localidade, Rafael Usero. O acto terá lugar ás 12.00h do mediodía no patio do propio inmoble, situado no casco vello e que vén de ser rehabilitado para albergar diferentes dependencias municipais.

A presentación contará coa presencia do autor, Rafael Usero, que tiña listo o manuscrito hai anos, pouco despois de que o Concello comprara o edificio coa intención inicial de adicalo a expoñer os obxectos vencellados á historia local reunidos polo propio Usero. Así, cando está a piques de abrir a exposición coa “colección Usero” en dúas salas do Palacete Municipal, ve tamén a luz o libro sobre o Pazo de Moscoso. O acto celebrarase no patio do edificio, convertido agora en praza pública e no que se ten prantado unha laranxeira en recordo das árbores froiteiras que o poblaban antigamente.

Segundo explicou Ermitas García, concelleira de Cultura en funcións, Rafael Usero conta neste libro, cun estilo moi didáctico, non so a historia do edificio senón tamén parte do pasado da vila de Cedeira. Coa súa lectura é posible descubrir detalles da organización social e do modo de vida dos cedeireses e cedeiresas ao longo de varios séculos. O actual Pazo Moscoso foi construido sobre un antigo palacete medieval, de maneira que percorrer a súa historia e as súas transformacións, usos e diferentes habitantes é tamén achegarse á historia de Cedeira desde a Baixa Idade Media ata a actualidade.

O Concello de Cedeira editou e imprimiu 400 exemplares do libro, que tamén se vai poñer a disposición do público en versión dixital na web municipal. O volume está ilustrado con fotografías cedidas por Iago Leonardo, un fotógrafo nado en Madrid e asentado en México pero moi vencellado a Cedeira por lazos familiares e de amizade.

Desde o goberno local en funcións agradecen a colaboración de Leonardo e o traballo de Rafael Usero, non so nesta investigación sobre o Pazo de Moscoso senón polo completo legado de coñecementos e de obxectos que atesourou ao longo dos anos sobre a historia de Cedeira.

DESCARGA PDF libro “O Pazo de Moscoso en Cedeira: Datos para a súa historia”

Os “besteiros” da Capelada teñen todo preparado para celebrar esta fin de semana a tradicional rapa, un costume ancestral que consiste en reunir os cabalos que pastan ceibes pola serra para rexistralos, desparasitalos e cortarlles as crinas. A asociación San Andrés Eventos conta co apoio do Concello de Cedeira para organizar o programa de actos, que comezará xa o sábado pero que terá a cita máis importante na mañá do domingo, cando se reúnen as bestas e se conducen ao curro.

O sábado farase xa o rexistro e desparasitado dos animais e a xornada rematará cunha ceabaile amenizada pola cantante Marisol Novo. A partir das dez da mañá do domingo comezará a baixada das bestas, que serán conducidas ao curro. Alí, os besteiros irán collendo os animais para cortarlles as crinas, diante do público que asistirá desde as bancadas. É un evento que cobrou particular interese o ano pasado grazas á estrea da serie “Rapa”, rodada en Cedeira e que retrataba este particular espectáculo. A asociación San Andrés Eventos ten colocado indicacións para facilitar a afluencia do público ao curro.

Por outra parte, a actriz compostelá Greta Marí (Santiago, 1987) leva este sábado ao Auditorio de Cedeira o seu espectáculo “The Great Greta”, unha peza multidisplinar para o público adulto na que combina danza, humor e circo e que define como unha “oda á xente rara”. Baixo a dirección de Paula Quintas, a creadora e protagonista da obra recrea algúns aspectos da súa propia vida con outros alleos nunha montaxe na que a iluminación e a música son elementos narrativos fundamentais. As entradas custan 2,5€ e poden reservarse anticipadamente ou ben comprarse antes da función na billeteira. A función será ás 20.30h.

Greta Marí estreou recentemente o seu primeiro espectáculo en solitario en Santiago. É licenciada en Ciencias da Actividade Física e o Deporte na especialidade de Danza e graduada en Expresión Corporal pola Facultade de Motricidade Humana de Lisboa. A súa traxectoria como actriz estivo centrada na danza e no circo, cun dúo cómico, un espectáculo de acrobacias e outras experiencias que fusionaban diferentes artes escénicas.