NOVAS

O GOBERNO LOCAL E O ALUMNADO IMPLICADO AVANZAN XUNTOS NA EXECUCIÓN DOS ORZAMENTOS PARTICIPATIVOS

Os proxectos votados nos primeiros Orzamentos Participativos de Cedeira van ser moi pronto unha realidade. Despois da súa aprobación no pleno de finais de marzo, o goberno local desenvolveu nestes meses varias sesións de traballo en liña cos rapaces e rapazas de 4ª da ESO do IES Punta Candieira, para mantelos ao fío do procedemento e mesmo para consultarlles e decidir os últimos detalles da execución. Así, están adxudicadas xa as obras e elementos do parque de calistenia no Paseo Marítimo e concretáronse emplazamento, películas e datas para o ciclo de auto-cine.

A previsión do Concello é ter instalado o parque de calistenia a finais do vindeiro mes de xullo no lugar elixido polo alumnado, na zona do paseo marítimo próxima á cafetería, a máis concorrida. O goberno local adxudicou recentemente os traballos de acondicionamento do areeiro no que estarán instalados os xogos de calistenia á empresa Jardinería Arce, por 6.691,30€ (IVE incluído) e tamén os elementos do parque, como unha xaula de exercicios, unha escaleira horizontal, barras de flexións, paralelas e outros, á empresa Contorna Técnicas Constructivas, por 14.322,04€.

Segundo informan desde o goberno municipal, coincidindo coa estrea destas instalacións programaranse uns obradoiros para amosar á poboación a práctica da calistenia e os seus beneficios, e instalarase unha placa cunha inscrición que fará constar que o parque é froito do primeiro proxecto piloto de orzamentos participativos de Cedeira.

En tanto ao ciclo de auto-cine, o lugar preferido polo grupo de 4º da ESO á zona do peirao próxima á Confraría de Pescadores, polo que o Concello de Cedeira está a tramitar o permiso de Portos. De non ter a autorización, optariase por outra ubicación. Proxectaranse as películas “Cuñados” e “El Viaje de Chihiro” entre o 9 de xullo e o 21 de agosto.

Neste proceso de Orzamentos Participativos púxose a debate a contía de 20.000€, porén o goberno local deixou constancia no pleno de marzo, no que foron aprobados, o seu compromiso de repetir a experiencia cada ano e implicar nela ao alumnado de 4ª de ESO do IES Punta Candieira, de xeito que os sucesivos grupos teñan oportunidade de aprender de primeira man o funcionamento do Concello (a composición da corporación, os servizos públicos locais), e os aspectos a ter en conta nas decisións sobre o Orzamento Municipal (o interese xeral e o impacto desas decisións ou doutras, como se definen as necesidades dunha poboación local e cales son as dificultades de determinados colectivos). Ademais, o proceso implica unha reflexión sobre os equipamentos e recursos dos que dispón Cedeira, para realizar propostas máis acaídas á realidade local.

Agora, xunto coas súas familias, os protagonistas desta primeira experiencia estarán de seguro máis pendentes dos medios de comunicación e as redes sociais, para coñecer os avances sobre as políticas locais na súa vila e sobre as novas relativas aos proxectos no que estiveron trallabando nos últimos meses.

Tanto a dirección e o profesorado do IES Punta Candieira como o Concello, a través do equipo de goberno, teñen manifestado ao longo das sesións de traballo nestes meses, o valor pedagóxico desta nova forma de xestión local. Enxalzan a participación, o co-deseño e o contraste constante nas decisións, que aportan unha gran lexitimidade e acerto nas actuacións públicas.

O CONCELLO ADXUDICA AS OBRAS DE SANEAMENTO DA RÚA AMOR HERMOSO

O Concello de Cedeira acaba de adxudicar á empresa Excavaciones y Obras Marcos SL a execución do proxecto de “Saneamento da rúa Amor Hermoso”, para dotar de rede separativa de augas residuais ao tramo entre os números 2 e 14 de dito vial. Presentáronse cinco ofertas, e despois de descartar a máis barata por presentar un prezo anormalmente baixo e non xustificalo suficientemente, a devandita empresa levou o contrato por un prezo de 26.138,76€ (IVE incluído) -saíra a licitación, polo procedemento aberto simplificado, por 30.758,72€-.

O prazo de execución é de dous meses e os traballos a realizar son similares aos que con anterioridade se fixeran na rúa As Pontes de García Rodríguez, perpendicular a Amor Hermoso e noutros viais da zona urbana. Ambas as dúas tiñan unha antiga rede de carácter unitario, con tubaxe de formigón en masa e sen xuntas. Agora, cambiarase a rede de sumidoiros de Amor Hermoso, entre os números 2 e 14, por unha rede separativa de augas residuais na que se substituirá o colector existente por outro de PVC e se instalará unha nova rede de recollida de augas pluviais, tamén de PVC.

Esta é unha actuación que o Concello de Cedeira acomete con cargo aos fondos do programa POS+ADIC 1/2017 da Deputación da Coruña. Desde o goberno local, o alcalde Pablo Diego Moreda Gil comentou que esta obra é un novo avance na renovación da rede de saneamento do municipio, que é moi antiga nalgunhas zonas, e recordou que no último ano o Concello ten acometido máis intervencións destas mesmas características, como a que se fixo na rúa Estrada e adxacentes, e outras obras para dotar de saneamento a núcleos da zona rural que carecían del, como o de Vilacacín.

AS MARISCADORAS DE CEDEIRA RETIRAN LIXO DAS PRAIAS NO MARCO DO PROGRAMA “MAR LIMPO”

A Agrupación de Mariscadoras de Cedeira participa por segundo ano consecutivo no programa “Mar Limpo” cuxo obxectivo é retirar basura do mar e sensibilizar á sociedade sobre os nocivos efectos da contaminación do medio mariño. Desde o Concello, o alcalde Pablo Diego Moreda Gil quixo agradecer a iniciativa destas mulleres e subliñou que “son un exemplo para a cidadanía”.

O proxecto que levan adiante as 18 mariscadoras da Confraría cedeiresa abrangue 16 xornadas de limpeza nas zonas dos bancos marisqueiros das praias da Magdalena, Esteiro e Pantín, conforme un calendario que se vai prolongar ata o mes de outubro. Ademais de ir aos areais para retirar lixo, o proxecto incluirá a celebración dunhas charlas no colexio Nicolás del Río e o IES Punta Candieira, nas que se explicará, entre outras cousas, como é o traballo de extracción de marisco e os factores que inciden na produción dos bancos, poñendo énfase nas nefastas consecuencias da contaminación e nas fórmulas coas que todos e todas podemos contribuír ao coidado do medio mariño.

A de Cedeira foi unha das poucas confrarías galegas que se sumaron ao programa Mar Limpo xa na súa primeira edición. Trátase dunha iniciativa impulsada pola Consellería do Mar e financiada a través do Fondo Europeo Marítimo de Pesca, na que as traballadoras reciben por cada xornada de limpeza unha cantidade equivalente ao que percibirían por unha de traballo, calculada coa media dos ingresos anuais.