Skip to content Skip to left sidebar Skip to footer

MOCIDADE

O programa de Nadal dará lugar esta fin de semana a dúas actuacións musicais no Auditorio municipal

O PROGRAMA DE NADAL DARÁ LUGAR ESTA FIN DE SEMANA A DÚAS ACTUACIÓNS MUSICAIS NO AUDITORIO MUNICIPAL

O Concello de Cedeira encherá o tempo de Nadal cunha programación na que estarán moi presentes a música, as tradicións e mesmo as celebracións máis populares.

Cara a esta fin de semana o auditorio municipal acollerá o venres (día 21)unha audición musical a cargo dos alumnos da Escola de Música e o sábado 22 o Festival de Corais organizado pola agrupación Virxe do Mar, no que intervirán Armonía de Ferrol e a Polifónica de Betanzos, ademais da formación convocante. Ambas as dúas actuacións darán comezo ás sete da tarde.

O domingo, pola súa banda, dará lugar á visita de Papá Noel que estará, a partir das seis da tarde, na praza da Marieta e que despois paseará en carroza polas principais rúas da localidade. A visita rematará coa recepción que terá como referencia a praza Roxa. Colaboran a Asociación Los Delfines, Sport Club Fitness, Protección Civil de Cedeira, Remo Cedeira, Axexo, C.Buceo Cedeira, Confraría de Pescadores e o Concello de Cedeira na organización e celebración dun dos actos máis esperados do Nadal cedeirense.

A continuación, a actividade trasladarase ao auditorio municipal que acollerá, ás oito da tarde, o Festival de Corais organizado pola formación Eixil de Cedeira. Nel intervirán, ademais da coral organizadora, Armonía de Ferrol, Polifónica de Melide e a vinculada ao Círculo Mercantil de Ribeira.

O auditorio tamén acollerá o día 28, ás 20.00 horas, o concerto de Fin de Ano ofrecido pola Banda Vila de Cedeira e o día 29, nesta ocasión pola mañá (12.00 horas), o concerto “MIP Ortegal”, dedicada á música inclusiva e participativa. Trátase dunha terapia musical que volve aos escenarios da man do alumnado de Aspromor, Apader e Aprom e que, coa axuda da banda Vila de Cedeira, crean un espectáculo ecléctico no que se pode apreciar a excelencia, a beleza e a diversidade da música.

A praza Roxa volverá ser o escenario da Verbena de Aninovo, que dará comezo á unha da madrugada e que correrá a cargo da orquestra Filiada. Desde a organización destácase que haberá unha carpa para animar á participación dos veciños na festa, que servirá para dicir adeus ao ano 2018.

A programación de Nadal concluirá o día 5 coa celebración da tradicional Cabalgata dos Reis Magos. A comitiva dará comezo ás seis da tarde co percorrido dos Magos de Oriente polas rúas da vila para finalizar no Palacete municipal, na que está prevista a tradicional recepción oficial. A festa acabará coa degustación de chocolate quente e roscón no pavillón do CEIP Nicolás del Río, no que tamén haberá inchables para os nenos e as nenas. Buxainas, Aturuxeiras, ANPA Picapeixe, Asociación de Amas de Casa, Gadis, Muebles y Carpintería García, Protección Civil e Concello de Cedeira colaboran na organización desta última convocatoria do Nadal.

Cedeira construirá novos vestiarios no campo de fútbol para favorecer a igualdade de xénero

O Concello de Cedeira leva o tema da igualdade de xénero ás instalacións deportivas. O goberno municipal vén de contratar por 59.502,33 euros á empresa Mecano, Obras y Reparaciones SL para a construción de novos vestiarios no campo de fútbol municipal do Beco. A obra virá completar a edificación existente fronte aos terreos de xogo, respectando a tipoloxía, alturas e mesmo as súas características estéticas.

O prazo de execución da obra é de dous meses e a realización da mesma obedece a necesidade de adecuar as instalacións á incorporación da muller á práctica regular do fútbol. A realidade, segundo apuntou o alcalde, Pablo Moreda Gil, “é que a presenza feminina é cada vez maior en todas as categorías”. A vila conta ademais cun equipo, Discalzas Cedeira SD, que está a competir na liga Feminina de Fútbol 8.

A idea é permitir o uso diario dos dous campos de fútbol oito e suplir as carencias que había con respecto á ultilización dos vestiarios por parte das xogadoras.

O proxecto consiste na construción de dous vestiarios, cunha superficie útil de 82 metros cadrados cada un deles e con capacidade para un mínimo de 15 usuarios á vez. Haberá zona de entrada, espazos para as duchas -unha para cada tres persoas-, cabinas accesibles, bancos, aseos, lavabos e taquillas con chave.

A realización deste proxecto forma parte das actuacións levadas a cabo desde o goberno municipal para mellorar as instalacións deportivas, por considerar que tamén así se está a promocionar o deporte. Esta política deu lugar hai pouco á compra de bicicletas verticais e de spinning para o ximansio, a obras de mantenimiento e mellora do sistema de auga quente no pavillón polideportivo, á erradicación de humidades e á substitución dos bancos soterrados utilizados por adestradores e xogadores suplentes no campo de fútbol de O Beco. O investimento rondou os 40.000 euros.

Cedeira conmemorará este domingo o 25-N cunha concentración diante do Concello

O goberno de Cedeira conmemora o 25 de novembro ese mesmo día -o domingo- cunha concentración na praza do Concello, coa lectura dun manifesto e con actuacións musicais a cargo de Iría e Dopazo.

Ademais xa foron colgadas pancartas dos edificios municipais -Concello, Palacete, Polideportivo e Servizos Sociais- e distribuironse carteis cos lemas “Cedeira en Negro”, “Non abuses”, “Non Violes” en negocios, comercios e locais de hostalería. As persoas que o desexen tamén poderán vestir de loito en sinal de dor por todas as mulleres mortas e polas que están a sofrer violencia.

O executivo local invita á veciñanza a secundar unha iniciativa que dará comezo ás doce do mediodía e na que tamén tomarán parte representantes da corporación.

O Concello tamén colabora co Club de Remo da localidade na celebración dun “adestramento contra a violencia de xénero” que terá lugar mañá sábado e que incluirá un minutos de silencio con remos en alto en homenaxe ás vítimas e un percorrido marítimo polo conxunto das embarcacións participantes. A actividade dará comezo ás 16.30 horas e terá o seu punto de partida fronte O Ramón.

O Concello de Cedeira participa, xunto a outras 101 administracións locais e as Deputacións da Coruña, Lugo e Pontevedra, na campaña “En Negro contra as Violencias” co obxectivo de sensibilizar á poboación respecto da situación de violencia na que viven moitas mulleres e para poñer nas axendas a agresividade machista como un problema público e que afecta a toda a cidadanía.

Desde o ano 2008, as cifras oficiais rexistran 619 asasinatos machistas no conxunto do Estado e 43 en Galicia e, no que vai de ano, a violencia contra as mulleres acabou coa vida de 10 menores.

[lsvr_gallery images=”14470,14471″ items_per_row=”2″ size=”full” masonry=”yes” click_action=”lightbox”]