MOCIDADE

O CONCELLO ORGANIZA UN TALLER DE CALISTENIA PARA DAR A COÑECER O NOVO PARQUE DESTA PRÁCTICA DEPORTIVA

O Concello de Cedeira organiza para hoxe, martes día 24 de agosto, un obradoiro de calistenia para que os rapaces e rapazas aprendan as técnicas básicas desta disciplina deportiva e coñezan as novas instalacións que para a súa práctica creou a administración municipal no paseo da Madalena. O alcalde, Pablo Diego Moreda Gil, destacou que esta é unha actuación xurdida ao abeiro dos primeiros orzamentos participativos do Concello e que foi votada polo alumnado de 4º da ESO do IES Punta Candieira, polo que responde a unha demanda real da mocidade cedeiresa.

A calistenia é unha disciplina deportiva que está a gañar moitos seguidores. Practícase ao aire libre e precisa unicamente de elementos moi sinxelos, como as barras, bancos e espaleiras que forman o parque de Cedeira, aberto a calquera persoa que queira facer deporte. Neste tipo de ximnasia realízanse exercicios de carácter aeróbico, cardiovascular, de forza, musculatura ou flexibilidade, nos que se emprega o peso corporal.

Para que as persoas interesadas aprendan a sacarlle partido as novas instalacións, o Concello invita a participar no taller que terá lugar hoxe, de 19.00 a 20.30 horas. A actividade vai dirixida a maiores de 12 anos e a participación será gratuíta e por orde de chegada, mantendo o distanciamento e demáis medidas de prevención pola covid.

O VII CERTAME DE PINTURA RÁPIDA “VILA DE CEDEIRA” SERÁ O DÍA 29 DO PRESENTE MES DE AGOSTO

O Concello de Cedeira convoca para o día 29 o Certame de Pintura Rápida “Vila de Cedeira”, que este ano chega a súa sétima edición e co que o goberno municipal quere promocionar a cultura en xeral e a vila cedeirense en particular.

O concurso segue a manter as características das pasadas edicións, así como a contía dos premios, que chegan ata os 1.800 euros no seu conxunto. O primeiro clasificado recibirá 800 euros, mentres que o segundo obterá 600 e 400 euros serán para o terceiro.

O estilo e a técnica serán libres, a súa temática xirará en torno á paisaxe, e o espazo físico no que se realicen debe ser no entorno que abrangue o paseo marítimo, a praia da Madalena, o paseo da Mariña, zona do río Condomiñas, praia da Area Longa, casco vello e Porto de Cedeira. A execución será directa, diante do motivo ou do modelo natural, non poidendo utilizarse para tal fin fotografías tomadas con antelación.

Na seguinte ligazón pódese descargar as bases:

DESCARGAR PDF Bases do VI Certame de pintura rápida Vila de Cedeira 2021

“AS7PARROQUIAS” DESTACA NO SEU ÚLTIMO NÚMERO O INVESTIMENTO DE 2,6M€ DO GOBERNO CENTRAL EN CEDEIRA

O Concello de Cedeira está a distribuír estes días entre a veciñanza unha nova edición do boletín informativo “As7Parroquias”, no que recolle as novidades máis destacadas do traballo municipal dos últimos meses. Así, neste número 18 da publicación destaca a noticia do compromiso acadado polo Ministerio de Transición Ecolóxica de financiar con 2,6 millóns de euros a rexeneración da praia da Madalena e o proxecto de recuperación da antiga cetaria das Sonreiras, así como a modificación de créditos aprobada polo pleno, a través da cal o Concello incorpora máis de medio millón de euros ao capítulo de investimentos deste ano, procedentes de remanentes do pasado 2020.

O novo programa de axudas creado polo Concello de Cedeira para paliar o impacto da covid nas empresas e autónomos da vila, dotado con 70.000 euros, é outra das cuestións das que informa o boletín. “As7Parroquias” tamén dá conta da execución dos orzamentos participativos, coa realización do parque de calistenia e o ciclo de auto-cine, así como da presencia de Cedeira na última edición de Fitur.

O rexeitamento aos proxectos de parques eólicos mariños que proxecta Iberdrola no litoral próximo a Cedeira e tamén ao parque eólico terrestre Badulaque é tamén un tema que aborda o boletín, en cuxas páxinas o Concello informa igualmente da recente contratación de todos os suministros enerxéticos municipais de fontes renovables. A nova ordenanza de protección de camiños municipais e o apoio do Concello á flota pesqueira fronte ao regulamento proposto pola Unión Europea son outros dos temas que aborda a publicación.

A Banda de Música Vila de Cedeira protagoniza desta volta a contraportada do boletín, despois dunha recente renovación na directiva. O relevo xeracional garante o futuro desta formación, con grande arraigamento na localidade e cun espíritu bulideiro que a leva a integrar todo tipo de músicas no seu repertorio.

Pódese descargar o boletín na seguinte ligazón:

DESCARGA Boletín nº 18