Skip to content Skip to left sidebar Skip to footer

NOVAS

A actividade volverá o luns día 22 ao xacemento arqueolóxico de Punta Sarridal

A ACTIVIDADE VOLVERÁ O LUNS DÍA 22 AO XACEMENTO ARQUEOLÓXICO DE PUNTA SARRIDAL

O próximo luns día 22 volverá a actividade ao xacemento arqueolóxico de Punta Sarridal coa posta en marcha da terceira campaña financiada polo Concello de Cedeira e que será executada pola empresa AXA Arqueoloxía SL.

Tras a autorización de Patrimonio da Xunta, o goberno municipal volve a investir na recuperación e posta e valor da riqueza patrimonial atopada a raíz da localización, en decembro de 2017, da pedra formosa, tamén chamado monumento con forno.

Agora trátase de continuar coa limpeza da muralla que está máis próxima ao monumento e á ampliación da escavación para atopar novos tramos da canle de auga que abastecía unha sauna cuxa construción remóntase ao século III a.de C, segundo a cronoloxía da proba do Carbono 14 (novembro 2018).

Os traballos prolongaranse durante tres semanas e o seu orzamento ronda os 15.000 euros. Emilio Ramil, como arqueólogo e director da empresa adxudicataria, subliñou que se trata de traballar tanto en profundidade como en extensión coa intención de definir o mellor posible a zona máis próxima ás murallas que limitan á construción castrexa. Nesta ocasión, os traballos que darán comezo o luns serán executados por dous arqueólogos e catro auxiliares, ademais da persoa que fará volar un dron para recoller en imaxes a evolución desta nova intervención, que será a quinta. A idea, segundo a concelleira de Cultura e Turismo, María Xosé Rodríguez Pérez, “é seguir traballando ata completar a totalidade do xacemento, unha riqueza patrimonial moi importante non só para Cedeira senón para a cultura en xeral”.

 

Cedeira acollerá este domingo unha andaina solidaria a prol da Asociación Española contra el Cáncer

CEDEIRA ACOLLERÁ ESTE DOMINGO UNHA ANDAINA SOLIDARIA A PROL DA ASOCIACIÓN ESPAÑOLA CONTRA EL CÁNCER

O Concello de Cedeira colabora coa Asociación Española contra el Cáncer (AECC) na organización da Andaina Solidaria prevista para a xornada do próximo domingo. O goberno municipal invita á veciñanza a participar activamente nunha convocatoria que ademais de ter unha fin social tamén sirve de promoción do deporte como hábito saúdable.

As persoas que poidan estar interesadas teñen a posibilidade de apuntarse na páxina evedeportnorte.com, sempre que sexa antes das 23.59 horas do día18; na Oficina de Turismo e xoguetería Rosa, ata o sábado, e a partir das 9.30 do domingo 21 na mesma liña de saída. O prezo da inscrición é de 5 euros. Tanto o importe íntegro da recadación como o diñeiro procedente da venda de camisetas (5 euros) e chuvasqueiros (10 euros), entre outros obxectos, ingresarase nos fondos da AECC para contribuír á investigación e axudar aos enfermos e as súas familias.

O punto de partida será a praza Roxa e as 11.00 horas o momento do inicio dunha proba na que os participantes terán que percorrer unha distancia de case cinco quilómetros, arredor de 4.600 metros.

O itinerario descorrerá polo paseo marítimo, a zona do Beco, a barriada da Area, a Xunqueira, o paseo fluvial e o malecón. Previo ao inicio da andaina haberá unha sesión de zumba, que estará a cargo do grupo de Fanni Barge, mentres que o seu comezo estará marcado pola música da Batukada Discalz@s. A organización tamén conta coa colaboración do club ciclista local, xa que algúns dos seus socios poñeranse tanto ao inicio como ao final do grupo de participantes. Teresa Beceiro está á fronte da xunta local de Cedeira da Asociación Española contra el Cáncer.

Cedeira está á espera da autorización de patrimonio para volver intervir no xacemento do Sarridal

CEDEIRA ESTÁ Á ESPERA DA AUTORIZACIÓN DE PATRIMONIO PARA VOLVER INTERVIR NO XACEMENTO DO SARRIDAL

O Concello de Cedeira está á espera da autorización de Patrimonio da Xunta para ampliar o xacemento arqueolóxico do Sarridal, no que en 2017 foi localizada a quinta e maís antiga pedra formosa atopada en Galicia.
A idea do goberno local é seguir investigando sobre a historia da localidade retomando os traballos que desde hai dous anos estanse a levar a cabo nunha zona que xa se está a converter nunha nova referencia turística e patrimonial de Cedeira.

A prolongación dos espazos ata o de agora escavados, a posta en valor do conxunto e mesmo o inicio dos traballos cara á recuperación do muro que limita o antigo asentamento castrexo son os principais contidos dunha actuación que o goberno municipal prevé iniciar antes da chegada do verán.

De ser así, será a cuarta actuación arqueolóxica desenvolta na zona, aínda que o proxecto tivo como punto de partida a realización dunhas catas contratadas pola administración local e executadas na primavera de 2016. Na xornada do 1 de decembro de 2017 daba comezo a primeira escavación financiada pola Dirección Xeral de Patrimonio (18.000 euros) e o día 14 dese mesmo mes foi localizada a pedra formosa, tamén coñecido como monumento con forno.

Con cargo a unha nova achega autonómica, por importe doutros 18.000 euros, en marzo de 2018 retomábanse os traballos para a posta en valor do asentamento galaico- romano. Posteriormente, e financiado polo Concello, o goberno municipal volveu investir 12.000 euros para delimitar a estrutura da muralla máis inmediata á localización do monumento. Foi o proxecto desenvolvido o pasado verán.