MOCIDADE

O CENTRO DE OCIO XUVENIL DE CEDEIRA ORGANIZA PARA ESTE SÁBADO UN OBRADOIRO DE TATUAXE

O Centro de Ocio Xuvenil (COX) do Concello de Cedeira programa para este sábado, día 25, un obradoiro de tatuaxe dirixido a mozos e mozas de 12 a 18 anos. É unha iniciativa que resposta á propia demanda expresada polos usuarios e usuarias no marco da dinámica participativa coa que se está a xestionar o centro. As prazas son limitadas e é preciso inscribirse previamente, de xeito presencial ou por correo electrónico escribindo á dirección coxcedeira@gmail.com.

A entidade Vella Escola, especializada na divulgación de diferentes disciplinas da chamada “cultura urbana”, será a encargada de impartir o obradoiro de Tatoo. A actividade desenvolverase de 17.30 a 19.30 horas e as persoas participantes coñecerán os diferentes estilos e as ferramentas e técnicas utilizadas na realización de tatuaxes. Na mesma sesión realizaranse prácticas individuais sen agullas, primeiro, e despois con elas, de xeito supervisado, sobre unha pel de laranxa.

Para a mesma xornada do sábado están tamén anunciadas varias actividades promovidas pola asociación Lugares Comúns, coa colaboración do Concello de Cedeira. Pola mañá desenvolverase o I Encontro de Sementes, a partir das 11.00 horas na Sala Áncora. Un agricultor da zona dará unha charla sobre o banco de sementes de Galicia e sobre os inxertos. Porén, a entidade subliña o interese da segunda parte deste encontro, o intercambio de sementes, para o que invitan a todas as persoas interesadas no cultivo da terra a acudir con sementes para intercambiar e con vontade compartir coñecementos e curiosidade.

Lugares Comúns promove tamén na tarde do sábado un encontro coas artes escénicas. O Auditorio acollerá, a partir das 19.00 horas, a representación da obra teatral “Hai alguén aí?”, o pase dun audiovisual co alumnado de violín e unha pequena mostra de músicas do mundo a cargo do grupo O Mar.

Lugares Comúns é unha asociación que xurdiu por iniciativa dun grupo de veciños e veciñas de Cedeira con diferentes orixes, moitas delas de fóra de España ou de Galicia e tamén algunhas da propia vila, que teñen o interese de compartir cultura e experiencias. Defínense como unha plataforma “para facer aos de fóra máis de aquí e aos de aquí máis de fóra”.

Xunto con estas actividades, o vindeiro sábado Cedeira acollerá tamén unha xornada para promover o deporte en idade escolar. Concretamente, o programa estará adicado ao bádminton nas categorías benxamín, alevín, infantil e cadete. A cita, encadrada na campaña Xogade da Xunta de Galicia, comezará ás 10.00 horas no Polideportivo Municipal.

COMEZA O PROCESO DOS ORZAMENTOS PARTICIPATIVOS, OS TERCEIROS CONFIADOS AO ALUMNADO DO PUNTA CANDIEIRA

O alumnado de 3º da ESO do instituto Punta Candieira embárcase neste mes de febreiro no proceso de preparación dos terceiros Orzamentos Participativos do Concello de Cedeira. Coa positiva experiencia das dúas edicións anteriores, o Concello ten planificado o traballo para que os rapaces e rapazas poidan levar a súa proposta diante do pleno da corporación o día 5 de maio, na mesma sesión na que está previsto aprobar a constitución do Consello Local de Infancia e Adolescencia.

Os Orzamentos Participativos son unha peza máis dunha aposta decidida do goberno local de Cedeira por dar voz e voto á mocidade e á infancia, na que tamén se insire o novo modelo de xestión do Centro de Ocio Xuvenil (COX) e o desenvolvemento do Plan de Infancia e Adolescencia. Segundo destacou Carmela Prieto, a concelleira de Participación e Xuventude, nos dous últimos anos foron aprobadas varios proxectos a través dos Orzamentos Participativos, aos que o Concello reserva 20.000€ do presuposto municipal en cada exercicio. Así, destes procesos saiu o parque de calistenia e un ciclo de autocine, así como unhas melloras no parque Floreal que xa están contratadas e pendientes de executar en breve.

