MOCIDADE

O CONCELLO CONSOLIDA OS ORZAMENTOS PARTICIPATIVOS CO CONCURSO DO ALUMNADO DO IES PUNTA CANDIEIRA

O alcalde de Cedeira, Pablo Diego Moreda Gil, e a concelleira delegada de Participación e Mocidade, Carmela Prieto, presentaron o pasado venres no IES Punta Candieira o proxecto de Orzamentos Participativos para o presente ano 2022. Desta volta un total de 60 alumnos e alumnas, que cursan 3º da ESO e que teñen, na súa maioría, 14 anos cumpridos, están encargados de debater e decidir sobre o destino dunha partida de 20.000€ do presuposto municipal.

O Concello de Cedeira desenvolveu o pasado ano a súa primeira experiencia de Orzamentos Participativos, daquela co curso de 4º da ESO. Do proceso saiu o parque de calistenia que se inaugurou o pasado verán na zona do Camiño Real e un ciclo de autocine.

O proceso, de novo este ano, implica directamente á comunidade escolar do IES Punta Candieira, que vai traballar en estreita colaboración co Concello durante os vindeiros meses. Como no pasado curso, os mozos e mozas van debater diferentes propostas, que poden corresponder a calquera área de xestión municipal (cultura, deporte, medio ambiente, obras, urbanismo, servizos sociais e igualdade) ao tempo que aprenden o funcionamento da administración municipal e os seus órganos de decisión.

Neste mes de febreiro, realizaranse as primeiras sesións formativas para que o alumnado coñeza o funcionamento interno do Concello, quen o compón e como se toman decisións dentro das súas competencias. Isto facilitará a elaboración posterior de propostas por parte dos rapaces e rapazas, que redactarán proxectos acordes á capacidade da administración local. Xa no mes de marzo terán lugar as catro sesións de análise do territorio e problemáticas a resolver ademais das últimas sesións formativas, nas que aprenderán a confeccionar os distintos proxectos. O alumnado debaterá ademais sobre os beneficios de cada proxecto para a comunidade, baixo pautas de solidariedade e equilibro entre parroquias e colectivos.

Cada semana, o alumnado avanzará nas horas de titoría sobre o contido impartido na sesión anterior, recollendo información e perfilando as súas propostas, co ánimo de ser entregadas ao Concello a inicios do mes de abril. O persoal técnico municipal fará a continuación unha análise das ideas do alumnado (para ver se entran dentro das competencias municipais e son viables técnica, económica e xuridicamente) e redactará un informe de viabilidade por cada proposta.

REMATADOS E A DISPOSICIÓN DA CIDADANÍA A NOVA TIROLESA E O BOWL DE SKATE DO PARQUE DO CAMIÑO REAL

28 de xaneiro de 2020. O Concello de Cedeira informa de que están rematados a disposición da cidadanía a nova tirolesa e o bowl de skate do parque do Camiño Real, un proxecto executado cun investimento de preto de 121.000€. Segundo destacou o alcalde, Pablo Diego Moreda Gil, a actuación reforza o atractivo que ten toda esta zona, a carón da praia da Madalena, para as familias e en particular para a xuventude.

“Temos un espazo único, con árbores, paseos pavimentados, céspede, o río, xogos para nenos e nenas de diferentes idades e tamén estes novos elementos para o ocio da mocidade, que se suman ao parque de calistenia inaugurado hai poucos meses e xurdido do proceso de orzamentos participativos – destacou o alcalde-; un conxunto excelente para o tempo de lecer, o encontro e a convivencia da veciñanza e das persoas que visitan a vila”.

O bowl de skate ocupa o espazo no que anteriormente había unha fonte pública en desuso. É unha bañeira para practicar a patinaxe, cunha superficie irregular e con pendientes e formas redondeadas. O seu deseño está pensado para ofrecer seguridade aos principiantes, ao tempo que ofrece suficientes atractivos para skaters máis experimentados. A instalación para patinar ten 176 metros cadrados, ainda que a superficie total, contando o perímetro habilitado, abrangue 264 medros cadrados.

A tirolesa, situada a poucos metros, xunto a un parque de xogos infantís próximo, ten 28 metros de largo. Ten catro metros de altura na saída e tres na chegada, con solo de caucho ao longo de todo o percorrido.

A empresa Rog i Fills Associats foi a encargada das obras, tras gañar unha licitación aberta á que concurriron tamén outras catro empresas.

O CONCELLO PROXECTA A CUBRICIÓN DO PARQUE DE XOGOS DA PRAZA FLOREAL CUNHA ESTRUTURA TRANSLÚCIDA

O goberno local de Cedeira acaba de solicitar unha subvención á Xunta de Galicia para a execución dunha estrutura de cubrición do parque de xogos da praza Floreal. Segundo informou o alcalde, Pablo Diego Moreda Gil, é unha actuación orzamentada en 70.730,88€ (IVE incluído) que o Concello confía en financiar a través do programa de axudas a concellos para infraestruturas, dotacións, instalacións e equipamentos vencellados á prestación de servizos municipais. “Coa pandemia púxose de manifesto a necesidade que temos de contar con espazos abertos e ao mesmo tempo abrigados da choiva, para pasar tempo de lecer e de convivencia”, destacou o alcalde.

A obra consistirá en cubrir cunha estrutura de perfilería tubular metálica todo o parque de xogos de Floreal, que ocupa unha superficie de 122 metros cadrados e que consta de randeeira, balancíns, tobogán e mesa de picnic. Coa estrutura metálica empregaranse placas de policarbonato celular que permita pasar a luz natural e que ofrece seguridade, resistencia técnica e integración no contorno.

Desde o goberno local destacan que é unha actuación dirixida ás familias, que terán aquí un lugar para gozar dos xogos ao aire libre, ao igual que sucede coa obra que se está a executar na praza do 18 de Decembro, moi frecuentada pola veciñanza de certa idade, que tamén se vai cubrir cunha estrutura que ofrecerá abrigo do vento e a choiva.