O traballo para sacar adiante os terceiros Orzamentos Participativos comezou este mes con unha circular informativa para as familias do alumnado de 3º de ESO e as primeiras sesións cos propios mozos e mozas implicadas, sempre nas horas semanais reservadas a titorías. A experiencia comeza por coñecer o funcionamento interno do Concello, quen o compón, cales son as súas competencias e cales son os pasos para a toma de decisións. A continuación estúdase tamén o territorio, promovendo unha reflexión sobre as necesidades do municipio. Despois comeza a elaboración de propostas, fase na que o alumnado redacta os seus proxectos e debate sobre eles baixo pautas de solidariedade e equilibrio entre parroquias e colectivos, cunha visión de xénero.

No vindeiro mes de abril o persoal técnico municipal analizará as propostas do alumnado para verificar se entran dentro das competencias municipais e son viables económica e xuridicamente. Para cada unha das ideas, o persoal do Concello emitirá un informe no que detallarán se é ou non viable e as razóns, de maneira que o alumnado poderá aprender sobre custes reais, normativas aplicables, permisos necesarios, medios e recursos ou prazos que atinxen ao seu desenvolvemento. As propostas viables serán as que se sometan a votación entre o alumnado, nunha asemblea que se celebrará o día 27 de abril. Así, os mozos e mozas que sexan elixidos polo grupo encargarase de expor diante do pleno da corporación, o 5 de maio, as propostas seleccionadas para acadar o investimento e facerse realidade.

A ORQUESTRA OLYMPUS AMENIZARÁ UNHA VERBENA DE FIN DE FESTAS DE NADAL ESTE VENRES EN CEDEIRA

O goberno municipal de Cedeira reprogramou para este venres, día 6 de xaneiro, a verbena coa orquestra Olympus que tivo que ser suspendida na madrugada de Ano Novo pola adversa meteoroloxía. O evento transfórmase nunha festa de despedida das festas de Nadal, coa que o Concello quere brindar á veciñanza e ás numerosas personas que visitan a vila nestas festas, para reencontrarse con amigos e familia, unha oportunidade para gozar e divertirse xuntos.

Desta volta a verbena comezará ás 23.15 horas, nunha carpa disposta ao efecto na praza Roxa. A orquestra Olympus, unha das máis prestixiosas de Galicia, levará o seu espectáculo de música de diferentes estilos e baile á vila, xusto no arranque da súa nova xira 2023.

Cómpre recordar que hoxe a Cabalgata dos Reis Magos en Cedeira sairá do CEIP Nicolás do Río ás 18.00 horas, coas súas tres carrozas para Gaspar, Melchor e Baltasar. Realizará un percorrido polo casco urbano e irá ao Auditorio Municipal, onde recibirán aos nenos e nenas que queiran entregarlles as súas cartas. A continuación, sobre as oito, haberá unha merenda nas instalacións do colexio, na que se repartirá chocolate quente con roscón de Reis ou bola. Instalaranse xogos inclables para a cativada.

Para o sábado, día 7, está prevista a Carreira Popular de Nadal que tivo que ser adiada o pasado día 31. A cita lúdico-deportiva comezará na praza Roxa ás 16.00 horas, cun itinerario circular que pasará pola praza 18 de Decembro, o Camiño Real da Madalena, a rúa Salinas, a avenida de España e remate na praza Roxa. As persoas adultas realizarán dúas voltas ao trazado, mentres que as persoas que opten por facer unha andaina lúdica farán unha. É unha carreira na que moitas persoas participantes adoitan acudir con disfraces, subliñando o ambiente festivo da mesma. Ao remate da carreira sorteranse unha serie de cestas de Nadal entre as persoas participantes.